އީރާނުގެ ހަނގުރާމަ މަތީ މަނަވަރު "ސަހަންދު" އަޑިޔަށް ހިނގައްޖެއެވެ.
މަނަވަރު އަޑިޔަށް ދިޔައީ، ބަންދަރު އައްބާސްގައި އޮއްވާ ކަމަށް ނޫރު ނިއުސް އޭޖެންސީ އިން ބުނެފައިވެއެވެ.
އަންގާރަ ދުވަހު މި ޙާދިސާ ހިނގީ، މަނަވަރު އެއް ފަރާތަކަށް އަރި އަޅާލުމުން ބެލެންސް ކުރުމަށް މަސައްކަތް ކުރަމުން ދަނިކޮށްނެވެ.
އީރާނުގެ ސްޕްރީމް ނޭޝަނަލް ސެކިއުރިޓީ ކައުންސިލް އާ ހަވާލާ ދީ ނޫރު ނިއުސް އޭޖެންސީން ބުނެފައިވާ ގޮތުގައި އާދިއްތަ ދުވަހު މަނަވަރު އެއް އަތައް އަރިއަޅާލުމާ ގުޅިގެން ބެލެންސް ކުރުމަށް ހޯމަ ދުވަހާ އެކު ކުރި މަސައްކަތް ނާކާމިޔާބުވީ މަނަވަރު ބެލެންސް ކުރުމަށް އެއްގަމަށް ޖެހި ވާ ކަނޑައިގެން ދިއުމުގެ ސަބަބުން ކަމަށެވެ.
އީރާނުގެ ދައުލަތުގެ މީޑިއާ އިން ބުނެފައިވާ ގޮތުގައި، މި ހާދިސާ ހިނގީ މަނަވަރަށް ދިޔަވާތީ، ފެންވަންނަ ތަންތަން ބެއްދުމަށް ޑޮކްގައި ބާއްވައިގެން މަރާމާތު ކުރަމުން ދަނިކޮށް ކަމަށެވެ. މަނަވަރު އެންމެ ފުރަތަމަ އަރިއަޅާލީ ދިޔަވުމުގެ ސަބަބުން ކަމަށްވެސް ބުނެފައިވެއެވެ.
އީރާނުގައި ބަނދެފައިވާ މި މަނަވަރު ބޭލީ 2018 ވަނަ އަހަރުއެވެ. މަނަވަރުގައި ހެލިކޮޕްޓަރު ޖެއްސުމަށް ފްލައިޓް ޓެކް އަކާއި، މިސައިލް ލޯންޗަރ އާއި، އެންޓި އެއަރކްރާފްޓް ބަޑިއާއި، ހަނގުރާމަ މަތީގެ އެހެން ވަސީލަތްތައް ވެސް ގާއިމް ކޮށްފައިވެއެވެ.
އީރާނަށް ބައިނަލް އަގްވާމީ ފެންވަރުގައި އަޅާފައިވާ ދަތި ކުރުމުގެ ފިޔަވަޅު ތަކާއެކު، ހަތިޔާރު އެތެރެ ކުރުން މަނާ ކޮށްފައި އޮތުމާއެކު އެ ގައުމުން ވަނީ އަމިއްލަ އަށް ހަތިޔާރު އުފެއްދުމުގެ ބޮޑު ސިނާއަތެއް ތަރައްގީ ކޮށްފައެވެ.
