ސަރުކާރުން ބޭނުން ވަނީ މަޖިލީހަކީ ސަރުކާރުގެ ކުންފުންޏެއް ހިނގާ އުސޫލުން ހިންގާ ތަނަކަށް ވާން - ދީދީ
ސަރުކާރުގެ އިޤްތިޞާދީ ސިޔާސަތާއި ޚާރިޖީ ސިޔާސަތަށް އޭނާ ވަނީ ފާޑު ވިދާޅުވެފަ
އިޒްރޭލު ޕާސްޕޯޓު މަނާކުރުމުގެ މަސައްކަތް ސަރުކާރުން ކުރަނީ އިހުލާސްތެރިކަމެއް ނެތި ކަމަށް މެންބަރު އަހުމަދު ދީދީ ވިދާޅުވި
ސަރުކާރުން ބޭނުން ވަނީ މަޖިލީހަކީ ސަރުކާރުގެ ކުންފުންޏެއް ހިނގާ އުސޫކުން ހިންގާ ތަނަކަށް ހެދުން ކަމަށް މަޖިލީހުގެ މަރަދޫ ދާއިރާގެ މެމްބަރު އަހުމަދު ދީދީ ވިދާޅުވެއްޖެއެވެ.
އޭނާ އެފަދައިން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ.
ދީދީ ވަނީ ސަރުކާރުގެ މެމްބަރުން ވަކާލާތުކުރަނީ ސަރުކާރު ދިފާއުކުރުމަށްކަމަށާއި ރައްޔިތުންގެ ހައްގުގައި ނޫން ކަމަށް ވިދާޅުވެފައެވެ. ނަމަވެސް މިއަދު ކަން ހިނގާ ގޮތް ރައްޔިތުން ބަލާނެ ކަމަށާއި ރައްޔިތުންގެ ކުރިމަތީގައި ޖަވާބުދާރީ ވާން ޖެހޭނެ ކަމަށް ވެސް އޭނާ ވިދާޅުވިއެވެ. ގޯއްޗާއި ފްލެޓްފަދަ އާއްމުންނާއި ގުޅުން ހުރި ކަންކަމުގައި މެމްބަރުން ރައްޔިތުންގެ އިހުސާސްތަކަށް ނުބަލާ ސަރުކާރު ދިފާއުކުރުމަކީ ކަންބޮޑުވެވަޑައިގަންނަވާ ކަމެއް ކަމަށް އޭނާ ވަނީ ވިދާޅުވެފައެވެ. އެއީ މަޤާމަށް ހޮވި ރައްޔިތުންނަށް އިޚުލާސްތެރިކަން ނެތުމުން ކުރާ ކަމެއް ކަމަށް ދީދީ ވަނީ ވިދާޅުވެފައެވެ.
މީގެ އިތުރުން ސަރުކާރުގެ އިޤްތިޞާދީ ސިޔާސަތާއި ޚާރިޖީ ސިޔާސަތަށް އޭނާ ވަނީ ފާޑު ވިދާޅުވެފައެވެ. އެއްވެސް ކަހަލަ ޕްލޭނެއް ނެތި ސަރުކާރުން މަސައްކަތް ކުރުމުގެ ސަބަބުން އިގްތިސާދީ އަދި ޚާރިޖީ ސިޔާސަތު ބަލިކަށިވެފައިވާ ކަމަށް އޭނާ ވިދާޅުވިއެވެ. އެގޮތުން ވަޒީރުން އިރުއިރުކޮޅާ ގައުމުން ބޭރަށް، ރައީސްގެ ފަތްކޮޅުތައް ހިއްޕަވައިގެން ވަޑައިގެންނެވި ނަމަވެސް އެއިން ޤައުމަށް ވަނީ ކޮން ފައިދާ އެއްތޯ ދީދި ވަނީ ސުވާލުކުރައްވާފައެވެ. ދީދީ އިތުރަށް ވިދާޅުވީ ވެރިކަމަށް އައިގޮތަށް އިންޑިއާ އާއި ޖެހިގަތީ ޗައިނާ އިން ރާއްޖެއަށް ބޮޑެތި އެހީތަކެއް ލިބޭނެ ކަމަށް ސަރުކާރަށް ވިސްނިފައިވާތީ ކަމަށެވެ. އެހެންނަމަވެސް މިހާރު އިންޑިއާ އާއި މެދު ރާގު ބަދަލުކޮށް އިންޑިއާ އަށް މަރުޚަބާ ކިޔާފައި ވަނީ އަވަށްޓެރި ޤައުމެއްގެ ހައިސިއްޔަތުން ރާއްޖެ އަށް އެންމެ ބޮޑަށް އެހީވާނެ ޤައުމަކީ އިންޑީއާކަން މިހާރު ސަރުކާރަށް ވިސްނުމުން ކަމަށް ދީދީ ވަނީ ވިދާޅުވެފައެވެ.
