ތައުލީމީ ދާއިރާއަށް ޔުނިސެފުން ދިން 9.5 މިލިއަން ޑޮލަރުގެ އެހީއަކީ ކުރީ ސަރުކާރުން ހޯދާ ޔަގީންކޮށްފައިވާ ފައިސާކަން ހާމަވެއްޖެ

ތައުލީމީ ދާއިރާއަށް ޔުނިސެފުން ދިން 9.5 މިލިއަން ޑޮލަރުގެ އެހީއަކީ ކުރީ ސަރުކާރުން ހޯދާ ޔަގީންކޮށްފައިވާ ފައިސާކަން ހާމަވެއްޖެއެވެ.

މިކަން ހާމަކޮށްފައިވަނީ ގްލޯބަލް ޕާޓްނަރޝިޕް ފޮރ އެޑިޔުކޭޝަން (ޖ.ީޕ.ީއީ)ގެ 9.5 މިލިއަން އެމެރިކާ ޑޮލަރުގެ މާލީއެހީއާއެކ،ު ތައުލީމީ ދާއިރާއަށް އިންޤިލާބީ ބަދަލެއް ގެނެއުމަށް އެކުލަވާލާފައިވާ ޚާއްޞަ ޕްރޮޖެކްޓް "ތައިބަ"، އާއި ގުޅިގެން އެކަމުގެ ކްރެޑިޓް މި ސަރުކާރުން ނަގަން މަސައްކަތް ކޮށްފައިވާތީ ކުރީގެ އެޑިއުކޭޝަން މިނިސްޓަރު ޑރ. އައިޝަތު އަލީއެވެ.

ފޭސްބުކުގައި ކުރެއްވި ޕޯސްޓުގައި، ރައީސް އިބްރާޙިމް މުހައްމަދު ޞާލިހުގެ އެޑިއުކޭޝަން މިނިސްޓަރ ޑރ. އައިޝަތު އަލީ ވިދާޅުވީ 15 އޮކްޓޯބަރ 2021 ގައި އެ ގްރާންޓްއަށް އެދުމުގެ ފުރުސަތު ރާއްޖެއަށް އޮތްކަން އެނގުމާއެކު ގިނަ ބައެއްގެ ބުރަ މަސައްކަތާއެކު ޕާރޓްނަރޝިޕް ކޮމްޕެކްޓްއާއި މަލްޓިޕްލަޔަރ ގްރާންޓް ތައްޔާރުކޮށް ޖުލައި 2023 ގައި އެ ގްރާންޓްއަށް އެދި، އޮގަސްޓް 2023 ގައި ވަނީ ރާއްޖެއަށް އެ ގްރާންޓްއިން 9.5 މިލިއަން ޑޮލަރު ކާމިޔާބުކުރެވިފައިވާ ކަމަށެވެ.

މި ގްރާންޓްގައި ހިމެނެނީ ސިސްޓަމް ޓްރާންސްފޯމޭޝަން ގްރާންޓް (5 މިލިއަން ޑޮލަރު) އާއި ސިސްޓަމް ކެޕޭސިޓީ ގްރާންޓް (1.5 މިލިއަން ޑޮލަރ) އާއި މަލްޓިޕްލަޔަރ ގްރާންޓް (3 މިލިއަން ޑޮލަރ)އެވެ. މި ގްރާންޓްއަށް އެދެން ކޮމްޕެކްޓް ފަރުމާކުރީ ރައީސް ޞާލިހުގެ ތައުލީމީ ސިޔާސަތުގެ ދަށުން، ކިޔަވައިދިނުމުގެ ފެންވަރު ރަގަޅުކުރުމަށާއި އިކުއިޓީ އާއި އިންކުލޫޝަން އަދި ޖެންޑަރ އިކުއިޓީއަށް ފޯކަސްކޮށް މުޅި ރާއްޖޭގެ ތައުލީމީ ދާއިރާއަށް އިންގިލާބީ ބަދަލެއް ގެނައުމުގެ ނިޔަތުގައިކަމަށް މިނިސްޓަރު ވަނީ ވިދާޅުވެފައެވެ.

މިނިސްޓަރު އިތުރަށް ވިދާޅުވެފައިވަނީ މި ގްރާންޓް ބޭނުންކޮށްގެން އަމަލީ މަސައްކަތް ފަށައިގަތުމަކީ ލިބޭ ވަރަށް ބޮޑު އުފަލެއް ކަމަށެވެ. 2019 ގައި ދިވެހިރާއްޖެ ގްލޯބަލް ޕާރޓްނަރޝިޕް ފޯރ އެޑިޔުކޭޝަން (ޖީޕީއީ) ގެ މެމްބަރަކަށް ވީ ފަހުން، ފުރަތަމަ ގްރާންޓްގެ ގޮތުގައި ލިބުނު 3.5 މިލިއަން ޑޮލަރު ބޭނުން ކުރެވުނީ ރާއްޖޭގެ މަދަރުސާތަކުގައި ކިޔަވާ ދަރިވަރުންގެ ލިޓްރަސީއާއި ނިއުމެރަސީ ކުރިއެރުވުމަށް ކަމަށް ވިދާޅުވެފައިވެއެވެ.

