ލޭނު މަސްވެރިކަމަށް ހުއްދަދެނީ ލިބޭ ނަފާ އިތުރު ކުރުމަށް، ކުރީ ސަރުކާރުގައި އެކަން ހުއްޓުވީ ސިޔާސީ ގޮތުން: މިނިސްޓަރު ޝިޔާމް
ލޭނު މަސްވެރިކަން ކުރާއިރު، ވަކި މިންގަނޑަކާ އެއްގޮތަށް އެމަސައްކަތް ކުރަންޖެހޭ
ނޫސްވެރިންގެ ބައްދަލުވުމުގައި ފިޝަރީޒް މިނިސްޓަރު އަހުމަދު ޝިޔާމް ވާހަކަދައްކަވަނީ
ލޭނު މަސްވެރިކަމަށް ހުއްދަދެނީ ލިބޭ ނަފާ އިތުރު ކުރުމަށް ކަމަށާއި، ކުރީ ސަރުކާރުގައި އެކަން ހުއްޓުވީ ސިޔާސީ ގޮތުން ކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެއެވެ.
ބުދަ ދުވަހު ފިޝަރީޒް މިނިސްޓްރީން ބޭއްވި ނޫސްވެރިންގެ ބައްދަލުވުމުގައި، ނޫސްވެރިއަކު ވަނީ ލޭނު މަސްވެރިކަމަށް ހުއްދަ ދިނުމަށް ސަރުކާރުން މަސައްކަތް ކުރާއިރު، ޔޫރަޕިއަން ޔުނިއަން (އީޔޫ)ގެ އިންޒާރު އަދި މަސްވެރިކަމާބެހޭ ގިނަ ޖަމިއްޔާ ޖަމިއްޔާތަކުން މިކަމާ ދެކޮޅު ހަދަމުންދާއިރު، ހުއްދަ ދިނުމަށް ސަރުކާރުން މަސައްކަތް ކުރަނީ ކީއްވެތޯ އަހާފައެވެ. އަދި ރާއްޖޭގެ އުފެއްދުންތައް ބައިކޮޓްކުރާނެ ކަމަށް މީގެ ކުރިން ދީފައިވާ އިންޒާރާއި، އަދި ފްރީ ޓްރޭޑް އެގްރިމެންޓަށް ހުރަސް އެޅިދާނެ ކަމަށް އެގައުމުތަކުން ބުނަމުންދާއިރު، ސަރުކާރުން މިކަން ކުރަން ނިންމި ސަބަބު ސާފުކޮށް ދިނުމަށް އަހާފައިވެއެވެ.
މިސުވާލުތަކާ ގުޅިގެން މިނިސްޓަރު ޝިޔާމް ވިދާޅުވީ ކުރީ ސަރުކާރުގައި 2019 ވަނަ އަހަރުގެ ތެރޭގައި ލޭނު މަސްވެރިކަން ހުއްޓާލީ ސިޔާސީ ގޮތުން ކަމަށާއި، ޔޫރަޕިއަން ޔުނިއަންގެ އެއްވެސް އިންޒާރެއް ލިބިގެން ނޫން ކަމަށެވެ. ނަމަވެސް ލޭނު މަސްވެރިކަން ކުރާއިރު، ވަކި މިންގަނޑަކާ އެއްގޮތަށް އެމަސައްކަތް ކުރަންޖެހޭ ކަމަށް މިނިސްޓަރު ޝިޔާމް ވިދާޅުވިއެވެ. އަދި މިނިސްޓަރު ޝިޔާމް ވިދާޅުވީ ލޭނު މަސްވެރިކަމަކީ އެހެން ގައުމުތަކުން ވެސް ކުރަމުން އަންނަ މަސްވެރިކަމެއް ކަމަށެވެ.
