ކުލަބު މޯލްޑިވްސް ކިންގްސް ކަޕްގެ ފައިނަލްގައި ޖޯލި ބީންގެ މައްޗަށް ކުރި ހޯދައި، ކުލަބު ވެމްކޯ އިން ކިންގްސް ކަޕް ކާމިޔާބު ކޮށްފި އެވެ.

ކުލަބު މޯލްޑިވްސްގެ މިއަހަރުގެ މުބާރާތްތަށް ފެށުމުގެ ގޮތުން ކުޅުނު ކިންގްސް ކަޕްގެ ފައިނަލް މެޗު ކުލަބު ވެމްކޯ އިން ކާމިޔާބު ކުރީ 2-1 އިންނެވެ. މެޗުގައި ފުރަތަމަ ދެ ލަނޑު ޖެހީ ވެސް ކުލަބު ވެމްކޯ އިންނެވެ. ކުލަބު ވެމްކޯ އަކީ ކިންގްސް ކަޕް ކާމިޔާބު ކުރި ފުރަތަމަ ޓީމެވެ.

މެޗުގައި ވެމްކޯ އަށް ލީޑު ނަގައިދިނީ އެ ޓީމުގެ ކެޕްޓަން އަލީ ޝިޔާހު އެވެ. އެއީ އެ ޓީމަށް ލިބުނު ޕެނަލްޓީއެއް ކާމިޔާބުކޮށްގެން ޝިޔާހު ޖެހި ލަނޑެކެވެ. މެޗުގައި ވެމްކޯގެ ދެ ވަނަ ލަނޑު، ދެ ވަނަ ހާފުގައި ޖެހީ އަޙުމަދު ވިޖުދާން އެވެ. ވެމްކޯ އިން ދެ ލަނޑު ޖަހާފައި ވަނިކޮށް، ޖޯލި ބީންގެ ހަމައެކަނި ލަނޑު ޖެހީ އަލީ އިޝާމް އެވެ.

ފައިނަލް މެޗަށްފަހު ކިންގްސް ކަޕްގެ ޗެމްޕިއަން ކުލަބު ވެމްކޯ އަށް ޝީލްޑް ހަވާލުކޮށްދެއްވީ، މުބާރާތް ފެށުމުގެ ރަސްމިއްޔާތުގެ ޝަރަފުވެރި މެހުމާން ރައީސުލްޖުމްހޫރިއްޔާގެ ނައިބު އަލްއުސްތާޛް ޙުސެއިން މުޙައްމަދު ލަޠީފް (ސެމްބެ) އެވެ.