ހުޅުމާލޭގައި ހިނގި އެކްސިޑެންޓުގައި ޒުވާނެއް ނިޔާވުން: މި މައްސަލައިގައި ހައްޔަރުކުރި މީހާގެ ވަނަވަރު ހާމަކޮށްފި

ހުޅުމާލެ ސެންޓަރަލް ޕާކު ކައިރިން ހިނގި ނުރައްކާތެރި އެކްސިޑެންޓާ ގުޅިގެން ހައްޔަރުކުރި ޒުވާނާގެ ވަނަވަރު ހާމަކޮށްފިއެވެ.

މިއެކްސިޑެންޓުގެ ރިޕޯޓުކޮށްފައިވަނީ ބުރާސްފަތި ދުވަހުގެ ރޭ ދަންވަރު 2:48 ގައެވެ.

ހުކުރު ދުވަހު ފުލުހުން ބުނީ ހުޅުމާލެ ސެންޓަރަލް ޕާކު ކައިރިން ބާރު ސްޕީޑްގައި ދުއްވާފައި ދިޔަ ކާރެއްގައި ސައިކަލެއް ޖެހި އެކްސިޑެންޓްވި މައްސަލައާ ގުޅިގެން ހައްޔަރުކޮށްފައިވަނީ ވައިލެޓްފެހި، ސ.ހިތަދޫ 26 އަހަރުގެ މުހައްމަދު ވިސާމް ސިދުގީ ކަމަށެވެ.

މިއެކްސިޑެންޓު ހިނގާފައިވަނީ ބާރު ސްޕީޑްގައި ދުއްވާފައި ދިޔަ ރޭސިން ކާރަކުން ސައިކަލުގައި ޖެހުމުންނެވެ. ސައިކަލު ދުއްވަން އިން 23 އަހަރުގެ ހަސަން ސަމާހު ވަނީ ހުޅުމާލެ ހޮސްޕިޓަލުގައި ފަރުވާ ދެމުންދަނިކޮށް ނިޔާވެފައެވެ. އޭނާގެ މޫނަށާއި، ބޮލަށް ވަރަށް ބޮޑަށް އަނިޔާވެފައިވާ ކަމަށް މައުލޫމާތު ލިބެއެވެ.

މިއެކްސިޑެންޓް ފުލުހުން ދަނީ އިތުރަށް ތަހުގީގު ކުރަމުންނެވެ.