"އެޑިއުކޭޝަން ޓްރާންސްފޮމޭޝަން އިނީޝިއޭޓިވްސް" ޕްރޮޖެކްޓް އިފްތިތާހުކޮށްފި

ގްލޯބަލް ޕާޓްނަރޝިޕް ފޯ އެޑިއުކޭޝަންގެ ފަރާތުން ދިވެހިރާއްޖޭގެ ތައުލީމީ ދާއިރާ އަށް ދޭ 9.5 މިލިއަން އެމެރިކާ ޑޮލަރުގެ ހިލޭ އެހީގެ ދަށުން އެކު ފެށި، "އެޑިއުކޭޝަން ޓްރާންސްފޮމޭޝަން އިނީޝިއޭޓިވްސް" އިފްތިތާހުކޮށްފިއެވެ.

ބުރާސްފަތި ދުވަހު އެކަމަށްޓަކާ ބެއްވި ރަސްމިއްޔާތުގައި އެ ޕްރޮޖެކްޓް އިފްތިތާހުކޮށްދެއްވީ ރައީސުލްޖުމްހޫރިއްޔާގެ ނައިބު އަލްއުސްތާޛް ޙުސައިން މުޙައްމަދު ލަޠީފެވެ.

އެ ރަސްމިއްޔާތުގައި އެ ޕްރޮޖެކްޓާއި ގުޅޭ ވެބްސައިޓް ވެސް ވަނީ ލޯންޗްކޮށްފައެވެ.

ތަޢުލީމީ ވަޒީރު ޑރ. އިސްމާޢީލް ޝަފީޢު ވަނީ އެ ހިލޭ އެހީގެ ދަށުން، ތަޢުލީމީ ދާއިރާގައި ހުރި މައްސަލަތަކަށް ފުރިހަމަ ޙައްލެއް ލިބޭނެ ކަމަށް ފާހަގަކުރައްވާފައެވެ. އެ ހިލޭ އެހީގެ ދަށުން ތަފާތު 3 ގްރާންޓެއް ދީފައިވާ ކަމަށް ވަޒީރު ވިދާޅުވިއެވެ. އޭގެ ތެރޭގައި 9.5 މިލިޔަން ޑޮލަރު ނުވަތަ 146.5 މިލިޔަން ރުފިޔާގެ އެހީ ހޭދަކުރާނީ ތައުލީމީ ދާއިރާ އަށް ކަމަށް ވަޒިީރު ވިދާޅުވިއެވެ. އަދި މި އެހީގެ ދަށުން ތަޢުލީމަށް އިންގިލާބީ ބަދަލުތަކެއް ގެނައުމުގެ މަސައްކަތްކުރާނެ ކަމަށް ވަނީ ވިދާޅުވިއެވެ.

ޖުމްލަ ފައިސާގެ އަދަދަކީ 1.5 މިލިޔަން އެމެރިކާ ޑޮލަރުގެ މި ގްރާންޓަކީ ތައުލީމީ ދާއިރާ އަށް އިންގިލާބީ ބަދަލުތަކެއް ގެނުވާނެ ގްރޭންޓެއް ކަމަށް އެޑިއުކޭޝަނުން ބުނެއެވެ. މީގެ އިތުރުން މަލްޓިޕްލަޔަރ ގްރާންޓްގެ ޖުމްލަ ފައިސާގެ އަދަދަކީ 3 މިލިޔަން އެމެރިކާ ޑޮލަރު ކަމަށާއި މި އެހީގެ ދަށުން ސްކޫލުތައް ޤާއިމުކުރުމުގެ އިތުުރުން، ތަޢުލީމީ ދާއިރާ ހިންގުމުގެ ހުނަރުވެރިން އުފެއްދުމަށް މަސައްކަތްތައް ކުރާނެ ކަމަށް ވަނީ ފާހަގަކުރައްވާފައެވެ. ހަމައެހެންމެ ފައިނޭންސިން ހަރުދަނާކުރުމާއި، ތަޢުލީމީ ދާއިރާއަށް ބޭނުންވާ މުދައްރިސުން ތަމްރީނުކުރުމަށް ހޭދަކުރުމަށް ވަނީ ހަމަޖެހިފައެވެ.