ކުންފުނިތަކަށް ދައްކަންޖެހޭ ފައިސާ ސަރުކާރުން ނުދެވިގެން އުޅެނީ އެ ފައިސާ ސަރުކާރުން ނަހަމަގޮތުގައި ބޭނުންކުރުމުގެ ސަބަބަބުން - ޝަރީފް
ބަޖެޓް ފާސްކުރީ ކުންފުނިތަކަށް ދޭންޖެހޭ ފައިސާ ހިމަނައިގެން
ކެލާ ދާއިރާގެ ކުރީގެ މެންބަރު އިބްރާހިމް ޝަރީފް
ކުންފުނިތަކަށް ދައްކަންޖެހޭ ފައިސާ ސަރުކާރުން ނުދެވިގެން އުޅެނީ އެ ފައިސާ ސަރުކާރުން ނަހަމަގޮތުގައި ބޭނުންކުރުމުގެ ސަބަބަބުން ކަމަށް ކެލާ ދާއިރާގެ ކުރީގެ މެންބަރު އިބްރާހިމް ޝަރީފް ވިދާޅުވެއްޖެއެވެ.
ރާއްޖެޓިވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން ޝަރީފް ވިދާޅުވީ ރައީސް އިބްރާހިމް މުހައްމަދު ޞާލިހުގެ ސަރުކާރުގައި އެއިރު ކޮންޓްރެކްޓަރުން ކޮށްފައި ހުރި ހުރިހާ މަސައްކަތަކަށް ބޭނުންވާ ފައިސާ ސަޕްލިމެންޓްރީ ބަޖެޓުގައި ހިމަނާފައިވާ ކަމަށެވެ. އަދި ބަޖެޓް ފާސްކުރީ އެ ފައިސާ ހިމަނައިގެން ކަމަށާއި، ސަޕްލިމެންޓްރީ ބަޖެޓަށް ލިބޭނެ ފައިސާއާއި 2024 ވަނަ އަހަރުގެ ދައުލަތުގެ ބަޖެޓަށް ލިބޭނެ ފައިސާ އެއިރު ޔަގީންކުރި ކަމަށް ޝަރީފް ވިދާޅުވިއެވެ.
ޝަރީފް ވިދާޅުވީ ބަޖެޓް ތައްޔާރުކުރި މި ސަރުކާރުން 400 ވަރަކަށް ޕީއެސްއައިޕީ ހިމަނާފައިވާ ކަމަށެވެ. އަދި ސަޕްލިމެންޓްރީ ބަޖެޓާއި 2024 ވަނަ އަހަރުގެ ބަޖެޓަކީވެސް މި ސަރުކާރުގެ މަޝްވަރާއާއެކު ހަދާފައިވާ ބަޖެޓެއް ކަމަށެވެ. އަދި ބަޖެޓު ހެދީވެސް ބިލްތައް ދައްކާ ގޮތަށް އެއްބަސްވެގެން ކަމަށާއި، ނަމަވެސް އެ ފައިސާ ނެތީ އޭގެ ބޭނުން ސަރުކާރުން ނަހަމަގޮތުގައިކޮށްގެން ކަމަށް ޝަރީފް ވިދާޅުވިއެވެ.
