2023 ވަނަ އަހަރުގެ ރިިޔާސީ އިންތިޚާބު ބަލައިނުގަނެ މަޖިލީސް މެދުވެރިކޮށް އުޅުނީ ބަޤާވާތް ކުރަން ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
19 ވަނަ މަޖިލީހުން ރިޔާސީ އިންތިޚާބުގެ ނަތީޖާ ބަލައިނުގަނެ ރައްޔިތުންގެ ޑިމޮކްރެޓިކް ނިންމުން ބޮލާލާޖަހަން މަސައްކަތް ކުރި ކަމަށް އެ މަނިކުފާނު ވިދާޅުވިއެވެ. އެއީ ދުނިޔޭގެ އެއްވެސް ޑިމޮކްރެޓިކް ނިޒާމެއްގައި، ޑިމޮކްރެޓިކް ޤައުމެއްގައި ޢަމަލުކުރަމުންދާ ގޮތެއް ނޫން ކަމަށް ރައީސް ވިދާޅުވިއެވެ. އެގޮތުން މަޖިލީހުގެ ގަވައިދަށް އިސްލާހުތައް ގެނެސް ސަރުކާރުގެ ހިންގުމަށް ދަތިކުރުމަށާއި ސަރުކާރަށް ޖެއްސުން ކުރުމަށް އޭރު މަޖިލީހުން ގިނަ މަސައްކަތްތަކެއް ކުރެއްވި ކަމަށް މުއިއްޒު ވަނީ ވިދާޅުވެފައެވެ. ރައީސް މުއިއްޒު ވިދާޅުވީ މަޖިލީހުން އޭރު މަސައްކަތް ކުރީ ގާނޫނީ ވެރިކަމެއް ގުޑުވާލުމަށްކަމަށް ކަމަށެވެ. އެކަން ކުރީ ފާޅުގައި ކަމަށާއި
މި ހުރިހާ މަސައްކަތެއް ފަހުން ކުރަމުން ދިޔައީ ފާޅުގައިކަމަށާއި، އެކަންކަމަށް ޕޯޑިއަމްތަކުގައި ހިތްވަރުދެމުން އައި ކަމަށް މުއިއްޒު ވިދާޅުވިއެވެ. އެކަން ކުރަން މަސައްކަތް ކުރީ ރައްޔިތުންގެ މަޖިލީހުގައި އޭރު ތިއްބެވީ ޕީއެންސީގެ މަދު މެމްބަރުންކަމަށް ވުމުން މަޖިލީހުގައި ޕީއެންސީގެ ބާރެއް ނޮއޮންނާނެ ކަމަށް ވިސްނައިގެން ކަމަށް ވެސް ރައީސް ވިދާޅުވިއެވެ. ނަމަވެސް އެކަން ނުވީ ޤައުމީ ވިސްނުމުގައި އެމްޑީޕީގެ މެމްބަރުން މަސައްކަތް ކުރެއްވުމުން ކަމަށް ރައީސް ވިދާޅުވިއެެވެ.
އޭރު އެމްޑީޕީގެ 14، 15 ވަރަކަށް މެމްބަރުން ގައުމީ ވިސްނުމުގައި އަޅުގަނޑުމެންނާ ގުޅިވަޑައިގަތް. އެކަމަށްޓަކާ އަދިވެސް މިއަދު ވެސް އެ ބޭފުޅުންނަށް ޝުކުރުދަންނަވަން. އެކަން ކުރެއްވުމުން އެމްޑީޕީގެ ރޭވުން ކާމިޔާބު ނުވީ. ﷲ ގެ މަތިވެރި ރޭވުންތެރިކަން.. ދެން ރައްޔިތުން ނިންމީ، ދެނެއް އެކަމަށް ފުރުސަތެއް ނުދޭނަމޭ.ރައީސް ޑރ.މުހައްމަދު މުއިއްޒު
ރައީސް ވިދާޅުވީ އެމްޑީޕީ އަށް 20 ވަނަ މަޖިލީހުގެ މެޖޯރިޓީ ދޭން ރައްޔިތުން ދެކޮޅު ހެދީވެސް އެ ސަބަބާއި ހުރެ ކަމަށެވެ. އެމްޑީޕީ އަށް މަޖިލީހުގެ މެޖޯރިޓީ ލިބުނު ނަމަ ސަރުކާރު ނިމުމަކަށް ގެންނަން މަސައްކަތް ކުރާނެ ކަމަށް ރައީސް މުއިއްޒު ވިދާޅުވިއެވެ.
