ރެއާލް ސޮސިއެޑާޑަށް ކުޅެމުން އައި ސްޕެއިންގެ މިޑްފީލްޑަރު މިކޭލް މެރީނޯ، އާސެނަލަށް ސޮއި ކޮށްފި އެވެ.

އުމުރުން 28 އަހަރުގެ ކުޅުންތެރިޔާ ސޮސިއެޑާޑަށް ބަދަލުވީ 2018 ވަނަ އަހަރު އެވެ. ނިއުކާސަލް ޔުނައިޓެޑުގައި ހުރުމަށްފަހު، ސޮސިއެޑާޑަށް ބަދަލުވެ އެ ކުލަބާ އެކު އޭނާ ސޮއި ކުރި އެއްބަސްވުން ހަމަވާން އޮތީ އަންނަ އަހަރުގެ ޖޫން މަހުގެ ނިޔަލަށެވެ. ނަަމަވެސް، މެރީނޯގެ އެއްބަސްވުމުގައި ބާކީ އެއް އަހަރު އޮއްވައި، ސޮސިއެޑާޑުން ވަނީ އޭނާ އާސެނަލަށް ދޫކޮށްލަން އެއްބަސްވެފަ އެވެ. މެރީނޯ ހޯދުމަށް އާސެނަލް އިން ގާތް ގަނޑަކަށް 37 މިލިއަން ޔޫރޯ ވަނީ ޚަރަދު ކޮށްފަ އެވެ.

އާސެނަލާ އެކު މެރީނޯ އެއްބަސްވުމުގައި ސޮއި ކޮށްފައިވާއިރު، އާސެނަލް އިން ވަނީ އެކަން ރަސްމީކޮށް އިއުލާން ވެސް ކޮށްފަ އެވެ. އާސެނަލާ އެކު މެރީނޯ ސޮއި ކުރީ ހަތަރު އަހަރު ދުވަހުގެ އެއްބަސްްވުމެއްގަ އެވެ. އެހެންކަމުން، 2028 ވަނަ އަހަރުގެ ޖޫން މަހުގެ ނިޔަލަށް އޭނާ އެ ކުލަބުގައި ހުންނާނެ އެވެ. މިއީ އައު ސީޒަނާ ދިމާކޮށް އާސެނަލް އިން ހޯދި ތިން ވަނަ ކުޅުންތެރިޔާ އެވެ.

އޮސަސޫނާ އިން ސީނިއާ ކެރިއަރު ފެށި މެރީނޯ އަކީ ސްޕެއިން ޤައުމީ ޓީމަށް ވެސް ކުޅެމުން އަންނަ ކުޅުންތެރިޔެކެވެ. ސްޕެއިންގެ ޤައުމީ ޓީމުން އޭނާ އަށް ޖާގަ ލިބުނީ، 2020 ވަނަ އަހަރު އެވެ. އޭގެ ފަހުން އޭނާ ވަނީ ޤައުމީ ޓީމަށް ކުޅެދިން 28 މެޗުގައި ދެ ލަނޑު ޖަހައިފަ އެވެ. ޤައުމީ ޓީމާ އެކު މެރީނޯ ވަނީ މިއަހަރު ޖަރުމަނުގައި ކުރިއަށް ދިޔަ ޔޫރޯ ފުޓުބޯޅަ މުބާރާތް އަދި ޔުއެފާ ނޭޝަންސް ލީގު ކާމިޔާބު ކޮށްފަ އެވެ. އޭގެ އިތުރުން ޔުއެފާ ނޭޝަންސް ލީގުގެ ފައިނަލެއް ގައި ވެސް ވަނީ ކުޅެފަ އެވެ.