ރާއްޖޭގައި މިހާރު ކުރިއަށްދާ ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) އަންހެން ވޮލީ ބޯޅަ ޗެލެންޖު ކަޕްގައި ވާދަކުރާ ދިވެހި ރާއްޖޭގެ ޤައުމީ ޓީމަށް ބޭނުން ވަނީ ސަޕޯޓަރުންގެ ސަޕޯޓު ކަމަށް، ޤައުމީ ޓީމުގެ ކޯޗު ސޮފްވާން އަޙުމަދު ބުނެފި އެވެ.

ރާއްޖޭގައި މިހާރު ކުރިއަށްދާ މުބާރާތުގައި ވާާދަކުރަނީ ރާއްޖޭގެ އިތުރުން، އަފްޣާނިސްތާން، ތަޖަކިސްތާން އަދި ކިރްގިސްތާން އެވެ. ފުރަތަމަ މެޗުގައި ރާއްޖެ އިން ވަނީ ސީދާ ތިން ސެޓުން އަފްޣާނިސްތާން ބަލިކޮށްފަ އެވެ. ދެ ވަނަ މެޗުގައި ތަޖަކިސްތާންގެ މައްޗަށް ކުރި ހޯދީ ތިން ސެޓު އެއް ސެޓުންނެވެ. ލީގު ބުރުގެ ފަހު މެޗުގައި ކިރްގިސްތާން އަތުން ރާއްޖެ ބަލިވި ނަމަވެސް، މެޗުގައި ދިވެހި ކުޅުންތެރިންގެ ހިތްވަރު ވަނީ ފެނިފަ އެވެ.

ލީގު ބުރުގައި ކިރްގިސްތާނާ ދެކޮޅަށް މެޗުގެ ފުރަތަމަ ސެޓުގެ ފަަހު ވަގުތު ދިޔަ ރެލީއެއްގައި ދިވެހި ކުޅުންތެރިން ދެެއްކި ކުޅުމާއި، ހިތްވަރަށް އެތައް ބައެއްގެ ލޯތްބާއި، ތަރުހީބު ވަނީ ލިބިފަ އެވެ. ސޯޝަލް މީޑިއާ ގައި އެ ވީޑިއޯ ދައުރުވަމުންދާއިރު، ޤައުމީ ކޯޗު ސޮފްވާން ބުނީ، ދިވެހި ވޮލީ ޓީމަށް ބޭނުން ވަނީ ދިވެހި ސަޕޯޓަރުންގެ ސަޕޯޓު ކަމަށެވެ. އަދި ސަޕޯޓަރުންގެ ސަޕޯޓާއެކު، ދިވެހި ޓީމަށް އެފަދަ ކިތަންމެ ރެލީއެއްގައި ވެސް ހިތްވަރު ކުރެވޭނެ ކަމަށް ސޮފްވާން ބުންޏެވެ. އެކަން ފާހަގަކޮށް ސޮފްވާން އެދުނީ ސެމީ ފައިނަލްގައި ތަޖަކިސްތާނާ ދެކޮޅަށް ކުޅޭ މެޗަށް ދިވެހި ސަޕޯޓަރުން ޒުވާނުންގެ މަރުކަޒަކަށް ވަދެ، ޤައުމީ އަންހެން ވޮލީ ޓީމަށް ސަޕޯޓު ދެއްވުމަށެވެ.

މުބާރާތުގެ ސެމީ ފައިނަލްގައި ރާއްޖެ އިން ތަޖަކިސްތާނާ ދެކޮޅަށް ކުޅޭނީ އަންގާރަ ދުވަހުގެ ރޭ 20:45 ގައެވެ.