މިއީ އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި ރާއްޖެ ޓީވީގެ ނޫސްވެރިޔާ ޝައިހާން ޒަރީރުގެ ސުވާލަށް ޖަވާބުދެއްވަމުން އިކޮނޮމިކް މިނިސްޓަރ މުހައްމަދު ސައީދު ވިދާޅުވި ވާހަކަފުޅެކެވެ. އަންގާރަ ދުވަހު ފޮރިން އިންވެސްޓްމެންޓްގެ ޤާނޫނު ވުޖޫދުވުމާއި އެކު ފޮރިން އިންވެސްޓަރުންގެ ފެހި ސިގްނަލް ލިބިފަވޭތޯ ކުރި ސުވާލަށް މުޅި ޕްރެސް ނިމުނު އިރުވެސް ސީދާ ޖަވާބެއް ވަޒީރަށް ނުދެއްވުނެވެ. ސައީދު ވިދާޅުވީ މި ސަރުކާރަކީ ކުލަ ކުލައިގެ ސިގުނަލް ދޭ ސަރުކާރެއް ނޫން ކަމަށެވެ. ޖަވާބުދެއްވީ ރުންކުރު ގޮތަކަށެވެ. ނިކަން ބޮޑަށް ގޯސް ޖަވާބެއް ދެއްވިދާނެތީ ބިރުފުޅުން އުޅުއްވި ކަހަލައެވެ. ސުވާލާ މާ ދުރުން އެހެން ވާހަތަކެއް ދެއްކެވި ނަމަވެސް ހީވީ "ފެހި ސިގްނަލް" އޭ ބުނުމުން ވަރަށް ބޮޑަށް ވަޒީރު ޓްރިގަރވެވަޑައިގަތް ހެންނެވެ. ކުޑަކޮށް ހަމަޖެހިލާފައި ވިސްނާލުމުން އަޅުގަނޑު ހިތަށް އެރިއެވެ. އެހެން ނުވާންވީ ސަބަބެއް ނެތްތާއެވެ.

މި ވާހަކަ ސާފުކޮށްދޭނަމެވެ. ފަށާނީ ތަންކޮޅެއް ދުރުންނެވެ. ރިޔާސީ ކެމްޕެއިންގެ ދުވަސްވަރު ސެޕްޓެމްބަރު 16 ވަނަ ދުވަހު މިހާރުގެ ރައީސް ޑރ.މުހައްމަދު މުއިއްޒު ދެއްކެވި ވާހަކަފުޅަކަށް ބަލާލާނަމެވެ. މި ސަރުކާރުން ނަގާފައިވާ ލޯނުތައް އަނބުރާ ދެއްކުމަށް އެކުވެރި ބައެއް ގައުމުތަކުން މިހާރު ވެސް ފެހި ސިގްނަލް ލިބިފައިވާ ކަމަށް ޕީއެންސީގެ ރިޔާސީ ކެންޑިޑޭޓްގެ ގޮތުގައި ހުންނަވާ އޭރު މުއިއްޒު ވަނީ ވިދާޅުވެފައެވެ. ހދ. ކުރިނބީ ރައްޔިތުންނާ ބައްދަލުކުރައްވާ ނިކަން ޔަގީންކަމާއި އެކުމުއިއްޒު ވިދާޅުވީ ދައުލަތުގެ ކަންކަން ކުރެވޭ ވަރަށް ދައުލަތަށް ފައިސާ ވަންނަމުން ދާކަމުގެ ވާހަކައެވެ. އެ ދުވަހު ދެއްވި ފެހި ސިގްނަލް އަކީ އެއީއވެެ. އަދި އެވަރަކުން ނިންމާލެއްވީކީ ނޫނެވެ. ދައުލަތަށް ފައިސާ ލިބުން ކަމުގައި ވިޔަސް ކަންކަން ނުކުރެވި ދަނީ އެ ފައިސާ މިސް މެނޭންޖް ކުރާތީ ކަމަށް އޭރު މުއިއްޒު ވިދާޅުވިއެވެ. ދެން ދެއްވި ފެހި ސިގްނަލް އަކީ ޕީޕީއެމް/ ޕީއެންސީގެ ވެރިކަމެއްގައި މުޅި އިގްތިސާދު ނަގާ ކޮޅަށް ޖަހާނެ ކަމުގެ ފެހި ސިގްލްއެވެ.