އަދި ކޮވިޑް އެކްސެލެރޭޓަރ ގްރާންޓްގެ ގޮތުގައި ލިބުނު 2 މިލިއަން ޑޮލަރުވެސް ވަނީ ދަރިވަރުންނަށް ކޮވިޑުގެ ދުވަސްވަރުގައި ދިމާވި އުނގެނުމުގެ ދަތިތަކުން އަރައިގަތުމަށް ބޭނުން ކުރެވިފައެވެ. އަދި އުއްމީދަކީ މި ގްރާންޓްގެ އެހީގައި ރާއްޖޭގެ ތައުލީމީ ދާއިރާއަށް އިންގިލާބީ ބަދަލެއް އައުން ކަމަށް ވިދާޅުވެފައިވެއެވެ.

މި ގްރާންޓާއި ގުޅޭގޮތުން މި ސަރުކާރުން ބުނެފައިވަނީ "ތައިބަ" މި ޕްރޮޖެކްޓަކީ ދިވެހިރާއްޖޭގެ ތައުލީމަށް، ނިޒާމީގޮތެއްގައި، ހެޔޮ ބަދަލުތަކެއް ގެނެއުމާއެކު، ރާއްޖޭގެ ތައުލީމީ ނިޒާމަކީ ހަރުދަނާ، ޝާމިލު، ވިލުންވެރި ނިޒާމަކަށް ހެދުމަށްޓަކައި އެކުލަވާލި ޕްރޮޖެކްޓެއް ކަމަށެވެ. އެގޮތުން ޔުނިސެފްގެ އެހީތެރިކަމާއެކު ތައުލީމީ ވުޒާރާއާއި ލޯކަލް އެޑިޔުކޭޝަން ގްރޫޕް (ލެގް) އިން އެކުލަވާލި ޕާރޓްނަޝިޕް ކޮމްޕެކްޓާއެކު، ދަރިވަރުންގެ އުނގެނުން ހަރުދަނާ ކުރުމަށްޓަކައި ވަރަށް އުންމީދީ ލަނޑުދަނޑިތަކަކާއެކު އިންގިލާބީ އެޖެންޑާއެއް ކަނޑައެޅުނު ކަމަށެވެ.

އަދި ކުރީ ސަރުކާރުން ކަށަވަރުކުރި މި ގްރާންޓާއި ގުޅިގެން ބުނެފައިވަނީ މިއީ ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ތައުލީމަށް ދޭ އަހަންމިއްޔަތު އަންގައިދޭ ހެއްކެއް ކަމަށެވެ. އަދި ދިވެހި ސަރުކާރާއި ތައުލީމީ ދާއިރާ ތަރައްގީ ކުރުމަށް އެހީތެރިވާ ފަރާތްތަކާ ދެމެދު އޮންނަ ހަރުދަނާ ގުޅުން ދޭހަކޮށްދޭ ކަމެއް ކަމަށެވެ.

ސިސްޓަމް ޓްރާންފޮމޭޝަން ގްރާންޓް:ގްރާންޓް އެޖެންޓުގެ ގޮތުގައި ޔުނިސެފް ހަރަކާތްތެރިވާ ގޮތަށް ހޯދާފައިވާ 5 މިލިއަން އެމެރިކާ ޑޮލަރުގެ މި ގްރާންޓް ބޭނުންކުރެވޭނީ، ހާއްސަ އެހީއަށް ބޭނުންވާ އަދި އުނގެނުމުގައި އިތުރު އެހީތެރިކަމަށް ބޭނުންވާފަދަ ނާޒުކު އަދި ހިރާހަށް ހުށަހެޅިފައިވާ ކުދިންނަށް އިސްކަންދީ އެކުދިންނަށް ފުރުސަތުތައް ފަހިކޮށްދޭފަދަ ވެއްޓެއް ދިވެހިރާއްޖޭގައި ގާއިމު ކުރުމަށެވެ. އެގޮތުން، އެފަދަ ކުދިން ރަސްމީ މަދަރުސީ ނިޒާމުގެ ތެރެއަށް ގެނެސް، އެކުދިންނަށް ދާއިމީ ގޮތެއްގައި ނިޒާމީ ތައުލީމު ފޯރުކޮށްދެވޭކަން ކަށަވަރުކޮށް، އެކުދިންގެ އުމުރާއެކަށީގެންވާ މިންވަރަށް އުނގެނުމުގެ މޭލުގާތައް ހާސިލުކުރުވައި، ސްކޫލު މަރުހަލާއިން ވަޒީފާގެ މައިދާނަށް ނަގުލުވުމަށް ބޭނުންވާ އިލްމާއި ހުނަރާއި ފިކުރާއި ވިސްނުން އަށަގަންނުވާދޭ ފަދަ ތައުލީމީ ނިޒާމެއް ގާއިމުކުރުމުގެ މަސައްކަތް ކުރިއަށްދާނެއެވެ.

