ހަނގުރާމަ ހުއްޓާލާ ވާހަކަ ދައްކަމުން ފަލަސްތީނުގެ އިތުރު 21 މީހުން ޝަހީދު ކޮށްލައިފި
އިޒްރޭލުން ޣައްޒާއަށް ދޭ ހަމަލާތަކުގައި ޝަހީދުވި މީހުންގެ އަދަދު 40،074 ށް، 92،537 މީހުން ވަނީ ޒަޚަމްވެފައިވެއެވެ.
އިޒްރޭލުން ދިން ހަމަލާއެއްގައި ޝަހީދުވި ފަލަސްތީނު ރައްޔިތުންގެ ޢާއިލާ މެންބަރުން، އެ ޝަހީދުންގެ ހަށިތައް ކައިރީގައި ހިތާމަކުރަނީ
އާދިއްތަ ދުވަހު އިޒްރޭލު ސިފައިން ޣައްޒާ އަށް ބޮން އަޅާ، މަދުވެގެން 21 ފަލަސްތީނު މީހުން ޝަހީދު ކޮށްލައިފިއެވެ.
ޣައްޒާގެ ހަނގުރާމަ ހުއްޓާލުމުގެ މަޝްވަރާ ތަކުގައި ބައިވެރިވަމުން ފަލަސްތީނު ރައްޔިތުން ގެ ގެދޮރަށް ބޮން އަޅާ ކުޑަކުދިންނާ އަންހެނުން ހިމެނޭ ގޮތުން ކޮންމެ ދުވަހަކު އެތައް ބަޔަކު ޝަހީދު ކުރަމުން އިޒްރޭލުން ގެންދާ ގެންދިއުމަކަށް ކުޑަވެސް ހުއްޓުމެއް ނާންނަ ކަމަށް ރިޕޯޓްތައް ބުނެއެވެ.
ހަމާސްގެ އޮފިޝަލެއް ކަމުގައިވާ އުސާމާ ހަމްދާން އަލްޖަޒީރާއަށް މައުލޫމާތު ދެމުން ބުނެފައިވަނީ، ހަމާސްގެ ބަންދުގައި ތިބި އިޒްރޭލު މީހުން ދޫކޮށްލުމަށާއި ހަނގުރާމަ ހުއްޓުވުމަށް ހުރަސްއަޅާ މައިގަނޑު ފަރާތަކީ އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ކަމަށެވެ.
ނަމަވެސް ޤަޠަރުގައި ކުރިއަށް ދިޔަ ދެ ދުވަހުގެ މަޝްވަރާތަކަކަށްފަހު މަޝްވަރާ ތަކުގެ މެދުވެރިންގެ ދައުރު އަދާ ކުރާ ގައުމުތަކުން ބުނެފައިވަނީ ބައްދަލުވުން ނިމިގެން ދިޔައީ ހަނގުރާމަ ހުއްޓާލެވޭނެ ކަމުގެ އުއްމީދު ލިބިގެން ކަމުގައެވެ.
އަނެއްކޮޅުން، ހޮނިހިރު ދުވަހުގެ ރޭ ހާހުން ގުނާލެވޭ މިންވަރަށް މީހުން ތެލްއަވީވް އަދި އިޒްރޭލުގެ އެހެން ސިޓީތަކުގެ މަގުމައްޗަށް ނުކުމެ، ނަތަންޔާހޫ ގެ އިސްތިއުފާ އަށް ގޮވާ މުޒާހަރާ ކޮށްފައިވެއެވެ. އެމީހުން ނަތަންޔާހޫ އަށް ގޮވާލަމުން ދިޔައީ ހަނގުރާމަ ހުއްޓާލުމަށް އެއްބަސްވެ ރަހީނުން މިނިވަން ކޮށްދިނުމަށެވެ. ނަތަންޔާހޫ އާ ދެކޮޅަށް އިޒްރޭލުގައި މުޒާހަރާތައް ހިނގަމުންދާތާ އެތައް ދުވަހެއް ވަނީ ވެފައެވެ.
އިޒްރޭލުން ޣައްޒާއަށް ދޭ ހަމަލާތަކުގައި މިހާތަނަށް މަދުވެގެން 40،074 މީހުން ޝަހީދުވެ، 92،537 މީހުން ޒަޚަމްވެފައިވެއެވެ. އޮކްޓޯބަރު 7 ގައި ހަމާސް އިން އިޒްރޭލަށް ދިން ހަމަލާގައި މަރުވެފައިވަނީ 1،139 މީހުން ކަމަށް ލަފާކުރެވޭއިރު، 200 އަށްވުރެ ގިނަ މީހުން ހަމާސްގެ އަތްދަށުގައި ބަންދުގައި ތިބި ކަމަށް ރިޕޯޓްތައް ބުނެއެވެ.
