ސާފް ޗެމްޕިއަންޝިޕް: ބޫޓާން އަތުން ރާއްޖެ ބަލިވެއްޖެ

ސާފް ޗެމްޕިއަންޝިޕް 20 އަހަރުން ދަށުގެ ފުޓްބޯޅަ މުބާރާތުގައި މިއަދު ބޫޓާން އަތުން ރާއްޖެ 2-1އިން ބަލިވެއްޖެ އެވެ.

މުބާރާތުގައި ކުޅުނު ފުރަތަމަ މެޗުން ރާއްޖެ ބަލިވުމުން ތިން ޓީމު ހިމެނޭ ގްރޫޕްގެ ސެމީ ފައިނަލަށް ދިއުމަށް ވަނީ ފުރުސަތު ހަނިވެފަ އެވެ. ގްރޫޕުގެ ފަހު މެޗުގައި ރާއްޖެ ބައްދަލުކުރަން ޖެހޭނީ އެންމެ ގަދަ އެއް ގައުމު ކަމަށްވާ އިންޑިޔާއާ އެވެ. މި މެޗުން ބަލިވުމުން މި ގްރޫޕުގައި ޕޮއިންޓެއް ނުލިބި އޮތް ހަމައެކަނި ގައުމަކީ ވެސް ރާއްޖެ އެވެ. ބޫޓާނާއި އިންޑިޔާ ކުރެ ކޮންމެ ޓީމަކަށް ވެސް ވަނީ ތިން ޕޮއިންޓް ލިބިފަ އެވެ. ބޫޓާނުން ގްރޫޕް ސްޓޭޖުގެ މެޗުތައް މިއަދު ނިންމާލިއިރު ބަލިވިނަމަ އެ ޓީމު މުބާރާތުން ކަޓާނެ އެވެ. އެއީ ފުރަތަމަ މެޗުގައި އިންޑިޔާ އަތުން ބަލިވެފައިވާތީ އެވެ.

މިއަދުގެ މެޗުގައި ފުރަތަމަ ލަނޑު ޖެހީ 20 ވަނަ މިނިޓްގައި ބޫޓާންގެ ޖެޓްސުން ޑޯޖީ އެވެ. އެއީ އަރިމަތިން ނެގި ހުރަހަށް ކީޕަރުން ފުންމައިގަތް ނަމަވެސް އެއްވެސް ކުޅުންތެރިއަކު ނުލިބުި ހުސްކޮށް ބޫޓާންގެ ޑޯޖީ އަށް ލިބުމުންނެވެ. އޭނާ މަޑުމަޑުން ފޮނުވާލި ބޯޅަ ގޯލަށް ވަނީ ވެސް ފުރޮޅެމުން ކަހަލަ ގޮތަކަށެވެ. އޭގެ ފަހުން މެޗުގެ 51 ވަނަ މެޗުގައި ބޫޓާންގެ ރިގްޒިން ޓެންޒިން އަށް ރަތްކާޑު ދެއްކުމުން 10 ކުޅުންތެރިންނާއެކު ބޫޓާން ކުޅެން ޖެހުނަސް ރާއްޖެ އަށް އޭގެ އެޑްވާންޓޭޖް ނުނެނުގެނެވެ.

ދޭތެރެދޭތެރެއިން ބޯކޮށް ވާރޭވެހި ފެންހެދެމުންދިޔަ ދަނޑުގައި ކުޅުނު މެޗުގައި ރާއްޖެ ނަތީޖާ ހަމަހަމަކުރީ 56 ވަނަ މިނިޓްގައި އިޝްއާފު އެވެ. އެއީ ޕެނަލްޓީ އޭރިޔާގެ ބޭރުން ލިބުނު ހިލޭ ޖެހުމަކުން ތިރިތިރިން ޖަހައި ގޯލަށް ފޮނުވާލައިގެންނެވެ. ބޫޓާނުން މޮޅުވި ލަނޑު ޖެހީ 90 ވަނަ މިނިޓްގައި ވަގަންގް ޗޮޕެލް އެވެ. މިވެސް ރާއްޖޭގެ ކީޕަރު އަތުން ހެދުނު ގޯހެކެވެ. ގޯލް ދޫކޮށް ޕެނަލްޓީ އޭރިޔާ ތެރެއަށް ކުރިއަށް ނުކުމެ އޭނާ ނަގަން އުޅުނު ބޯޅަ ހޯދައި ހުސްކޮށް އޮތް ގޯލަށް ބޫޓާން ކުޅުންތެރިން ފޮނުވާލީ އެވެ.

މި ނަތީޖާއެކު އިންޑިޔާ އަށް އެއްވަނަ ލިބެނީ ތިން ޕޮއިންޓާއެކު ފައިދާ އެއް ގޯލާއެކުގަ އެވެ. ބޫޓާނަށް ތިން ޕޮއިންޓާއެކު ފައިދާ ގޯލެއް ނެތެވެ. ރާއްޖެ އަށް މައިނަލް ގޯލަކާއެކު ޕޮއިންޓެއް ނުލިބެ އެވެ.