އަތުހަރުގެ ހައްޔަރާއި މަރުވި ގޮތާއި ބެހޭގޮތުން އިންސާފުވެރި އަދި މިނިވަން ތަހުގީގެއް ކުރުމަށް ޓްރާންޕޭރެންސީން ގޮވާލައިފި
3 ސެޕްޓެމްބަރު 2024 | އަންގާރަ 01:40ފުރިހަމަ އަދި ހާމަކަން ބޮޑުގޮތެއްގައި ތަހުގީގުކުރުމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސްއަށާއި ނެޝަނަލް އިންޓަގްރިޓީ ކޮމިޝަނަށް ގޮވާލާފައިވޭ
އަތުހަރުގެ މަރުގެ މައްސަލަ ރަނގަޅަށް ބެލުމަށް ޓްރާންސްޕޭރެންސީން ވަނީ ގޮވާލާފައި
ފުލުހުންގެ ހިދުމަތުގެ ބެލުމުގެ ދަށުގައި ހައްޔަރުކޮށްފައިވަނިކޮށް ނިޔާވެފައިވާ އާދަމް އަތުހަރުގެ ހައްޔަރާއި މަރުވި ގޮތާއި ބެހޭގޮތުން އިންސާފުވެރި އަދި މިނިވަން ތަހުގީގެއް ކުރުމަށް ޓްރާންސްޕޭރެންސީ މޯލްޑިވްސް އިން ގޮވާލައިފިއެވެ.
އެ ޖަމިއްޔާއިން ނެރުނު ނޫސްބަޔާނުގައި ބުނެފައިވަނީ ފުލުހުންގެ ހިދުމަތުގެ ތަހުގީގަކާއި ގުޅިގެން ފުލުހުންގެ ބަންދުގައި ހުއްޓާ އާދަމް އަތުހަރުގެ ހާލުދެރަވެ، އިންދިރާ ގާންދީ މެމޯރިއަލް ހޮސްޕިޓަލުގައި ފަރުވާދެމުން ދަނިކޮށް ނިޔާވުމާއި އަދި މި މައްސަލަގައި ސީންއަށް އެޓެންޑްކުރި ގޮތާއި މި ހިސާބަށް މި މައްސަލަ ދާން މަގުފަހިވި ސަބަބުތަކާއި ގުޅޭގޮތުން މި ޖަމްއިއްޔާތަކުން ކަންބޮޑުވުން ފާޅުކުރާ ކަމަށެވެ.
އަތުހަރުގެ ހައްޔަރާއި އަދި މަރުވުމަށް ދިމާވި ހާލަތުތައް މިނިވަންކަމާއި، އިންސާވުވެރިކަމާއި، ފުރިހަމަ އަދި ހާމަކަން ބޮޑުގޮތެއްގައި ތަހުގީގުކުރުމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސްއަށާއި ނެޝަނަލް އިންޓަގްރިޓީ ކޮމިޝަން އަދި ކަމާއި ގުޅުން ހުރި އެންމެހާ ދައުލަތުގެ މުއައްސަސާތަކަށް ގޮވާލާފައިވެއެވެ.
އަދި ވަކިން ހާއްސަކޮށް، އަތުހަރު ހައްޔަރުކުރެވުނުއިރު ބާރުގެ ބޭނުން ކުރެވުނު ގޮތާއި، އަދި މަރްހޫމްގެ ސިއްހީ ހާލަތަށް ބަލާ ރިމާންޑްގައި ބަންދުކުރުމަށް ނިންމުނު ސަބަބުތައް ބެލުމަކީ ކޮންމެހެން މުހިންމުކަންކަން ކަމުގައި ގަބޫލުކުރާ ކަމަށް ބަޔާނުގައި ބުނެފައިވެއެވެ. އަދި މި ތަހުގީގުތައް ކުރުމުގައި އާއިލާއަށް ފުރިހަމަ މައުލޫމާތު ފޯރުކޮށްދިނުމާށާއި، އާއިލާއަށް އިހުތިރާމް ކުރެވޭ ފަދަ ގޮތަކަށް ތަހުގީގުތައް ގެންދިޔުމަށް ވެސް އެންމެހާ މުއައްސަސާތަކަށް ގޮވާލާފައިވެއެވެ.
ބަންދުގައި ބައިތިއްބާ ފަރާތްތަކުގެ ރައްކާތެރިކަމާއި ދުޅަހެޔޮކަން ކަށަވަރުކުރުމަކީ ދައުލަތުގެ ޒިންމާއެއް ކަމަށްވާއިރު، މީގެ އިތުރުންވެސް އިސްލާހީ ބަދަލުތައް އަވަހަށް ގެނައުމަށް ގޮވާލާފައިވެއެވެ.
އަތުހަރު މަރުވެފައިވަނީ ދޫނިދޫގައި ފުލުހުންގެ ބެލުމުގެ ދަށުގައި ހުއްޓާ ދިމާވި ހާދިސާއަކާއި ގުޅިގެން އައިޖީއެމްއެޗްއަށް ގެނެސް ފަރުވާދެމުން ދަނިކޮށް ކަމަށް ފުލުހުން ބުނެއެވެ.
