އެތުލެޓިކޯ އަށް ބަދަލުވެ، ފަރިތަކުރުންތަކުގައި ގަލަގާ ބައިވެރި ވަނީ

ޗެލްސީ އަށް ކުޅެމުން އައި އިންގްލެންޑުގެ މިޑްފީލްޑަރު ކޮނާ ގަލަގާ، އެ ކުލަބު ދޫކޮށް ސްޕެއިންގެ އެތުލެޓިކޯ މެޑްރިޑަށް ބަދަލުވެ ފަރިތަކުރުންތަކުގައި ބައިވެރިވާން ފަށައިފި އެވެ.

އުމުރުން 24 އަހަރުގެ ކުޅުންތެރިޔާ ޗެލްސީއާ ގުޅުނީ 2019 ވަނަ އަހަރު އެވެ. ޗެލްސީ އާއެކު އޭނާ ސޮއި ކޮށްފައިވާ އެއްބަސްވުން އައު ކުރުމަށް އެ ކުލަބުން ވަނީ މަސައްކަތް ކޮށްފަ އެވެ. ނަމަވެސް ޗެލްސީގެ ހުށަހެޅުން ޤަބޫލު ނުކުރަން ގަލަގާ ވަނީ ނިންމައިފަ އެވެ. ގަލަގާ ހޯދުމަށް އެތުލެޓިކޯ އިން ޗެލްސީ އާއެކު ކުރި މަޝްވަރާތަކާއި، އޭނާ ހޯދަން ކުރި މަސައްކަތް ވަކި ހިސާބަކުން މަޑު ޖެހުނެވެ.

އެހެން ނަމަވެސް، މިހާރު އެތުލެޓިކޯ އިން ވަނީ އެ ޑީލް ކާމިޔާބު ކޮށްފަ އެވެ. އެތުލެޓިކޯއާ އެކު ގަލަގާ ސޮއި ކޮށްފައި ވަނީ ފަސް އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާނީ 2029 ވަނަ އަހަރުގެ ޖޫން މަހުގެ ނިޔަލަށެވެ. ގަލަގާ ހޯދުމުގެ ޑީލްގެ ތެރެއިން އެތުލެޓިކޯ އަށް ކުޅެމުން އަންނަ ޕޯޗުގަލްގެ ޔާއޯ ފެލިކްސް ޗެލްސީ އަށް ދޫކޮށްލަން ވެސް އެ ކުލަބުން ވަނީ އެއްބަސްވެފަ އެވެ.

ގަލަގާ މިހާރު އަންނަނީ އެތުލެޓިކޯގެ ފަރިތަކުރުންތަކުގައި ބައިވެރިވަމުންނެވެ. އެގޮތުން ބުދަ ދުވަހު އެތުލެޓިކޯ އިން ކުރިއަށް ގެންދަމުން އަންނަ ފަރިތަކުރުންތަކުގައި ގަލަގާ ވަނީ ބައިވެރިވެފަ އެވެ. އެތުލެޓިކޯގެ ފަރިތަކުރުންތަކުގައި ގަލަގާ ބައިވެރިވަމުން އަންނަ މަންޒަރު ފެންނަ ވީޑިއޯ ވެސް އެކްސް ގައި އަންނަނީ ދައުރުވަމުންނެވެ.

ގަލަގާ ވަނީ ޗެލްސީ އަށް ކުޅެދިން 95 މެޗުން 10 ލަނޑު ޖަހައިފަ އެވެ. އެ ކުލަބާ އެކު އޭނާ ވަނީ ޔުއެފާ ޔޫރޮޕާ ލީގު ކާމިޔާބު ކޮށްފަ އެވެ. ޗެލްސީގައި ހުރުމަށްފަހު ގަލަގާ ވަނީ ލޯނު އެއްބަސްވުމެއްގެ ދަށުން ހަތަރު ކުލަބަކަށް ކުޅެފަ އެވެ. އެއީ ޗާލްޓަން އެތުލެޓިކް، ސްވަންސީ ސިޓީ، ވެސްޓް ބްރޮމްވިޗް އަލްބިއަން އަދި ކްރިސްޓަލް ޕެލަސް އެވެ.