ބިލެތްހުނީގެ މައްސަލައެއް ނެތް، ބުޅާމަހުން ކާބޯތަކެތި ހެދިކަން އަދި ކަށަވަރެއް ނުވޭ: މިނިސްޓަރު ހަލީލު

ބިލެތްހުނީގެ މައްސަލަ ރިޕޯޓު ކުރުމުން ތަހުގީގުކޮށްފައިވާ ކަމަށާއި، ބުޅާމަހުން ކާބޯތަކެތި ހެދިކަން އަދި ކަށަވަރުނުވާ ކަމަށް ހެލްތް މިނިސްޓަރު އަބްދުﷲ ހަލީލް ވިދާޅުވެއްޖެއެވެ.

ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުވައި މިނިސްޓަރު ހަލީލު ވިދާޅުވީ ބުޅާ މަހުން ކާބޯތަކެތި ހެދި މައްސަލަ ފެންމަތިވެގެންދިޔައީ ސޯޝަލް މީޑިއާގައި ކަމަށާއި، ހެލްތް މިނިސްޓްރީއަށް އެފަދަ އެއްވެސް ރިޕޯޓެއް ލިބިފައިނުވާ ކަމަށެވެ.

މިނިސްޓަރު ހަލީލު ވިދާޅުވީ ބުޅަލުގެ މަހުން ކާބޯތަކެތި ހެދި މައްސަލަ ފެންމަތިވުމާއެކު ކަމާގުޅުންހުރި އިދާރާތަކާއެކު އެމައްސަލަ ތަހުގީގު ކުރަމުންދާ ކަމަށާއި، އެމައްސަލަ ތަހުގީގުކޮށް ނިމުމުން އެމައުލޫމާތުތައް ހިއްސާ ކުރާނެ ކަމަށެވެ.

ބުޅާމަހުން ކާނާ ހަދާކަމުގެ ތުހުމަތުގައި އިމިގްރޭޝަނުން ވަނީ ބިދޭސީއަކު ހައްޔަަރުކޮށްފައެވެ. އެމީހާ ދިރިއުޅުގެ ބަލާ ފާސްކުރިއިރު، މުއްދަތު ހަމަވެފައިވާ ކާބޯތަކެއްޗާއި، ކުނިވެފައިވާ އެކިބާވަތްތަކުގެ މަސްތައް ފްރިޖުން ފެނިފައިވެއެވެ.

ބިލެތްހުނީގެ މައްސަލައަށް އިޝާރާތް ކުރައްވައި މިނިސްޓަރު ހަލީލު ވިދާޅުވީ އެމައްސަލަ ރިޕޯޓު ކުރުމުން އެ މައްސަލަ ތަހުގީގުކޮށްފައިވާ ކަމަށާއި، ޓެސްޓުތައް ހަދާފައިވާ ކަމަށެވެ. ޓެސްޓުގެ ނަތީޖާ ބުދަ ދުވަހު ހަވީރު ލިބުނު ކަމަށާއި، ނަތީޖާއަށް ބަލާއިރު އޭގައި މައްސަލައެއް ނެތް މިނިސްޓަރު ހަލީލު ވިދާޅުވިއެވެ. އަދި ވިދާޅުވީ އެއީ ކޯނިސް ޕައުޑަރު ނޫން ކަމަށެވެ.

ގަވައިދާ ހިލާފަށް އުޅޭ ބިދޭސީންގެ މައްސަލަ ހައްލު ކުރުމަށް ހޯމް މިނިސްޓްރީ، ފުލުހުން އަދި އިމިގްރޭޝަން ގުޅިގެން ދަނީ ޚާއްސަ އޮޕަރޭޝަންތަކެއް ކުރިއަށް ގެންދަމުންނެވެ. މި އޮޕަރޭޝަންތަކުގައި އެންމެ ގިނައިން އަތުލައިގަންނަމުންދަނީ ގަވާއިދާ ހިލާފަށް ރާއްޖޭގައި ވިޔަފާރި ހިންގަމުންދާ ބިދޭސީންނެވެ. އެގޮތުން ބިދޭސީން ސާފުތާހިރުކަން ކުޑަކޮށް، ކާބޯތަކެތި ތައްޔާރުކުރާ އެކިއެކި ފެކްޓްރީތައް އިމިގްރޭޝަނުން ދަނީ ހޯދަމުންނެވެ.