އެއް މިލިއަން މަސްދަޅު އަދިވެސް ސަރުކާރުން ފަލަސްތީނަށް ނުފޮނުވާ

ފަލަސްތީނުގެ ހާލުގައި ޖެހިފައިވާ ރައްޔިތުންނަށް ދިވެހިސަރުކާރުގެ ފަރާތުން އެ މިލިއަން ކަނޑު މަސްދަޅު ހަދިޔާކުރުމަށް ނިމިދިޔަ ސަރުކާރުގައި ނިންމާފައި އޮތްނަމަވެސް، އަދިވެސް އެ މަސްދަޅުތައް ހަވާލު ނުކުރެވޭކަމަށް ޚާރިޖީ ވުޒާރާއިން ބުނެފިއެވެ.

ފަލަސްތީނުގެ ރައްޔިތުންނަށް ދިވެހިސަރުކާރުން އެ މިލިއަން ކަނޑު މަސްދަޅު ހަދިޔާކުރުމަށް ކުރީގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ނިންމެވީ މިދިޔަ އަހަރުގެ އޮކްޓޯބަރު މަހުގެ 24 ވަނަ ދުވަހުއެވެ. އެއީ އޮކްޓޯބަރު މަހުގެ 7 ވަނަ ދުވަހުން ފެށިގެން އިޒްރޭލުން ދެމުންދިޔަ ވަރުގަދަ ޙަމަލާތަކުގައި ފަލަސްތީނުގެ ރައްޔިތުން ޙާލުގައި ޖެހެމުންދާތީ ދިވެހި ސަރުކާރުން އެކަމަށް އަވަސް އެހީއެއް ވުމުގެ ގޮތުންނެވެ.

ވެރިކަން ބަދަލުވެ މިހާރުގެ ރައީސް ޑރ މުޙައްމަދު މުއިއްޒު ހުވާ ކުރައްވާފައިވަނީ އެ މިލިއަން ކަނޑު މަސްދަޅު ހަދިޔާކުރުމަށް ބޭނުންވާ ފައިސާ މިފްކޯއަށް ދައްކައި، އެ ފޮނުވުމަށް ބޭނުންވާ ފްރައިޓް ޗާރޖުވެސް ދައްކައި، ފޮނުވުމުގެ މަރުޙަލާގައި ވަނިކޮށެވެ.

އޭގެ ފަހުން ރައްޔިތުންގެ މަޖިލިސް އިންތިޚާބާ ދިމާކޮށް އެ މަސްދަޅުތައް އިންތިޚާބުގެ ބޭނުމަށް ބަހާފައިވާކަމުގެ އަޑުތަކެއްވެސް ވަނީ ފެތުރިފައެވެ.

އޭގެ އިތުރުން، މިހާރު ވެރިކަމަށް 9 މަސް ވެގެންދާއިރު އަދިވެސް އެ އެހީ ފޮނުވިފައެއް ނުވެއެވެ. އެގޮތުން އެ އެހީ ފޮނުވާފައިވޭތޯ ރާއްޖެއެމްވީން ސުވާލު ކޮށްލުމުން ފޮރިން މިނިސްޓްރީން ފުރަތަމަ ބުނެފައިވަނީ އެ މައުލޫމާތު ޗެކްކޮށްލަން ޖެހޭ ކަމަށެވެ.

އެތައް ފަހަރަކު ރާއްޖެއެމްވީން އެކަމާ ގުޅި ފަހުން ބުދަ ދުވަހު ފޮރިން މިނިސްޓްރީން އެންމެ ފަހުން ވަނީ އެކަމާ ޖަވާބެއް ދީފައެވެ. އެގޮތުން ފޮރިން މިނިސްޓްރީން މައުލޫމާތު ދިން ފަރާތުން ވިދާޅުވީ، އެ އެހީ އަދިވެސް ފޮނުވިފައި ނުވާ ކަމަށާއި، އެހީ ފޮނުވިފައި ނުވަނީ ފަލަސްތީނަށް އެހީ ވެއްދުމުގައި ހުރަސްތަކެއް ހުރުމުން ކަމަށެވެ.

އަދި އެހީ ފަލަސްތީނުގެ ރައްޔިތުންނަށް ވީ އެންމެ އަވަހަކަށް ފޮނުވުމަށް ފަލަސްތީނުގެ ކަމާބެހޭ އިދާރާތަކާއެކު މަޝްވަރާކޮށް އެކަން ވިލަރެސް ކުރަމުންދާކަމަށްވެސް އޭނާ ވިދާޅުވިއެވެ.

ފޮރިން މިނިސްޓްރީން އެހެން ބުނެފައިވާއިރު، އާންމުކޮށް އެފަދަ އެހީ ދިނުމަށް ހަވާލުކުރަނީ ޔޫއެން އެޖެންސީ ފޮ ފެލަސްޓައިން ރެފިއުޖީ (އަންރާ) އާ އެވެ. އަންރާއާ އެ އެހީ ހަވާލުވުން ލަސްވާ ސަބަބު މުޅިން ސާފެއް ނޫނެވެ.

އެ އެހީ ދިނުން ލަސްވާތީ ރައްޔިތުންގެ މަޖިލީހުގެ ހާރިޖީ ގުޅުންތަކާ ބެހޭ ކޮމިޓީގައި 21 ފެބްރުއަރީގައި ބޭއްވި ބައްދަލުވުމުގައި އޭރު އެމްޑީޕީގެ މެމްބަރުން އެކަމުގެ ކަންބޮޑުވުން ފާޅު ކުރައްވާފައިވެއެވެ. އޭރު އެކަމާ ގުޅިގެން ޚާރިޖީ ވަޒީރު މޫސާ ޒަމީރު ވިދާޅުވީ، މިސްރުގެ ސަރުކާރާ ވާހަކަ ދައްކައިގެން ފަލަސްތީނު ރައްޔިތުންނާ ހަމައަށް މަސްދަޅުތައް ފޯރުކޮށްދިނުމަށް މަސައްކަތްތައް ފަށާފައިވާ ކަމަށާއި، ނަމަވެސް އެކަން އަދިވެސް ވެފައިނުވާ ކަމަށެވެ.

އޭގެ ފަހުންވެސް 6 މަސް ވެގެން ގޮސްފައިވާއިރު އަދިވެސް ސަރުކާރުން ދެނީ އެއް ޖަވާބެކެވެ.