ސިސިލީ ކައިރިން ލަގްޒަރީ ޔޮޓެއް އަޑިޔަށް ގޮސް އެއް މަރު، ހަ މީހުން ގެއްލިގެން ހޯދަނީ

ސިސިލީ ކައިރިން ލަގްޒަރީ ޔޮޓެއް އަޑިޔަށް ގޮސް ޔޮޓުގައި ދަތުރު ކުރި މީހުންގެ ތެރެއިން އެކަކު މަރުވެއްޖެ ކަމަށާއި އިތުރު ހަ މީހުން ގެއްލިގެން ހޯދަމުންދާ ކަމަށް އިޓަލީގެ ކޯސްޓް ގާޑުން ބުނެފިއެވެ.

އިޓަލީގެ ކޯސްޓް ގާޑުން ބުނާ ގޮތުގައި ހޯމަ ދުވަހު ސިސިލީގެ ވެރިރަށް ޕުލޭމޯގެ ކައިރިން މި ހާދިސާ ހިނގީ ވަރަށް ބޮޑަށް މޫސުން ގޯސްވުމުގެ ސަބަބުންނެވެ.

ބޯޓު އަޑިއަށް ދިޔައިރު ބަނދަރާ ބޯޓާ ދެމެދު ހުރީ 700 ވަރަކަށް މީޓަރުގެ ދުރުމިނެއް ކަމަށް ބީބީސީން ބުނެއެވެ.

ކޯސްޓް ގާޑުން ނެރުނު ބަޔާނެއްގައި ބުނެފައިވާ ގޮތުގައި، 56 މީޓަރު (184 ފޫޓު) ދިގު މި ބޯޓަކީ އިނގިރޭސިވިލާތުގައި ރަޖިސްޓްރީކޮށްފައިވާ "ބޭޒިއަން" ނަމަކަށް ކިޔާ އުޅަނދެކެވެ. އުޅަނދުގައި 22 މީހުން ތިއްބާ އަޑިޔަށް ދިޔައީ ހޯމަ ދުވަހުގެ އިރު އަރަން ކައިރިވެރިފައިވަނިކޮށްނެވެ.

ކޯސްޓް ގާޑުން ބުނާ ގޮތުގައި ގެއްލުނު މީހުންނަކީ އިނގިރޭސި، އެމެރިކާ އަދި ކެނެޑާގެ ރައްޔިތުންނެވެ. ސަލާމަތްކުރެވުނު 15 މީހުންގެ ތެރޭގައި އެއް އަހަރުގެ ކުޑަކުއްޖަކުވެސް ހިމެނެއެވެ.

ސަލަމާތް ކުރެވުނު 15 މީހުން ފެނިފައިވަނީ ލައިފްރާފްޓެއްގައި ތިއްބާ ކައިރީ ގައި އޮތް ބޯޓެއްގެ ކެޕްޓަނަކަށެވެ.

މި ހާދިސާ އާ ގުޅިގެން ކޯސްޓް ގާޑުގެ އޮފިޝަލަކު ރޮއިޓާރސް އަށް މައުލޫމާތު ދެމުން ބުނެފައިވަނީ ވައި ވަރަށް ގަދަވާނެ ކަމަށާއި މޫސުން ގޯސްވާނެކަމަށް ލަފާކުރެވުނު ނަމަވެސް، މިވަރަށް ގޯސްވާނެކަމަކަށް ބެލެވިފައިނުވާ ކަމަށެވެ.

އިޓަލީއަށް މޫސުމް ގޯސްވެ ވިއްސާރައިގެ ސަބަބުން ބިންގަނޑު ކަނޑައިގެން ދިޔުން ފަދަ ބޮޑެތި ހާދިސާތައް މި ފާއިތުވި ދެތިން ދުވަހު އެ ގައުމުގެ އުތުރުގެ ސަރަހައްދުތަކަށް ވަނީ ކުރިމަތިވެފައެވެ.

ލަގްޒަރީ ޔޮޓް އަޑި އަށް ދިޔަ ހާދިސާގައި ސަލާމަތް ކުރެވުނު 8 މީހުން ވަނީ ހޮސްޕިޓަލަށް ފަރުވާ ދިނުމަށް ގެންގޮސްފައެވެ. އެންމެންގެ ޙާލަތު "ސްޓޭބަލް" ކަމަށް ޕުލޭމޯގެ އޮފިޝަލުން ރޮއިޓާސް އަށް މައުލޫމާތު ދީފައިވެއެވެ.