ލާމަރުކަޒީ ނިޒާމުގެ ބާރު ކަނޑުވާލުމަށް ވޯޓު ނުދޭން ތިނަދޫ ކައުންސިލުން ތިނަދޫ ދާއިރާ ތަމްސީލް ކުރާ މެމްބަރުންނަށް ގޮވާލައިފިއެވެ.

ތިނަދޫ ސިޓީ ކައުންސިލުން މިފަދައިން އެދިފައިވަނީ ތިނަދޫ އުތުރު ދާއިރާގެ މެންބަރު ސައުދުﷲ ހިލްމީ އާއި ތިނަދޫ ދެކުނު ދާއިރާގެ މެންބަރު މުޙައްމަދު އަލްސަން އަހްމަދު އަށް ރައްދުކޮށް ތިނަދޫ ކައުންސިލުން ބުދަ ދުވަހު ނެރުނު އިލްތިމާސެއްގައެވެ.

މި އިލްތިމާސްގައި މިހާރު ހިނގަމުންދާ 20 ވަނަ ރައްޔިތުންގެ މަޖިލީހަށް ހުށަހެޅޭ އެކި އެކި އިސްލާހުތަކުގެ ތެރެއިން ލާމަރުކަޒީ ނިޒާމުގެ ބާރުކެނޑި ޤާނޫނީ ބާރުވެރިކަން ނިގުޅައިގަތުމަށްޓަކައި މަޖިލީހަށް ހުށަހެޅޭ އެއްވެސް ބިލެއް ފާސްކުރުމަށް ވޯޓު ނުދިނުމަށް ގޮވާލާފައިވެއެވެ.

ކައުންސިލުން ބުނެފައިވަނީ ރައްޔިތުން އިންތިޚާބުކުރާ މެންބަރުންނަކީ ރައްޔިތުންގެ ބާރުވެރިކަން ނިގުޅައިގަނެ، ރައްޔިތުން ބިކަކުރުމުގެ ގޮތުން ހުރިހާ ބާރެއް މަރުކަޒުކުރުމަށް މަސައްކަތްކުރަންޖެހޭ ފަރާތްތަކެއް ނޫން ކަމަށެވެ.

މީގެ އިތުރުން، ވަކި ބައެއްގެ ސިއްރު އެޖެންޑާއެއްގެ ދަށުން ހުރިހާ އާރަކާ ބާރެއް މަރުކަޒުކުރެވޭ ގޮތަށް ހުށަހެޅޭ އެއްވެސް ބިލަކަށް ނުވަތަ އިސްލާހަކަށް ތާއީދު ނުކުރުމަށާއި ވޯޓު ނުދިނުމަށް ތިނަދޫ ސިޓީ ކައުންސިލާއި ތިނަދޫ ސިޓީގެ ރައްޔިތުންގެ ފަރާތުން އެދިފައެވެ.