މާލެއަތޮޅު ހުވަފެންފުށި ރިސޯޓު ކައިރީ އޮންނަ ފިނޮޅަކަށް ދަތުރުދިޔަ ފިރިހެނަކު ގެއްލިގެން ހޯދަން ފަށައިފިއެވެ.

ގެއްލިގެން ހޯދަމުންދަނީ 43 އަހަރުގެ މ. އަސަރީހަނދާން، ތަސްލީމް މުޙައްމަދެވެ.

ހޮނިހިރު ދުވަހު ފުލުހުން ބުނީ ކ. ހުވަފެންފުށި ދެކުނުން ހިއްކާފައި އޮންނަ، ފަސްގަނޑަށް އޮގަސްޓު 30 ވަނަ ދުވަހު ދަތުރު ގޮސް އުޅުނު ތަސްލީމް ގެއްލިފައިވާ ކަމަށް ރިޕޯޓުކޮށްފައިވާތީ އޭނާ ހޯދުމުގެ މަސައްކަތް ކުރަމުންދާ ކަމަށެވެ. އަދި އޭނާ އެންމެފަހުން ފެނިފައި ވަނީ ހުކުރު ދުވަހުގެ ހެނދުނު 10:00 އާއި 11:00 ހާއިރު ކަމަށް އޭނާއާއެކު ދަތުރުދިޔަ މީހުން މައުލޫމާތުދީފައިވާ ކަމަށް ފުލުހުން ބުނެއެވެ.

މައުލޫމާތު ލިބިފައިވާ ގޮތުގައި ތަސްލީމް ހޯދުމަށް މިހާރު އެ ސަރަހައްދުގައި ސިފައިން ވެސް ދަނީ ހަރަކާތްތެރިވަމުންނެވެ.

ތަސްލީމް ފިނޮޅަށް ދަތުރު ދިޔައީ ރައްޓެހިންނާއެކުއެވެ.