ނެތް ބާރެއްގެ ބޭނުންކޮށްގެން ޕީސީބީން ބީއެމްއެލްގެ ބޯޑުން އައިޝަތު ނޫރައްދީން ވަކިކޮށްފި
24 އޯގަސްޓު 2024 | ހޮނިހިރު 13:39ބޭންކުގެ ބޯޑް ޑިރެކްޓަރުން ވަކިކުރެވެނީ ހިއްސާދާރުންގެ އާންމު ޖަލްސާއަކުން
އައިޝަތު ނޫރައްދީން
އުސޫލާއި ޚިލާފަށް ބީއެމްއެލްގެ ޑެޕިއުޓީ ސީއީއޯ އައިޝަތު ނޫރައްދީން އެ ބޭންކުގެ ބޯޑު މެންބަރުންކަމުން ވަކިކޮށްފިއެވެ.
42 އަހަރު ބީއެމްއެލްގައި ޚިދުމަޔް ކުރައްވާފައިވާ އައިޝަތު ނޫރައްދީން ބޭންކުގެ ބޯޑުން ވަކިކުރިކަން އޭނާއަށް އަންގާފައިވަނީ ހޮނިހިރު ދުވަހުގެ ވަގުތެއްގައެވެ.
އޭނާ ވަކިކުރިކަން އޭނާ އަށް އެންގީ ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑް (ޕީސީބީ)ންނެވެ.
އޭނާ ވަކިކުރި ކަމަށް ޕީސީބީން އެންގި ނަމަވެސް ބީއެމްއެލް އަކީ އާންމު ރައްޔިތުންގެ ހިއްސާ އޮންނަ ކުންފުންޏަކަށް ވާތީ އެ ބޭންކުގެ ބޯޑް ޑިރެކްޓަރުން ވަކިކުރެވެނީ ހިއްސާދާރުންގެ އާންމު ޖަލްސާއަކުންކަން ފާހަގަކޮށްލެވެއެވެ.
ނޫރައްދީން މަޤާމުން ވަކިކޮށްފައިވާ އިރު މި އަހަރުގެ ޖެނުއަރީގައި ވެސް ޕީސީބީން ވަނީ ބީއެމްއެލްގެ ފަސް ޑިރެކްޓަރަކު މަގާމުން ވަކިކުރައްވާފައެވެ. އޭރު ވެސް ޕީސީބީން އެ ބޭފުޅުން ވަކި ކުރީ ނެތް ބާރެއްގެ ބޭނުންކޮށްގެން ކަމަށް އާއްމުން ތުހުމަތުކުރަން ފެށުމުން އަލުން އެ 5 ބޭފުޅުން ބޯޑަށް އައްޔަންކުރިއެވެ. އޭގެ ފަހުން އެ ބޭފުޅުން ފަހުން ވަކިކޮށްފައި ވަނީ ހިއްސާދާރުންގެ އާންމު ޖަލްސާއަކުންނެވެ.
ބީއެމްއެލްގެ ޑިޕިއުޓީ ސީއީއޯ ބޯޑު މެމްބަރުކަމުން ވަކިކޮށްފައި މި ވަނީ ބީއެމްއެލްއަށް ޑޮލަރު ލިބޭވަރު މަދުވުމާއި އެކު ބޭންކުގެ ކާޑުތަކުން ބޭރުގައި ވިޔަފާރި ކުރުމުގެ ގޮތުން ދީފައިވާ ލިމިޓްތައް ކުޑަކުރަން މަޖުބޫރުވެފައިވާ ދަނޑިވަޅެއްގައެވެ.
