ސްޕެއިންގެ މިޑްފީލްޑަރު ސާޖީ ރޮބާޓޯ، އިޓާލިއަން ލީގުގެ ކޯމޯ އަށް ބަދަލުވެއްޖެ އެވެ.

އުމުރުން 32 އަހަރުގެ ކުޅުންތެރިޔާ ކޯމޯ އަށް ބަދަލުވީ ހިލޭ އެއްބަސްވުމެއްގެ ދަށުންނެވެ. ރޮބާޓޯ އެންމެ ފަހުން ހުރީ ސްޕެއިންގެ ބާސެލޯނާގަ އެވެ. އެ ކުލަބާ އެކު ސޮއި ކޮށްފައިވާ އެއްބަސްވުން ހަމަވުމުން، އޭނާ ވަނީ އެއްބަސްވުން އައު ނުކޮށް ކުލަބު ދޫކޮށްލަން ނިންމައިފަ އެވެ.

ކޯމޯ އިން ވަނީ ރޮބާޓޯ އެ ކުލަބަށް ބަދަލުވެފައިވާކަން ހާމަކޮށްފަ އެވެ. އެގޮތުން އޭނާ ކޯމޯ އަށް ބަދަލުވީ ދެ އަހަރު ދުވަހުގެ އެއްބަސްވުމެއްގެ ދަށުންނެވެ. އެ އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. އެއްބަސްވުމުގައި ވާގޮތުން، ދެ އަހަރު ދުވަހުގެ އެއްބަސްވުން ހަމަވުމުން އިތުރު އެއް އަހަރަށް އެއްބަސްވުން އައު ކުރުމުގެ ފުރުސަތު ވެސް އޮންނާނެ އެވެ.

ކޯމޯ އަކީ ރޮބާޓޯގެ ސީނިއާ ކެރިއަރުގައި އޭނާ ކުޅޭނެ ދެ ވަނަ ކުލަބެވެ. ބާސެލޯނާ އިން ސީނިއާ ކެރިއަރު ފެށި ރޮބާޓޯ ވަނީ އެ ކުލަބަށް ކުޅެދިން 373 މެޗުގައި 19 ލަނޑު ޖަހައިފަ އެވެ. ބާސެލޯނާ އާއެކު އޭނާ ވަނީ 20 ތައްޓެއް ވެސް ކާމިޔާބު ކޮށްފަ އެވެ. ރޮބާޓޯ ވަނީ ބާސެލޯނާގެ ކެޕްޓަންކަން ވެސް ކޮށްފަ އެވެ.

ސްޕެއިންގެ ކުރީގެ ތަޖުރިބާކާރު މިޑްފީލްޑަރު ސެސް ފެބްރިގާޒް އިރުޝާދު ދެމުން އަންނަ ކޯމޯ އަކީ، 21 އަހަރަށް ފަހު އިޓާލިއަން ލީގަށް ޕްރޮމޯޓުވީ ކުލަބެކެވެ. އެ ކުލަބުގެ ކޯޗުކަމަށް ފެބްރިގާޒް ހަމަޖެއްސީ ވެސް މިދިޔަ ޖުލައި މަހުގެ ތެރޭގަ އެވެ. އޭގެ ކުރިން އޭނާ ވަނީ އެ ކުލަބުގެ ވަގުތީ ކޯޗުގެ ގޮތުގައި ވެސް މަސައްކަތް ކޮށްފަ އެވެ.