އިންޑީއާއަކީ ހުރިހާ މޫސުމެއްގައި ވެސް ރާއްޖެއާ އެކުވެރި ގައުމެއް: ޝާހިދު
15 އޯގަސްޓު 2024 | ބުރާސްފަތި 08:21ކުރިއަށް އޮތްތަނުގައި ރާއްޖެއާއި އިންޑީއާ ގުޅުން އިތުރަށް ބަދަހިވެގެންދާނެ ކަމަށް އުންމީދުކުރަން
ރާއްޖޭގެ ކުރީގެ ޚާރިޖީ ވަޒީރު އަދި އިންޑިއާގެ އެކްސްޓާނަލް އެފެއަރޒް މިނިސްޓަރ ޖައިޝަންކަރާ ބައްދަލުކުރައްވަނީ
އިންޑީއާއަކީ ހުރިހާ މޫސުމެއްގައި ވެސް ރާއްޖެއާ އެކުވެރި ގައުމެއް ކަމަށް ކުރީގެ ފޮރިން މިނިސްޓަރު، އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
އިންޑިއާގެ 78 ވަނަ މިނިވަން ދުވަހުގެ ތަހުނިޔާ ފޮނުއްވަވައި ޝާހިދު ވިދާޅުވީ އިންޑިއާއަކީ ރާއްޖެއަށް ހުރިހާ މޫސުމެއްގައި އެކުވެރި ގައުމެއްކަން ސާބިތުވެފައިވާ ކަމަށެވެ. ރާއްޖެއަށް ކުރިމަތިވާ ކޮންމެ ކާރިސާއެއްގައި އެންމެ ފުރަތަމަ އެންމެ އަވަހަށް އަދި އެންމެ ރަނގަޅަށް އެހީތެރިކަން ފޯރުކޮށްދޭ ގައުމަކީ އިންޑިއާ ކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ އިންޑިއާއަކީ ރާއްޖޭގެ ތަރައްގީގެ ދަތުރުގައި އަގުނުކުރެވޭ ބައިވެރިއެއް ކަމަށެވެ. އަދި ރާއްޖޭގެ ރައްޔިތުންނަށް ތަރައްގީގެ އެހީއާއި އިންސާނީ ވަސީލަތްތައް ތަރައްގީކުރުމަށް އެހީތެރިކަން އިންޑިއާއިން ފޯރުކޮށްދޭކަން ޝާހިދު ފާހަގަކުރެއްވިއެވެ.
ޝާހިދު ވިދާޅުވީ ކުރިއަށް އޮތްތަނުގައި ރާއްޖެއާއި އިންޑީއާ ގުޅުން އިތުރަށް ބަދަހިވެގެންދާނެ ކަމަށް އުންމީދުކުރާ ކަމަށެވެ.
އިންޑިއާއަކީ ރާއްޖެއަށް ތަރައްގީގެ ދާއިރާތަކުންނާއި، މީހުން ބިނާކުރުމުގެ ދާއިރާއިން އެންމެ ބޮޑަށް އެހީތެރިކަން ފޯރުކޮށްދޭ އެއް ގައުމެވެ. މީގެ އިތުރުން މުޅި ދުނިޔެއަށް ކުރިމަތިވި ކޮވިޑް-19ގެ ބަލިމަޑުކަމުގައި ވެސް އެންމެ ބޮޑަށް ރާއްޖެއަށް އެހީތެރިކަން ފޯރުކޮށްދީފައިވާ އެއް ގައުމަކީ އިންޑިއާއެވެ. ނަމަވެސް ރައީސް ޑރ.މުހައްމަދު މުއިއްޒު ފުރަތަމަ ރާއްޖޭގެ ވެރިކަމަށް ވަޑައިގަންނަވާ އިންޑިއާއަށް ވަރަށް ބޮޑަށް ބަހުގެ ހޫނު ހަމަލާތައް އަމާޒު ކުރެވިއެވެ. އެއާއެކު ދެގައުމުގެ ގުޅުން ހީނަވަރުވެގެން ދިޔައެވެ. ނަމަވެސް މިސަރުކާރަށް 8 މަސް ފާއިތުވި ފަހުން މިސަރުކާރުން އިންޑިއާ-ރާއްޖޭގެ ގުޅުން އިތުރަށް ބަދަހިކުރުމަށް މަސައްކަތް ވަނީ ފަށާފައެވެ. އެއާއެކު އެ މަސައްކަތަށް އިންޑިއާ ސަރުކާރުން ވެސް ވަނީ އެއްބާރުލުން ދީފައެވެ.
