ސްޕެއިންގެ ބާސެލޯނާ އަށް ކުޅެމުން އަންނަ ޕޮލެންޑުގެ ފޯވާޑް ރޮބާޓް ލެވަންޑޯސްކީ އަށް، އެ ކުލަބުގެ ރައީސް ޖޯން ލަޕޯޓާ ތައުރީފު ކުރައްވައި، ޝުކުރު އަދާ ކުރައްވައިފި އެވެ.
ޖަރުމަނުގެ ބަޔާން މިއުނިކް ދޫކޮށްލުމަށްފަހު ލެވަންޑޯސްކީ ބާސެލޯނާ އަށް ބަދަލުވީ 2022 ވަނަ އަހަރު އެވެ. އެ ކުލަބާ އެކު އޭނާ ސޮއި ކުރީ ހަތަރު އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. ބާސެލޯނާ އަށް ބަދަލުވީ ފަހުން، ލެވަންޑޯސްކީ އަންނަނީ އެ ކުލަބުގައި މޮޅު ކުޅުމެއް ވެސް ދައްކަމުންނެވެ.
ބާސެލޯނާގެ ރައީސް ލަޕޯޓާ ވިދާޅުވީ، ލެވަންޑޯސްކީ އަކީ އޭނާ ޚާއްސަ ގޮތެއްގައި ފާހަގަ ކުރަން ބޭނުންވާ ކުޅުންތެރިޔެއް ކަމަށެވެ. ޚާއްސަކޮށް ލެވަންޑޯސްކީ އަކީ ކުލަބަށްޓަކައި މަސައްކަތް ކުރާ، ކުލަބު ދެކެ އިންތިހާ އަށް ލޯބިވާ ކުޅުންތެރިޔެއް ކަމަށް ވެސް ލަޕޯޓާ ވަނީ ވިދާޅުވެފަ އެވެ.
މީގެ އިތުރުން ލަޕޯޓާ ވިދާޅުވީ، ކުޅުންތެރިން ރަޖިސްޓްރީ ކުރުމުގައި ބާސެލޯނާ އަށް ކޮންމެ ވެސް ވަރެއްގެ ދައްޗަކާ ކުރިމަތިލާން ޖެހުނުކަން ފާހަގަކޮށް ލަޕޯޓާ ވިދާޅުވީ، އެކަމުގައި ވެސް ލެވަންޑޯސްކީ ހުރީ ކުލަބަށް އެހީވާން ތައްޔާރަށް ކަމަށެވެ. އެގޮތުން އެ ޙާލަތުގައި ވެސް ބާސެލޯނާ އަށް އެހީވުމަށް ބައެއް ކަންކަން ދޫކޮށްލަން ލެވަންޑޯސްކީ ބުނެފައިވާ ކަމަށް ވެސް ލަޕޯޓާ ވަނީ ވިދާޅުވެފަ އެވެ.
ބާސެލޯނާގައި މިހާރު ލެވަންޑޯސްކީ ހޭދަކުރަމުން އަންނަނީ ތިން ވަނަ ސީޒަނެވެ. އޭނާ ވަނީ މިހާތަނަށް ބާސެލޯނާ އަށް ކުޅެދިން 99 މެޗުގައި 53 ލަނޑު ޖަހައިފަ އެވެ. އޭނާ އަކީ ބާސެލޯނާގައި މިވަގުތު ހުރި އެންމެ މުހިންމު އެއް ކުޅުންތެރިޔާ އެވެ. ޚާއްސަކޮށް އައު ކޯޗު ހަންސީ ފްލިކް އެންމެ އިތުބާރު ކުރާ އެއް ކުޅުންތެރިޔަކީ ވެސް އޭނާ އެވެ.
