ޕީޖީ ޝަމީމަށް ހަމަލާދިން މައްސަލައިގައި ދައުވާކޮށްދިނުމަށް ފޮނުވައިފި
ޕީޖީއަށް ހަމަލާދިން 7 މީހުން ތިބީ ޝަރީއަތް ނިމެންދެން ބަންދުކޮށްފައި
ޕްރޮސެކިއުޓަރ ޖެނެރަލް ހުސައިން ޝަމީމަށް ދިން ހަމަލާފައި އަތަށް އަނިޔާވެފައި
ޕްރޮސެކިއުޓަރ ޖެނެރަލް ހުސައިން ޝަމީމަށް ހަމަލާދިން މައްސަލައިގައި ދައުވާކޮށްދިނުމަށް އެދި ޕީޖީ އޮފީހަށް ފުލުހުން ފޮނުވައިފިއެވެ.
ފުލުހުން ބުނެފައިވަނީ ޕީޖީ ހުސައިން ޝަމީމަށް ހަމަލާދިން މައްސަލައާއި ގުޅިގެން ހައްޔަރުކުރި 7 މީހުންގެ މައްސަލަ ތަހުގީގު ނިމި ދައުވާކޮށްދިނުމަށް އެދި މި މަހުގެ 18 ވަނަ ދުވަހު ޕީޖީ އޮފީހަށް ފޮނުވާފައިވާ ކަމަށެވެ. މި މައްސަލައިގައި ހައްޔަރުކުރި 7 މީހުން ތިބީ ފުލުހުންގެ ބަންދުގައެވެ.
ޕީޖީއަށް ހަމަލާދީފައިވަނީ 31 ޖެނުއަރީ 2024 ވީ ބުދަ ދުވަހުގެ ފަތިހުގެ ވަގުތެއްގައި މާލޭގެ މަގުމަތީގައި، ސައިކަލެއްގައި އައި ދެ މީހަކެވެ. އަދި ޕީޖީއަށް ޙަމަލާދީފައިވަނީ ހަތިޔާރެއް ބޭނުންކޮށްގެންކަމަށް ވެސް ފުލުހުން ވެސް ބުނެފައިވެއެވެ. ޕީޖީ ޝަމީމަށް ދިން ހަމަލާ އަމާޒުވީ އަތަށެވެ. މި މައްސަލައާއި ގުޅިގެން 7 މީހަކު ހައްޔަރުކޮށްފައިވެއެވެ. އަދި ޝަރީއަތް ނިމެންދެން ބަންދުކުރުމަށް ކްރިމިނަލް ކޯޓުން އަމުރުކުރިއެވެ.
ހަމަލާގައި ޕީޖީގެ އަތަށް އަނިޔާވެ އޭޑީކޭ ހޮސްޕިޓަލުން ފަރުވާވެސް ދީފައިވެއެވެ.
ޕީޖީ ޝަމީމަށް ހަމަލާދިން މީހުންގެ ވަނަވަރުވެސް ވަނީ އާންމުކޮށްފައެވެ. އެގޮތުން ފުލުހުން ބުދަ ދުވަހު ހާމަކުރި މައުލޫމާތުތައް ދައްކާގޮތުން މި މައްސަލައާއި ގުޅިގެން ހައްޔަރުކޮށްފައިވަނީ ރ. އަލިފުށީ ރިވެލި، މިދުހަތު އާދަމާއި ލ. ގަމު ތުނޑި އަވަށު ޖަވާހިރުވިލާ، މުހައްމަދު ޖަޒްލާނާއި އދ. މާމިގިލީ، ކެމީހިޔާ ޒަޔާން ނަސީރާއި ތ. ތިޔަދިމިގިލީ ރުވާ، އަބްދުލް ހަންނާނާއި ލ. މާމެންދޫ މުރިނގު، ރަޖުވާން ލަތީފާއި ދަފްތަރު ނަމްބަރު 2247 އަހުމަދު މައިސާން ހާޝިމްއެވެ.
މި މައްސަލަ ތަހުގީގުކޮށްފައވަނީ އެ ހަމަލާއަކީ ޕީޖީ އަވަހާރަކޮށްލުމަށް ދިން ހަމަލާއެއްކަމަށް ތުހުމަތު ކޮށްގެންނެވެ. މި މައްސަލަ މަޖިލީހުގެ 241 ކޮމިޓީންވެސް ބަލާފައިވެއެވެ.