ސިސްޓަމް ކެޕޭސިޓީ ގްރާންޓް:ގްރާންޓް އެޖެންޓްގެ ގޮތުގައި ޔުނިސެފް ހަރަކާތްތެރިވާ ގޮތަށް ހޯދާފައިވާ 5.5 މިލިއަން އެމެރިކާ ޑޮލަރުގެ މި ސިސްޓަމް ކެޕޭސިޓީ ގްރާންޓުގެ މައިގަނޑު މަގުސަދަކީ ތައުލީމީ ދާއިރާގެ ހިންގުން ހަރުދަނާ ކުރުމެވެ. އެގޮތުން ތައުލީމީ ދާއިރާގެ ރޭވުންތެރިކަމާ، މާލިއްޔަތު ބެލެހެއްޓުމާއި، ކަންކަން މޮނިޓަރކުރުމާއި ވިލަރެސްކުރުން ހަރުދަނާ ކުރުމަށް މި ގްރާންޓް ދަށުން މުހިންމު ގިނަ މަސައްކަތްތަކެއް ކުރެވިގެންދާނެއެވެ.

މަލްޓިޕްލަޔަރ ގްރާންޓް:ގްރާންޓް އެޖެންޓްގެ ގޮތުގައި ވަރލްޑް ބޭންކް ހަރަކާތްތެރިވާ ގޮތަށް ހޯދާފައިވާ 3 މިލިއަން އެމެރިކާ ޑޮލަރުގެ މަލްޓިޕްލަޔަރ ގްރާޓްގެ އެހީގައި، ދިވެހިރާއްޖޭގެ ތައުލީމީ ދާއިރާއާ ގުޅުންހުރި މައުލޫމާތުތައް އެއްކޮށް، ރައްކާތެރިކޮށް ބަލަހައްޓައި ބޭނުންކުރެވޭނެ ހަރުދަނާ މަންސައެއް ތައްޔާރުކުރުމުގެ މަސައްކަތް ކުރިއަށްދާނެއެވެ. އެގޮތުން އައު އެޑިޔުކޭޝަން މެނޭޖްމަންޓް އިންފޮމޭޝަން ސިސްޓަމެއް މި ގްރާންޓްގެ ދަށުން ތައްޔާރުކުރެވޭނެއެވެ. މީގެ ސަބަބުން ތައުލީމީ ނިޒާމުގެ ހުރިހާ ހަރުފަތެއްގައި ގަރީނާއަށް ރިއާޔަތްކޮށް (އެވިޑެންސް ބޭސްޑް) ސިޔާސަތުތަކާއި ނިންމުންތައް ނިންމުމުގެ ގާބިލްކަން އިތުރުކުރެވިގެންދާނެއެވެ.

ގްލޯބަލް ޕާޓްނަރޝިޕް ފޯރ އެޑިޔުކޭޝަން (ޖީޕީއީ) އަކީ ތަރައްގީވަމުން އަންނަ ގައުމުތަކުގެ ތައުލީމީ ނިޒާމު ކުރިއެރުވުމަށް ފަންޑު ކުރާ ބައިނަލްއަގުވާމީ އެންމެ ބޮޑު އެއް ޖަމާއަތެވެ. ޖީޕީއީގެ މެންބަރު ގައުމަކަށް ދިވެހިރާއްޖެ ވީ 2019 ވަނަ އަހަރުގެ ތެރޭގައެވެ. އޭގެ ފަހުން ޖީޕީއީ އިން ވަނީ ރާއްޖޭގެ ތައުލީމީ ނިޒާމު ކުރިއެރުވުމަށް ގިނަ މަސައްކަތްތަކެއް ކޮށްދެއްވާފައެވެ. އޭގެ ތެރެއިން ކޮވިޑް-19 ރިކަވަރީ ޕްރޮގްރާމަށް ދެއްވި މާލީ އެހީތެރިކަން ފާހަގަކުރެވެއެވެ.