ބޭރޫތު ޕޯޓް ކައިރިން ހަތަރު ޓަނަށްވުރެ ގިނަ ކެމިކަލް ފެނިއްޖެ

ލުބުނާންގެ ވެރިރަށް ބޭރޫތުގެ ޕޯޓަށް ވަންނަ ހިސާބުން 4.35 ޓަނުގެ އެމޯނިއަމް ނައިޓްރޭޓް ފެނިފައިވާކަމަށް އެގައުމުގެ އަސްކަރިއްޔާ އިން ބުނެފި އެވެ.

މިއީ މިދިޔަ އޮގަސްޓް މަހުގެ 4 ވަނަ ދުވަހު 3000 ޓަނުގެ ކެމިކަލް ބެއިރޫތުގެ ޕޯޓުގައި ރައްކާކޮށްފައި ހުއްޓާ އެތަކެތި ގޮވައި 191 މީހުން މަރުވެ 6000 މީހުން ޒަހަމްވެފައި ވަނިކޮށް ފެނިފައިވާ ކެމިކަލް ތަކެކެވެ. ލުބުނާންގެ އަސްކަރިއްޔާ އިން ނެރެފައިވާ ބަޔާނެއްގައި ބުނެފައިވަނީ އެސަރަހައްދު އިތުރަށް ބަލަމުންދަނިކޮށް ނުރައްކާތެރި ކެމިކަލް އަޅާފައިވާ ހަތަރު ކޮންޓެއިނަރ ފެނިފައިވާ ކަމަށެވެ. އަދި އަސްކަރިއްޔާގެ އިންޖިނިއަރިންގ އިން މިފެނުނު ކެމިކަލް ކޮންޓެއިނަރ ތަކާމެދު ދެން އަމަލުކުރާނެ ގޮތެއް ބަލަމުންދާކަމަށް ބަޔާނުގައި ބުނެފައިވެއެވެ.

މިކެމިކަލްގެ އަސްލާއި މީގެ ވެރިފަރާތާއި ގުޅޭ މައުލޫމާތެއް އަދި ހާމަކޮށްފައެއް ނުވެއެވެ.

ލުބުނާންގެ ޕޯޓުގައި ގޮވި ބާރުގަދަ ގޮވުމުގައި 300،000 މީހުންގެ ގެދޮރު ގެއްލިފައިވާއިރު ލިބުނު ގެއްލުންތަކުގެ އަދަދު 15 ބިލިއަން ޑޮލަރަށް އަރާކަމަށް ޕްރެޒިޑެންސީ ކައުންސިލުން މިކަމާއި ގުޅިގެން އެކުލަވާލާފައިވާ ރިޕޯޓެއްގައި ބުނެއެވެ.

މިގޮވުމާއި ގުޅިގެން ލުބުނާންގެ ރައްޔިތުން އަންނަނީ އަދިވެސް މިފަދަ ނުރައްކާތެރި ކެމިކަލް ރައްކާކޮށްފައި ހުރެދާނެތީ އެކަމުގެ ކަންބޮޑުވުން ފާޅުކުރަމުންނެވެ.

މިގޮވުމަށްފަހު ފްރާންސް އާއި އިޓަލީގެ ކަމާބެހޭ މާހިރުން ވަނީ އެޕޯޓް އިތުރަށް ބަލާފަ އެވެ. އަދި ޕޯޓުގެ ތެރެއިން ނުރައްކާތެރި ކެމިކަލް އަޅާފައިވާ 20 ކޮންޓެއިނަރ އެއް ވަނީ ފެނިފައެވެ.

އަސްކަރިއްޔާއިން ބުނެފައިވާ ގޮތުގައި މިކޮންޓެއިނަރ ތައް ވަނީ ޕޯޓާއި ދުރު ރައްކާތެރި ހިސާބަކަށް ގެންދެވިފައެވެ.

ލުބުނާންގެ ކަމާބެހޭ ފަރާތްތަކުގެ އެދުމުގެ މަތިން ފްރާންސްގެ މާހިރުންގެ އިތުރުން އެފްބީއާއި އިން އަންނަނީ މިހާދިސާ ހިނގަން މެދުވެރިވި ސަބަބު ތަހުގީގުކުރަމުންނެވެ. މިހާތަނަށް އައިއިރު 25 މީހަކު ހައްޔަރުކޮށްފައިވާއިރު މީގެތެރޭގައި ގިނައީ ޕޯޓާއި ކަސްޓަމްސްގެ އޮފިޝަލުންނެވެ.

މިހަފްތާ ކުރީކޮޅު އދ. އިން ވަނީ ލުބުނާންގެ އާބާދީގެ ބޮޑު ބައެއް ބަނޑުހައިހޫނު ކަމާއި ކުރިމަތިލާން ޖެހިފައިވާކަން ހާމަކޮށްފައެވެ. އެގޮތުން އާބާދީގެ ދެ ބައިކުޅަ އެއް ބައި މީހުންނަށް ކާބޯތަކެތި ނުލިބޭކަމަށް އދ އިން ވަނީ ބުނެފައެވެ.