މިނިސްޓަރު ޝިޔާމް ވިދާޅުވީ މަސައްކަތް ކުރަނީ މަސްވެރިކަން ސިންދަފާތު ކުރުމަށް ކަމަށާއި، ލޭނު މަސްވެރިކަމަށް ހުޅުވާލާއިރު، އުދަނގޫތަކެއް ހުންނާނެ ކަމަށެވެ. ގިނަ ގައުމުތަކުން މަސްވެރިކަން ކުރާއިރު، އެއީ ވާދަވެރިން ކަމަށާއި، ނަމަވެސް އުދަނގޫތަކާއެކު ކުރިއަށް ދެވޭނެ ކަމަށް މިނިސްޓަރު ޝިޔާމް ވިދާޅުވިއެވެ. އަދި ވިދާޅުވީ ލޭނު މަސްވެރިކަމުގައި ރަނގަޅުކުރަންޖެހޭ ކަންތައްތަކެއް އެބަހުރި ކަމަށާއި، އެކަންކަން ވެސް ރަނގަޅުކޮށް މެނޭޖް ކުރާނެ ކަމަށް މިނިސްޓަރު ޝިޔާމް ވިދާޅުވިއެވެ.
މީގެ އިތުރުން މިނިސްޓަރު ޝިޔާމް ވިދާޅުވީ ޓެރިފް ބޮޑުވެގެން ޓެރިފް ކުޑަކުރުމަށް މަސައްކަތް ކުރާތާ 12 އަހަރުވެފައިވާ ކަމަށާއި، ނަމަވެސް އެކަން ކާމިޔާބު ނުވާ ކަމަށެވެ. ރާއްޖެއަކީ ސަސްޓެއިނަބަލް ފިޝަރީޒްގެ ޗެންޕިއަނުންކަން ފާހަގަކުރައްވައި މިނިސްޓަރު ޝިޔާމް ވިދާޅުވީ މީގެ ކުރިން ކުރަމުންދިޔަ މަސައްކަތެއް ނުކޮށް ތިބެން ނުޖެހޭ ކަމަށާއި، އެ މަސައްކަތް ރަނގަޅު ގޮތުގައި ކުރުމަކީ އެންމެ ރަނގަޅު ނިންމުން ކަމަށެވެ.
މިނިސްޓަރު ޝިޔާމް ވިދާޅުވީ މަސްވެރިކަމުގެ ސިނާއަތުގައި މަސައްކަތް ކުރާ މަސްވެރިން ލޭނު މަސްވެރިކަން ކުރަން ބޭނުންވެ އެކަން ސަމާލުކަމަށް ގެނެސްފައިވާ ކަމަށެވެ. އަދި ކަންނެލި މަސްވެރިކަން ތަމްސީލުކުރާ ޖަމިއްޔާގެ ބައެއް މީހުން ވެސް ލޭނުގެ މަސްވެރިކަމަށް ދާން ބޭނުންވާކަން ފާހަގަކޮށްފައިވާ ކަމަށް މިނިސްޓަރު ޝިޔާމް ވިދާޅުވިއެވެ.
މިނިސްޓަރު ޝިޔާމް ވިދާޅުވީ ލޭނު މަސްވެރިކަމުން ބޮޑު އާމްދަނީއެއް ލިބޭނެ ކަމަށާއި، 99 އިންސައްތަ ކަނޑު ހިއްސާކުރާއިރު، އެކަނޑުގެ ރޯދިން ނަފާ އިތުރުކުރަންޖެހޭ ކަމަށެވެ. ލިބޭ އާމްދަނީ އިތުރުކޮށް، ރާއްޖޭގެ ރައްޔިތުންގެ ދިރިއުޅުމާއި، ތަރައްގީއަށް ހެޔޮ ބަދަލެއް އަންނާނެ ކަމަށް މިނިސްޓަރު ޝިޔާމް ވިދާޅުވިއެވެ.
މިނިސްޓަރު ޝިޔާމް މިމޭރުމުން ވާހަކަފުޅު ދެއްކެވި ނަމަވެސް ލޭނު މަސްވެރިކަމާ ދެކޮޅަށް ބޮޑު ކަންނެލި މަސްވެރިންގެ ޔޫނިއަން ހިމެނޭ ގޮތަށް ގިނަ ޖަމިއްޔާ ޖަމާއަތްތަކުން ދަނީ އެކަމާ ދެކޮޅު ހަދައި، ކަންބޮޑުވުން ފާޅުކުރަމުންނެވެ. އަދި މިއީ ރާއްޖޭގެ މަސްވެރިކަމާ ފަތުރުވެރިކަމަށް އެކަމުގެ ބޮޑު ގެއްލުންތަކެއް ލިބޭނެ ކަމެއްގެ ގޮތުގައި ފާހަގަކޮށްފައިވެއެވެ.
