ލޭނު މަސްވެރިކަމާ އެއްވެސް އިރެއްގައި ދެކޮޅެއް ނޫން: މިނިސްޓަރު ޝިޔާމް
އޮޕަޒިޝަންގައި ހުރެގެން ލޭނު މަސްވެރިކަމުގެ ތެރެއިން ކުރަމުންދާ ބައެއް ކަންތައްތަކާ ދެކޮޅަށް ވާހަކަދެއްކިން
ބުދަ ދުވަހު ފިޝަރީޒް މިނިސްޓްރީން ބޭއްވި ނޫސްވެރިންގެ ބައްދަލުވުމުގައި ފިޝަރީޒް މިނިސްޓަރު އަހުމަދު ޝިޔާމް ވާހަކަ ދައްކަވަނީ
ލޭނު މަސްވެރިކަމާ އެއްވެސް އިރެއްގައި ދެކޮޅު ނޫން ކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެއެވެ.
ބުދަ ދުވަހު ފިޝަރީޒް މިނިސްޓްރީން ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަށް ޖަވާބު ދެއްވަމުން މިނިސްޓަރު ޝިޔާމް ވިދާޅުވީ އެއްވެސް އިރެއްގައި ލޭނު މަސްވެރިކަމާ ދެކޮޅު ނޫން ކަމަށެވެ.
މިނިސްޓަރު ޝިޔާމް ވިދާޅުވީ ކުރީ ސަރުކާރުގެ އޮޕަޒިޝަން ޕާޓީގައި ހުންނަވައިގެން ވެސް ލޭނު މަސްވެރިކަމާ ދެކޮޅަށް ވާހަކަ ނުދައްކާ ކަމަށާއި، ނަމަވެސް ލޭނު މަސްވެރިކަމުގެ ތެރެއިން ކުރަމުންދާ ބައެއް ކަންތައްތަކާ ގުޅިގެން ދެކޮޅަށް ވާހަކަ ދައްކާފައިވާ ކަމަށެވެ. އަދި ވިދާޅުވީ ލޭނު މަސްވެރިކަމަކީ ރާއްޖެއަށް އާމްދަނީ އިތުރުވާ މަސްވެރިކަމެއް އޭރު ވެސް ގަބޫލުކުރާ ކަމަށެވެ.
ލޭނު މަސްވެރިކަމާ އެއްވެސް އިރެއްގައި ދެކޮޅު ނޫން ކަމަށް ފިޝަރީޒް މިނިސްޓަރު ޝިޔާމް ވިދާޅުވިއިރު، 19 ވަނަ ރައްޔިތުންގެ މަޖިލީހުގެ އެކި ޖަލްސާތަކުގައި މިނިސްޓަރު ޝިޔާމް ވަނީ ލޭނު މަސްވެރިކަމާ ދެކޮޅަށް ވާހަކަ ދައްކަވާފައެވެ. އެގޮތުން ލޭނު މަސްވެރިކަން މަނާ ނުކުރުމަކީ ހިތާމަ ކުރާ ކަމެއް ކަމަށާއި، ދިވެހިރާއްޖޭގައި ދެވަނަ އަށް އޮތް އެންމެ ބޮޑު ސިނާއަތް ހަލާކުކޮށްލުމުގެ ނިޔަތުގައި ކުރަމުންދާ މަސައްކަތެއް ގޮތުގައި ފާހަގަކުރައްވާފައިވެއެވެ.
މިކަމުގެ ސަބަބުން ރާއްޖޭގެ އާއިލާތައް ބިކަވާ ކަމަށާއި، ބޭރުގެ ބޯޓުފަހަރު ރާއްޖޭގެ ކަނޑުގެ ސަރަހައްދަށް ވަދެ، ހިންގާ ބޮޑު ޖަރީމާއެއް ކަމަށް އޭރު މިނިސްޓަރު ޝިޔާމް ވިދާޅުވެފައިވެއެވެ.
