މެންޗެސްޓަރ ސިޓީގެ ކުރީގެ ކެޕްޓަން އިލްކާއީ ގުންޑޮގާން އަލުން އެ ކުލަބަށް ސޮއި ކުރުމާއެކު، "ކޮންމެ ކަމެއް ވެސް ވެދާނެ" ކަމަށް އެ ކުލަބުގެ ކޯޗު ޕެޕް ގާޑިއޯލާ ބުނެފި އެވެ.

ސިޓީ ދޫކޮށް މިދިޔަ ސީޒަންގައި ބާސެލޯނާ އަށް ބަދަލުވި ގުންޑޮގާން ވަނީ، ބާސެލޯނާގެ އެއްބަސްވުމުގައި ބާކީ އެއް އަހަރު އޮއްވާ އެ ކުލަބު ދޫކޮށްލައިފަ އެވެ. ދެ ވަނަ ފަހަރަށް އޭނާ ސިޓީ އަށް ބަދަލުވެފައިވާއިރު، އެ ކުލަބާ އެކު ވަނީ އެއް އަހަރު ދުވަހުގެ އެއްބަސްވުމެއްގައި ސޮއި ކޮށްފަ އެވެ.

އެކަމާ ގުޅިގެން ވާހަކަ ދައްކަމުން ގާޑިއޯލާ ބުނީ، ގުންޑޮގާން ސިޓީ އަށް އަލުން އައުމަކީ ކުރިން އުންމީދު ކުރި ކަމެއް ނޫން ކަމަށާއި، އެކަމުން ލިބުނީ ބޮޑު ހައިރާން ކަމެއް ކަމަށެވެ. އަލުން ގުންޑޮގާންގެ ސޮއި ހޯދުމުގެ ފުރުސަތު ލިބުމުން، ދެ ވަނަ ވިސްނުމަކަށް ދާން ވެސް ނުޖެހުނު ކަމަަށް ގާޑިއޯލާ ބުންޏެވެ.

މީގެ އިތުރުން ގާޑިއޯލާ ބުނީ ސިޓީގެ އެންމެން ވެސް ބޭނުންވީ ގުންޑޮގާން އަލުން އެ ކުލަބަށް އަންނަން ކަމަށެވެ. ގާޑިއޯލާ ފާހަގަ ކުރި ގޮތުގައި އޭނާ ހުރީ އެކަމަށް މާބޮޑަށް ބޭނުންވެފަ އެވެ. ގުންޑޮގާން އަލުން ސިޓީ އަށް އައުމަށް އިޝާރާތް ކުރަމުން ގާޑިއޯލާ ބުނީ، އަބަދު ވެސް ބުނާހެން ކޮންމެ ކަމެއް ވެސް ވެދާނެ ކަމަށެވެ.

މީގެ ކުރިން ސިޓީ ގައި ގުންޑޮގާން ހަތް ސީޒަން ހޭދަކޮށްފައިވާއިރު، އޭނާ ވަނީ އެ ކުލަބަށް ކުޅެދިން 304 މެޗުގައި 60 ލަނޑު ޖަހައިފަ އެވެ. އެ ކުލަބާ އެކު އޭނާ ވަނީ 14 ތައްޓެއް ކާމިޔާބު ކޮށްފަ އެވެ. ސިޓީގެ ކެޕްޓަންކަން ވެސް ކޮށްފައިވާ ގުންޑޮގާން ވަނީ ބާސެލޯނާ އަށް ބަދަލުވެ އެ ކުލަބަށް ކުޅެދިން 51 މެޗުގައި ފަސް ލަނޑު ޖަހައިފަ އެވެ.