ހޯމް މިނިސްޓްރީގެ ސްޓޭޓް މިނިސްޓަރު ޔޫސުފް އަބްދުލްގަފޫރު މަގާމުން ވަކިކޮށްފި

މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީގެ ސްޓޭޓް މިނިސްޓަރު ޔޫސުފް އަބްދުލްގަފޫރު މަގާމުން ވަކިކޮށްފި އެވެ.

އޭނާ މަޤާމުން ވަކި ކޮށްފައިވަނީ ނިމިދިޔަ ހަފްތާގައެވެ. އެހެންނަމަވެސް އޭނާ މަޤާމުން ވަކި ކުރި ސަބަބެއް ސާފެއް ނޫނެވެ.

މިވަގުތު އެ ވުޒާރާގެ ސްޓޭޓް މިނިސްޓަރު ކަމުގައި 3 ބޭފުޅުން ތިއްބަވައެވެ. އަދި 13 ޑެޕިއުޓީ މިނިސްޓަރުންވެސް ތިއްބަވައެވެ.

މި ސަރުކާރު ވެރިކަމަށް އައީ ސިޔާސީ މަޤާމުތައް 700ށް ވުރެ އިތުރު ނުކުރާނެ ކަމުގެ ވައުދާއެކުއެވެ. ނަމަވެސް އެ އަދަދު މިހާރު އެތައް ހާހަކަށް އަރާފައިވާކަމަށް މިހާރު ފެންނަން ހުރި އަދަދުތަކުންވެސް ފެނިގެންދެއެވެ.

އެހެންނަމަވެސް ވެރިކަމަށް 10 މަސް ވެގެންދިޔައިރު ސަރުކާރުގެ ސިޔާސީ މަޤާމުތަކުގެ އަދަދުތައް މިހާތަނަށްވެސް ހާމަކޮށްފައެއް ނުވެއެވެ.