މޮޅު ކީޕަރުގެ ނޮމިނޭޝަން އިއުލާން ކޮށްފި
5 ސެޕްޓެމްބަރު 2024 | ބުރާސްފަތި 06:44އެންމެ ފަހުން މިދިޔަ އަހަރު އޮތް ބެލެންޑިއޯ އެވޯޑު ޙަފްލާގައި އެންމެ މޮޅު ކީޕަރުގެ އެވޯޑު ހޯދީ އާޖެންޓީނާގެ މާޓިނޭޒް އެވެ.
މިދިޔަ އަހަރުގެ އެންމެ މޮޅު ގޯލް ކީޕަރަކަށް ހޮވުނު އާޖެންޓީނާގެ މާޓިނޭޒް
ފްރާންސް ފުޓުބޯޅަ އިން ދުނިޔޭގެ އެންމެ މޮޅު ގޯލު ކީޕަރަށް ދެމުން އަންނަ ޔަޝިން އެވޯޑަށް ވާދަ ކުރާ ކީޕަރުންގެ ނަންތައް އިއުލާން ކޮށްފި އެވެ.
އެންމެ މޮޅު ގޯލު ކީޕަރުގެ އެވޯޑަށް ވާދަކުރަނީ 10 ކީޕަރުންނެވެ. އެއީ ޑިއޭގޯ ކޮސްޓާ، ޖިއާންލުއީޖޯ ޑޮންނަރުންމާ، ގްރެގޯ ކޮބެލް، އަންދެރޭ ލުނިން، މައިކް މައިގްނަން، ޖޯޖީ މަމާޑަޗްވިލީ، އެމިލިއާނޯ މާޓިނޭޒް، އުނާއި ސިމޮން، ޔަން ސޮމާ އަދި ރޮންވެލް ވިލިއަމްސް އެވެ. މީގެ ތެރެއިން އާޖެންޓީނާގެ ކީޕަރު މާޓިނޭޒް ވަނީ، އެންމެ މޮޅު ފުޓުބޯޅަ ކުޅުންތެރިޔާ އަށްދޭ ބެލެންޑިއޯގެ 30 ކުޅުންތެރިންގެ ނޮމިނޭޝަންގެ ތެރޭގައި ވެސް ހިމެނިފަ އެވެ.
މީގެ ތެރެއިން ކޮސްޓާ ވަނީ މިއަހަރު ޖަރުމަނުގައި އޮތް ޔޫރޯ ފުޓުބޯޅަ މުބާރާތުގައި ޕޯޗުގަލްގައި މޮޅު ކުޅުމެއް ދައްކައިފަ އެވެ. މާޓިނޭޒް ވަނީ މިއަހަރުގެ ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް (ކޮޕާ އެމެރިކާ) އާޖެންޓީނާ އާއެކު ކާމިޔާބު ކޮށްފަ އެވެ. އާޖެންޓީނާ އިން އެ މުބާރާތް ކާމިޔާބު ކުރުމުގަައި އޭނާ މުހިންމު ދައުރެއް އަދާ ކުރިއިރު، އެ މުބާރާތުގެ މޮޅު ކީޕަރަށް ހޮވުނީ ވެސް އޭނާ އެވެ. ސިމޮން ވަނީ ޖަރުމަނުގައި ކުރިއަށް ދިޔަ ޔޫރޯ ފުޓުބޯޅަ މުބާރާތް ސްޕެއިން އާއެކު ކާމިޔާބު ކޮށްފަ އެވެ.
އެންމެ ފަހުން މިދިޔަ އަހަރު އޮތް ބެލެންޑިއޯ އެވޯޑު ޙަފްލާގައި އެންމެ މޮޅު ކީޕަރުގެ އެވޯޑު ހޯދީ އާޖެންޓީނާގެ މާޓިނޭޒް އެވެ.
