އަތުހަރުގެ މަރު: ގޮޅީގެ ސީސީޓީވީ ފުޓޭޖް ދައްކައިފި، ފުލުހުން އެޓެންޑްވާން 30 މިނެޓް ނެގި

އަންހެނަކު ރަހީނުކުރި މައްސަލައިގައި ފުލުހުން ހައްޔަރުކުރި އާދަމް އަތުހަރު ބަންދުކޮށްފައި ހުރި ގޮޅީ ތެރޭގައި އޭނާގެ އެންމެ ފަހުގެ ހަރަކާތްތައް ފެންނަ ވީޑިއޯ އެއް ފުލުހުން މީޑިއާތަކަށް ދައްކައިފިއެވެ.

ދޫނިދޫ ޖަލުގައި ފުލުހުންގެ ބެލުމުގެ ދަށުގައި ހުއްޓާ އަތުހަރު މަރުވި މައްސަލައާއި ގުޅިގެން އުފައްދަމުން އަންނަ ސުވާލުތަކާއި ގުޅިގެން ފުލުހުން ވަނީ ހޯމަ ދުވަހުގެ ރޭ ނޫސްވެރިންނާއި ބައްދަލުކޮށްފައެވެ. ރެކޯޑް ކުރެވޭނެ އެއްވެސް އިލެކްޓްރޯނިކް ވަސީލަތެއް ވެއްދުމަށް ހުއްދަ ނޫސްވެރިންނަށް ނުދީ، ހޯމް މިނިސްޓަރު އަލީ އިހުސާން އިސްވެ ހުންނަވާ ބޭއްވި ބައްދަލުވުމުގައި 2 ވީޑިއޯއެއް ދައްކާފައިވެއެވެ.

އެއް ވީޑިއޯ އަކީ ސޯޝަލް މީޑިއާގައި ދައުރުވަމުން އަންނަ ވީޑިއޯއެކެވެ. އަނެއް ވީޑިއޯއަކީ އޭނާ ހުރި ޖަލު ގޮޅީގެ ސީސީޓީވީ ފުޓޭޖެވެ.

ތިރީގައި މިވަނީ އެ ފުޓޭޖުން ފާހަގަވާ މުހިންމު ކަންކަމާ އެކަންކަން ހިނގިކަމަށް ފެންނަ ގަޑިތަކެވެ.

6:30 - އަތުހަރު އެނދުމަތީގައި އިށީންދެގެން (ސީސީޓީ ކެމެރާއަށް ފުރަގަސް ދީގެން) އިންތަން ފެނޭ. އަދި ހަރަކާތްތަތަކެއް ކުރޭ (ސޯޓުގައި އިން ނާޑުވާ ނައްޓާ އެއިން ކަމެއްކުރާތަން)

6:30 - އަތުހަރު ތެދުވެގެން ތޭރި ޖަހާފައިވާ ގޮޅީގެ ކުޑަ ދޮރާ ދިމާލަށްދާތަން ފެނޭ

6:31 - ތޭރީގައި އެއްޗެއް އައްސާފައި (އަތުގައި އޮތް ނާޑުވާ) ދަމާތަން ފެނޭ

6:32 - ކަރުގައި ވާގަނޑު އަޅުވާފައި އޮތްތަން ފެނޭ

6:32 - މަޑު މަޑުން ކުޑަދޮރު ކައިރީގައި އިށީނދޭ

6:33 - އިށީނދެގެން އިނދެ ކަނާތު ފައި ކަކުލުން ލަންބުވާލާފައި ކޮންމެވެސް ވަރަކަށް އޭނާ ވާތްފަރާތަށް ޖެހިލާ،

6:33 - އިށީނދެ ތިރިވެލީމާ ވާގަނޑަށް ވާންވާތަން ފެނޭ

6:34 - ވާންވެފައިވާ ވާގަނޑާއެކު އޮށޯންނަ މަންޒަރު ފެނޭ އަދި ކޮންމެވެސް ވަރަކަށް މީހާ ތެޅޭތަން ފެނޭ

6:35 - ނޭވާ ނުލެވޭ ކަހަލަ ގޮތަކަށް ތެޅޭތަން ފެނޭ

6:36 - އޭނާގެ ހަރަކާތްތައް މަޑުވެ އިތުރު ހަރަކާތެއް ނުފެނޭ

6:35 - 7:02 ދޭތެރޭ އިތުރު އެއްވެސް ކަމެއް އެތަނުން ނުފެނޭ

7:02 - ތިން ފުލުހުން އައިސް ގޮޅީގެ ދޮރު ހުޅުވާ އޭނާ ކަރުގައި އިން ވާގަނޑު ނައްޓާލާ

