ދިވެހިރާއްޖޭގެ ކަނޑުމަހުގެ މަސްވެރިކަން އިތުރަށް ތަރައްގީ ކުރުމުގެ މަގްސަދުގައި ކަމަށް ބުނެ ލޭނު މަސްވެރިކަމަށް މިފަހަރު ހުޅުވާލާއިރު ލޭނުގައި ޖެހި މަރުވެފައި ހުންނަ މިޔަރުގެ ވިޔަފާރި ކުރުމަށް ހުއްދަ ދޭން ސަރުކާރުން ނިންމާފައިވާތީ އެކަމާއި މެދު އެމްޑީޕީގެ ރައީސް އަދި ކުރީގެ ފޮރިން މިނިސްޓަރ އަބްދުﷲ ޝާހިދު ކަންބޮޑުވުން ފާޅުކުރުވައިފިއެވެ.

ޝާހިދު އެކްސްގައި ކުރެއްވި ޕޯސްޓެއްގައި ވިދާޅުވީ އެ ނިންމުމަކީ ހައިރާންކުރުވަނިވި ނިންމުމެއް ކަމަށެވެ. އަދި އެއީ ރާއްޖޭގެ މަސްވެރިކަމުގެ އެންމެ އަސާސީ ސިފަ ދޫކޮށްލުން ކަމަށް ޝާހިދު ވަނީ ސިފަކުރައްވާފައެވެ. އެކަމުގެ ސަބަބުން ރާއްޖޭގެ މަސްވެރިކަމުގެ ސިނާއަތުގެ ދެމެހެއްޓެނިވިކަމަށް ބުރު އަރާކަމަށް ވެސް ޝާހިދު ވަނީ ވިދާޅުވެފައެވެ.

ޝާހިދު ވިދާޅުވީ ލޭނު މަސްވެރިކަމަށްހުއްދަ ދީ، ލޭނުގައި ޖެހޭ މިޔަރު ވިޔަފާރުކުރުމަށް ހުއްދަދިނުމަކީ ނުަރަނގަޅު ނިންމުމެއް ކަމަށެވެ. އަދި މިއީ އެމްޑީޕީގެ ސަރުކާރުގައި ލިބިފައިވާ ކުރިއެރުން ފަހަތަށް ސޮއްސާލާނެ ކަމެއް ކަމަށް ޝާހިދު ވިދާޅުވިއެވެ.

މިކަމުގެ ސަބަބުން ފަތުރުވެރިކަމުގެ ސިނާއަތަށް ވެސް ނުރައްކާ އޮތް ކަމަށް ފާހަގަކުރައްވާ ޝާހިދު ވަނީ މިއީ ރާއްޖޭގެ ވެރިންގެ އަގު ބައިނަލްއަޤުވާމީ މުޖުތަމައުގެ ކުރިމަތީގައި ބަދަލުވެގެންދާނެ ކަމެއް ކަމަށް ވިދާޅުވެފައެވެ. ނެތި ހިނގައިދާނެކަމުގެ ބިރު ހީވެފައިވާ ދިރުންތަކާއި މެދު މިގޮތަށް އަމަލުކުރުމަކީ އެ ސިނާއަތް ވަރުގަދަކުރުމަށް އޮތް ގޮންޖެހުމަކަށް ވާނެ ކަމަށް އޭނާ ވިދާޅުވިއެވެ. އެހެންކަމުން އެންމެންގެ ހައްގުގައި މި ނިންމުން އިއާދަކުރުމަށް ޝާހިދު ގޮވާލެއްވިއެވެ.

މިޔަރުގެ ވިޔަފާރި އަށް ފިޝަރީޒް މިނިސްޓްރީން އަލަށް ހަދާ ގަވައިދުގެ ދަށުން ހުއްދަ ދޭން ޑރ. މުއިއްޒުގެ ސަރުކާރުން ނިންމި އިރު ކުރީ ސަރުކާރުގެ ސިޔާސަތެއްގެ ގޮތުގައި 20 އޭޕްރީލް 2021 ގައި ފިޝަރީޒް މިނިސްޓްރީން ނެރުނު ބަޔާނެއްގައި ބުނެފައި އޮތީ ދިވެހި ރާއްޖޭގައި ލޯންގްލައިން ބޭނުންކޮށްގެން ލޯބޮޑު ކަންނެލީގެ މަސްވެރިކަމަށް ހުއްދަ ދިން ނަމަވެސް ސަރުކާރުން އެއްވެސް ވަރަކަށް މިޔަރުގެ ވިޔަފާރިއަށް ހުއްދަ ނުދޭނެ ކަމަށެވެ. އޭގެ ސަބަބެއް ކަމަށް ކުރިން ފިޝަރީޒް މިނިސްޓްރީން ބުނެފައިވަނީ މިޔަރުގެ ވިޔަފާރި ހުޅުވާލައިފިނަމަ މުޅި ކަނޑުގެ ދިރުންތަކާއި ތިމާވެއްޓަށް ނޭދެވޭ ބަދަލުތަކެއް އައިސްފާނެ ކަމުގެ ބިރު އޮތުމުގެ ސަބަބުން ކަމުގައެވެ.

ރާއްޖޭގައި 2010 ވަނަ އަހަރު މިޔަރު ހިމާޔަތް ކުރެވި އަދި 2011 ވަނަ އަހަރުން ފެށިގެން މިޔަރުގެ ވިޔަފާރި މަނާ ކޮށްފައި ވިޔަސް ދުނިޔޭގެ ބައެއް ގައުމުތަކުގައި މިޔަރު އުރަހަ އަށާއި މިޔަރު މަހަށް ބޮޑު ޑިމާންޑެއް އޮންނާތީ، ގަވައިދާ ޚިލާފަށް ގިނަ އަދަދެއްގެ މިޔަރު އުރަހަ އާއި މިޔަރު މަސް ރާއްޖޭން ބޭރު ކުރަން އުޅުމުގެ އެތައް މައްސަލަތަކެއް ފެންމަތިވެފައިވާ ކަން ފާހަގަ ކުރެވެއެވެ.