ޔޫއޭފާ އާއި ފީފާއިން ދައްކަނީ ފައިސާގެ ވާހަކަ، ކުޅުންތެރިންނާ އަޅާލުން ކުޑަ: ޑެބްރޫނޭ

މި ސީޒަނުގައި ކުޅެންޖެހިފައިވާ މެޗުތަކުގެ އަދަދު ގިނަވުމުން ޔޫރަޕުގެ ފުޓްބޯޅަ ޖަމިއްޔާ އަށް ކުޅުންތެރިންގެ ފާޑުކިއުން އަމާޒުވެއްޖެ އެވެ.

މިހާރު ކުޅެމުންދާ ޔޫއޭފާ ނޭޝަންސް ލީގުގެ މި ހަފުތާގެ ފުރަތަމަ މެޗުތަކަށް ފަހު މި ފާޑުކިއުންތައް އޮއްސާލީ މެންޗެސްޓާ ސިޓީ އަށް ކުޅެމުން އަންނަ ދެ ކުޅުންތެރިންނެވެ. އެއީ ޕޯޗުގަލްގެ ބެނާޑޯ ސިލްވާ އާއި ބެލްޖިއަމާއި ސިޓީގެ ކެޕްޓަން ކެވިން ޑްބެރޫނާ އެވެ.

މީގެ ތެރެއިން ޑެބްރޫނޭ ބުނީ ކުޅުންތެރިންނަށް އަރާމުކުރަން ލިބޭ ދުވަސްތައް މަދުވެ، ގިނަ މެޗުތަކެއް ކުޅެން ޖެހުމުން އޭގެ ގެއްލުން ފެނިގެންދާނީ ސީޒަނުގެ ފަހުބަޔަށް އެޅުމުން ކަމަށެވެ.

މެންޗެސްޓާ ސިޓީ އަށް ކުޅެމުން އަންނަ ސިލްވާ ބުނީ މިހާރު އޮތީ ވަރަށް ތާކުންތާކު ނުޖެހޭ ޝެޑިއުލެއް ކަމަށެވެ.

އޭނާ ބުނީ މެޗުތަކުގެ އަދަދާމެދު ޝަކުވާ ކުރުމުން ސްކޮޑްތަކުގެ ސައިޒު ބޮޑުކަމަށް ދައްކާ ވާހަކަ އަކީ މުޅީން ހަގީގަތެއްނޫން ކަމަށެވެ.

ފުޓްބޯޅަ ސީޒަނެއްގައި ޓީމުތަކާއި ގައުމީ ޓީމަށް ކުޅެންޖެހޭ މެޗުތައް އިތުރުވާތީވެ ޔޫރަޕުގެ މަޝްހޫރިު ކޯޗުން ވެސް ވަނީ ޔޫއޭފާ އާއި ފީފާ އަށް ފާޑުކިއުން އަމާޒުކޮށްފަ އެވެ.