އެތަނުން ދެ ފުލުހުން އޭނާ ނަގާ ބިންމަތީގައި ބާއްވާ އަދި އަނެއް ފުލުސް އޮފިސަރު ބޭރަށް ނުކުމެއް މެޑިކްސްއަށް ގޮވާ މަންޒަރު ފެނޭ

7:04 - ސްޓެރެޗަރ ގެނައުން

7:05 - ސްޓްރެޗަރ އަށް އަރުވައިގެން ގޮޅިން ބޭރަށް މެޑިކަލްސް އަށް ގެންދޭ

7:06 - ކަސްޓޯޑިއަލް ޑޮކްޓަރަށް ދައްކާފައި އޭނާ ވަގުތުން އައިޖީއެމްއެޗް އަށް ގެންދިއުމަށް އިރުޝާދު ދިން

7:14 - ދޫނިދޫއިން ފުލުހުންގެ ލޯންޗް މާލެ ދާން ނައްޓާލި

7:17 - މާލެއަށް ލޯންޗް ކައިރިކޮށްފައި އައިޖީއެމްއެޗް އެމްބިއުލާންސްއަށް އެރުވި

މިއީ އަތުހަރު ހުރި ގޮޅީގައި ހިނގައިދިޔަ ކަންތަކުގެ ފުލުހުން ދެއްކި ވީޑިއޯގެ ޓައިމްލައިނެވެ. ނަމަވެސް މިކަމާއި ގުޅޭ އިތުރު ތަފްސީލެއް ފުލުހުންވެސް އަދި ހޯމް މިނިސްޓަރުވެސް ނުދެއްވައެވެ. ހާދިސާ އާ ގުޅޭ ގޮތުން ހޯމް މިނިސްޓަރަށް ސުވާލެއް ކޮށްލުމުން 3 ތަނަކުން ކުރިއަށް ގެންދާ ތަހުގީގެއްގެ މަސައްކަތް ކުރިއަށްދާތީ އެ މައުލޫމާތު އަދި ދެވެން ނެތްކަމަށް ވިދާޅުވިއެވެ.

މީގެ އިތުރުން މި ބައްދަލުވުމަކީ ހަމައެކަނި އެ ވީޑިއޯ ނޫސްވެރިންނަށް ދައްކާލުމަށާއި ބައެއް ކަންކަމާއި ގުޅޭގޮތުން ވާހަކަ ދެއްކުމަށް ބޭއްވި ނުރަސްމީ ބައްދަލުވުމެއްކަމަށް މިނިސްޓަރު ވިދާޅުވިއެވެ.

ނޫސްވެރިން ކުރި ސުވާލުތަކުގެ ތެރެއިން އަތުހަރަކީ އަމިއްލައަށް އަނިޔާއެއް ދިފާނެފަދަ މީހަކަށް ވާތީ، ހާއްސަ ސަމާލުކަމެއް ދީފައި ނުވަނީ ކީއްވެގެންތޯ ދެންނެވުމުން ޖަވާބުގައި މިނިސްޓަރު ވިދާޅުވީ އަމިއްލަ ނަފްސަށް ގެއްލުންދީފާނެ ފަދަ މީހެއްނަމަ އެމީހަކު މޮނިޓަރކޮށް ބަލާނެ ސްޓޭންޑަރ އޮޕަރޭޝަން ޕްރޮސީޖަރ (އެސްއޯޕީ) ތަކެއް ހުންނަ ކަމަށާއި، ފުލުހުންގެ އެތެރޭގެ ތަހުގީގުން އެކަން އެނގިގެންދާނެ ކަމަށެވެ.

އަދި ތަހުގީގު ކުރިއަށްދާތީ އެކަމުގެ އިތުރު ތަފްސީލެއް ދެވެން ނެތް ކަމަށް މިނިސްޓަރ އިހްސާން ވިދާޅުވިއެވެ.

މީގެ އިތުރުން އަތުހަރަށް ފުލުހުން އަނިޔާކޮށް މަރާލިކަމަށް ދެކެވޭ ވާހަކަ ދޮގުކޮށް މިނިސްޓަރު ވަނީ ސީސީޓީ ފުޓޭޖް އަކީ އޭގެ ރޯ ފައިލް ކަމަށާއި، އެފަދަ ކަމެއް ނުފެންނަ ކަމަށް މިނިސްޓަރ ވިދާޅުވިއެވެ.