ފެބްރިގާޒް އިރުޝާދު ދެމުން އަންނަ ކޯމޯ އަށް ތިން ކުޅުންތެރިޔަކު ގެންނަނީ
21 އޯގަސްޓު 2024 | ބުދަ 07:10ކޯމޯ އިން ހޯދަން މަސައްކަތް ކުރަމުން އަންނަ ތިން ކުޅުންތެރިންނަކީ ދާދި ފަހުން ސްޕެއިންގެ ބާސެލޯނާ ދޫކޮށްލަން ނިންމި ސާޖިއޯ ރޮބާޓޯގެ އިތުރުން، ސްޕެއިންގެ ރެއާލް މެޑްރިޑަށް ކުޅެމުން އަންނަ ނިކޯ ފޭޒް އަދި މެންޗެސްޓަރ ސިޓީ އަށް ކުޅެމުން އަންނަ މެކްސިމޯ ޕެރޯން އެވެ.
ކޯމޯ އަށް އިރުޝާދު ދެމުން އަންނަ ފެބްރިގާޒް
އިޓާލިއަން ލީގުގެ ކޯމޯ އަށް ތިން ކުޅުންތެރިޔަކު ހޯދުމުގެ މަސައްކަތް އެ ކުލަބުން ކުރަމުން އަންނަ ކަމަށް މީޑިއާ ރިޕޯޓުތައް ބުނެފި އެވެ.
ސްޕެއިންގެ ކުރީގެ ތަޖުރިބާކާރު މިޑްފީލްޑަރު ސެސް ފެބްރިގާޒް އިރުޝާދު ދެމުން އަންނަ ކޯމޯ އަކީ، 21 އަހަރަށް ފަހު އިޓާލިއަން ލީގަށް ޕްރޮމޯޓުވީ ކުލަބެކެވެ. އެ ކުލަބުގެ ކޯޗުކަމަށް ފެބްރިގާޒް ހަމަޖެއްސީ ވެސް މިދިޔަ ޖުލައި މަހުގެ ތެރޭގަ އެވެ. އޭގެ ކުރިން އޭނާ ވަނީ އެ ކުލަބުގެ ވަގުތީ ކޯޗުގެ ގޮތުގައި ވެސް މަސައްކަތް ކޮށްފަ އެވެ.
ކޯމޯ އިން ހޯދަން މަސައްކަތް ކުރަމުން އަންނަ ތިން ކުޅުންތެރިންނަކީ ދާދި ފަހުން ސްޕެއިންގެ ބާސެލޯނާ ދޫކޮށްލަން ނިންމި ސާޖިއޯ ރޮބާޓޯގެ އިތުރުން، ސްޕެއިންގެ ރެއާލް މެޑްރިޑަށް ކުޅެމުން އަންނަ ނިކޯ ފޭޒް އަދި މެންޗެސްޓަރ ސިޓީ އަށް ކުޅެމުން އަންނަ މެކްސިމޯ ޕެރޯން އެވެ. މީގެ ތެރެއިން ޕެރޯން ހޯދުމަށް، ކޯމޯ އިން ވަނީ ސިޓީ އަށް ރަސްމީކޮށް ހުށަހަޅާފައި ކަމަށް ވެސް ރިޕޯޓުތައް ބުނެ އެވެ. އަނެއްކޮޅުން ރެއާލަށް ކުޅެމުން އަންނަ ފޭޒް ހޯދުމާ ގާތަށް އެ ކުލަބުން ޖެހިލާފައިވާ ކަމަށް ރިޕޯޓުތައް ބުނެ އެވެ.
ކޯމޯގެ ކޯޗުކަމަށް ފެބްރިގާޒް ހަމަޖައްސާފައި ވަނީ ހަތަރު އަހަރު ދުވަހުގެ އެއްބަސްވުމެއްގެ ދަށުންނެވެ. ކުރިން ޗެލްސީއާއި އާސެނަލް އަދި ބާސެލޯނާއަށް ކުޅުނު މިޑްފީލްޑަރ ކެރިއަރު ނިންމާލީ ކޯމޯގަ އެވެ. އޭނާ އަކީ 2010 ވަނަ އަހަރު ފީފާ ވޯލްޑް ކަޕް ހޯދި ސްޕެއިން ޓީމްގެ ކުޅުންތެރިއެކެވެ.
