ފެލިކްސް ޗެލްސީ އަށް ސޮއި ކުރަނީ

ސްޕެއިންގެ އެތުލެޓިކޯ މެޑްރިޑަށް ކުޅެމުން އަންނަ ޕޯޗުގަލްގެ ޔާއޯ ފެލިކްސް، ޗެލްސީ އަށް ސޮއި ކުރަން ނިންމައިފި އެވެ.

މީޑިއާ ތަކުގައި ބުނެފައިވާ ގޮތުންް އުމުރުން 24 އަހަރުގެ ކުޅުންތެރިޔާ ހޯދުމުގެ ޑީލް ޗެލްސީން ވަނީ ކާމިޔާބު ކޮށްފަ އެވެ. އެގޮތުން ޗެލްސީ އަށް އޭނާ ދޫކޮށްލަން އެތުލެޓިކޯ އިން އެއްބަސްވެފައިވާއިރު، ޗެލްސީގެ އެއްބަސްވުމުގައި ފެލިކްސް ދާދި އަވަހަށް ސޮއި ކުރާނެ ކަމަށް ވެސް ރިޕޯޓުތައް ބުނެ އެވެ.

މީގެ ކުރިން ލޯނު އެއްބަސްވުމެއްގެ ދަށުން ޗެލްސީ އަށް ކުޅެފައިވާ ފެލިކްސް، އެ ކުލަބާ އެކު ސޮއި ކުރާނީ ހަ އަހަރު ދުވަހުގެ އެއްބަސްވުމެއްގައި ކަމަށް ރިޕޯޓުތައް ބުނެ އެވެ. އެހެންކަމުން އެ ކުލަބާ އެކު އޭނާ ސޮއި ކުރާ އެއްބަސްވުމުގެ މުއްދަތު ހަމަވާނީ 2030 ވަނަ އަހަރުގެ ޖޫން މަހުގެ ނިޔަލަށެވެ. އެއްބަސްވުމުގެ މުއްދަތު ހަމަވުމުން، އިތުރު އަހަރަކަށް އެއްބަސްވުން އައު ކުރުމުގެ ފުރުސަތު ވެސް އޮންނާނެ އެވެ.

ފެލިކްސް ވަނީ މީގެ ކުރިން ޗެލްސީ އަށް ކުޅެދިން 20 މެޗުގައި ހަތަރު ލަނޑު ޖަހައިފަ އެވެ. ލޯނު އެއްބަސްވުމެއްގެ ދަށުން ޗެލްސީ އަށް ކުޅުމަށްފަހު، ދެން ފެލިކްސް ބަދަލުވީ ލޯނު އެއްބަސްވުމެއްގެ ދަށުން ސްޕެއިންގެ ބާސެލޯނާ އަށެވެ. ބާސެލޯނާގައި ފެލިކްސް ވަނީ 44 މެޗު ކުޅެ 10 ލަނޑު ޖަހައިފަ އެވެ. ބާސެލޯނާގެ އެއްބަސްވުން ހަމަވުމުން ފެލިކްސް ވަނީ އެނބުރި އެތުލެޓިކޯ އަށް އަންނަން ޖެހިފަ އެވެ.