އެއީ އެދުވަހެވެ. މިއަދު އެ ވާހަކަ އަށް އަހަރެއްވާން ކައިރިވެރިވެފަވާއިރު ލޯނުދެއްކުމަށް ފައިސާ ދިން ގައުމެއް އަދި ދޭނެ ކަމަށް ބުނި ގައުމެއްގެ ނަން ވެސް ސަރުކާރަށް ކުޑަ މިނުން ހާމަކުރެވިފައެއް ނެތެވެ. އެއްކަލަ ވިދާޅުވި ފެހި ސިގްނަލް ވީ އަވާމެންދުރަކަށެވެ. އަދި ނަގާކޮޅަށް ޖަހާނެ ކަމަށް ވިދާޅުވި އިގްތިޞާދުގެ ޒިންމާ ނުނެގި މިއަދާއި ޖެހެންދެން ގޮވަނީ "ކުރީ ސަރުކާރު، ކުރީ ސަރުކާރު" މޮ ފަތިވަރެވެ. މިސް މެނޭޖް ނުކުރާ ނަމަ އިގްތިސާދު ހިންގޭނެ ކަމަށް ވިދާޅުވެ ދެއްކެވި ހުވަފެން ވީ ބިލާހަކަށެވެ. އެ ސިގްނަލް ވެސް ވީ ހަމަ ތޯތޯ ވާހަކައަކަށެވެ. އެ ދުވަހު ދެއްވި ސިގްނަލް އަކީ ފެހި ސިންގަލް ކަމަށް ވިޔަސް ސައީދު އެ ވިދާޅުވާ މޭރުމުން އެ ސިގްނަލް އިގްތިސާދީ ގޮތުންވީ ރަތް ސިގްނަލްއަކަށެވެ. އެ ސިގްނަލްގެ ސަބަބުން ކުށްވެރިވީ ރީނދޫ ލަޝްކަރު އެމްޑީޕީއެވެ. އެހެންވީމަ އެ ވިދާޅުވާހެން ފެހި ސިގްނަލް އަށް ވީ ގޮތެއް ހަމަ ނޭނގުނެވެ.

އޭގެ ފަހުން އެއްވެސް ސިފައެއްގައި އިންޑިއާ ސިފައިންގެ އެއްވެސް ބަޔަކު ނުތިބޭނެ ކަމުގެ ފެހި ސިގްނަލް ދެއްވިއެވެ. ބަދަލުވީ ޔުނިފޯމެވެ. އެ ސިގްނަލް ވެސް ވީ މޮޅު ސިޔާސީ އުކުޅަކަށެވެ. އެ ވާހަކަ މާ ދިގުކޮށް ދައްކާކަށް ނެތީމެވެ. އޭގެ ފަހުން ސަރުކާރުން ދިން ސިގްނަލްތަކަށް ވީ ގޮތަށް ބަލާލަމާތޯއެވެ. ޗައިނާ އާއި އިންޑިއާ އަށް ކައިރި މުސްތަގުބަލެއްގައި ދައްކަންޖެހޭ ލޯނުތައް އަނބުރާ ދެއްކުން ފަސްކުރުމުގެ އިތުރުން، ބޭރުގެ ބައެއް ގައުމުތަކުން މާލީ އެހީތެރިކަން ލިބޭނެ ކަމުގެ ފެހި ސިގްނަލްތައް ލިބިފައިވާ ކަމަށް ފޮރިން މިނިސްޓަރު މޫސާ ޒަމީރު ވިދާޅުވިތާ މިހާރު މަހެއްހާ ދުވަސް ވަނީއެވެ. ވަޒީރުން ފުރަފުރައިގެން، ވައުފުދު ވަފުދުގައި ބޭރު ޤައުމުތަކަށް ގޮސް ލައްކަ ސައްލާތައް އެބަ ކުރެއެވެެ. އެހެނަސް އެ ވިދާޅުވާ އެހީތަކެއް ލިބޭތަން އަދި ފެނުނިއްޔާ ހަމަ ހަރާމެވެ. ފެހި ސިގްނަލްގެ ހިޔަލުގައި ތިއްބާ ގައުމުގެ ދަރަނި އަރަނިކުރުން ތަކުލީފަކަށްވެ ސަރުކާރު ނޭވާހޮޅިއަށް އެޅެނީއެވެ. އެހެންވީމަ ދެން ސިގްނަލް ދެއްވާފަ އެ ވާހަކަ ދެކޮޅު ނުޖެހުމަށް ވުރެ ބުއްދިވެރީ އެކަން ނުކުރުން ނޫންތޯއެވެ.