ރާއްޖެއަކީ ފުރިހަމަ ޑިމޮކްރަސީ ގައުމެއް
ރައީސުލްޖުމްހޫރިއްޔާ ޑރ.މުހައްމަދު މުއިއްޒު
ރައީސުލްޖުމްހޫރިއްޔާ ޑރ.މުހައްމަދު މުއިއްޒަށް މިގައުމުގައި ކަމެއް ހިނގާކަން އެނގިވަޑައިގަންނަވާނީ 7 ނުވަތަ 8 ގަޑިއިރު ފަހުން ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.
ބުރާސްފަތި ދުވަހުގެ ރޭ ޕީއެންއެފްއިން ކުރިއަށް ގެންދިޔަ ޖަލްސާގެ އޯޑިއަންސްގައި އިންނަވައި ޔާމީން ވިދާޅުވީ ރުފިޔާ ކާޑަށް ޑޮލަރު ނުލިބޭ ގޮތައް ބޭންކް އޮފް މޯލްޑިވްސް އިން ނިންމައި ބަގާވާތެއްގެ ގޮތުގައި ސިފަކޮށް އެމައްސަލަ ތަހުގީގު ކުރަން ފެށުމުން އެކަމާ ގުޅިގެން ރައްޔިތުން ހިޔާލުފާޅުކުރާނެ ކަމަށެވެ. އަދި އެމީހަކަށް ފެންނަ ހިޔާލެއް ފާޅުކުރުމަކީ މައްސަލައެއް ނޫން ކަމަށް އެމަނިކުފާނު ވިދާޅުވިއެވެ.
މާލީ ބަގަވާތެއް ކުރަން އުޅުނު ކަމަށް ބުނެ މައްސަލަ ތަހުގީގު ކުރަމުންދާތީ، އެމައްސަލައާ ގުޅުވައި ކޮމިޝަނަރ އޮފް ޕޮލިސްގެ އިސްތިއުފާ އަށް ގޮވުމަކީ ވަރަށް ޣައިރުޒިންމާދާރު އަމަލެއް ކަަމަށް ހޯމް މިނިސްޓަރު އަލީ އިހުސާން ވިދާޅުވެފައިވާތީ އެކަމަށް ރައްދު ދެއްވައި ޔާމީން ވިދާޅުވީ ރާއްޖެއަކީ ފުރިހަމަ ޑިމޮކްރަސީ ގައުމެއް ކަމަށެވެ. އަދި އިސްތިއުފާއަށް ގޮވުން ނާތަހުޒީބުވާ ކަމަށްވާނަމަ ތަހުޒީބީ ކޮންކަމެއްތޯ ޔާމީން ވަނީ ސުވާލު އުފައްދަވާފައެވެ.
މީގެ އިތުރުން ޔާމީން ވިދާޅުވީ މިގައުމުގައި ކަމެއް ހިނގާކަން ރައީސް މުއިއްޒަށް އެނގިވަޑައިގަންނަވާނީ 7 ނުވަތަ 8 ގަޑިއިރު ފަހުން ކަމަށެވެ.
25 އޯގަސްޓް 2024ގައި ބީއެމްއެލް އިން އެ ބޭންކުގެ ރުފިޔާ އެކައުންޓުތަކުން ޑޮލަރު ބޭނުންނުކުރެވޭ ގޮތަށް އަދި ކްރެޑިޓް ކާޑުތަަކަށް ލިބޭ ޑޮލަރުގެ ލިމިޓް 100 ޑޮލަރަށް ދަށްކުރުމަށް ނިންމި ނިންމުމާއެކު އެއީ މާލީ ބަގާވާތެއް ކަމަށް ސިފަކޮށް، އެމައްސަލަ ފުލުހުން ވަނީ ތަހުގީގު ކުރަން ފަށާފައެވެ.
މި މައްސަލައާ ގުޅިގެން 28 އޯގަސްޓް 2024 ގައި އެމްޑީޕީން ބޭއްވި ނޫސްވެރިންގެ ބައްދަލުވުމުގައި އެމްޑީޕީގެ ޗެއާޕާސަން ފައްޔާޒް އިސްމާއިލް ވިދާޅުވީ ރައީސް މުއިއްޒު މުއިއްޒު ވިދާޅުވުމުން ތަނެއް ދޮރެއް ބަލާނުލާ ފުލުހުން ކަންތައްކުރާތަން ފެނިގެންދާތީ ކޮމިޝަނާ އޮފް ޕޮލިސް އަލީ ޝުޖާއު އިސްތިއުފާ ދެއްވަންޖެހޭ ކަމަށެވެ.
އިސްތިއުފާ ގޮވާލާފައިވާތީ، ހޯމް މިނިސްޓަރު އިހުސާން ވިދާޅުވީ ފުލުހުންގެ ޚިދުމަތުން ކުރާ ތަހުގީގަކާ ގުޅިގެން ކޮމިޝަނަރ އޮފް ޕޮލިސްގެ އިސްތިއުފާ އަށް ގޮވުމަކީ ވަރަށް ޣައިރުޒިންމާދާރު އަމަލެއް ކަަމަށާއި، ފުލުހުން ތަހުގީގެއް ފެށުމަކީ ބަޔަކު މީހުން ކަންބޮޑުވާންޖެހޭ ކަމެއް ނޫން ކަމަށެވެ. އަދި ތަހުގީގެއް ފަށަނީ ބަޔަކު ކުށްވެރިވެގެން ނޫން ކަމަށާއި ތަހުގީގެއް ކުރިޔަސް އޭގެން އެއްވެސް މީހަކަށް ގެއްލުމެއް ނުވާނެ ކަމަށް މިނިސްޓަރު އިހުސާން ވިދާޅުވިއެވެ.
