ދިވެހި ޒުވާނުންގެ ޤައުމީ ލަފާދޭ ކޮމިޓީ އާއި އެކު ޒުވާނުން ބޭނުންވާ ކަންކަން އިމެއް ނެތި އަޅުގަނޑަށް ހުށަހެޅޭނެ - ރައީސް
ޒުވާނުންގެ ފަރާތުން ޤައުމެއް އަދި ސަރުކާރެއް ހިންގުމުގައި އަދި ދަޢުލަތުގެ އެހެން ހުރިހާ ކަމެއްވެސް ބައްޓަންކުރުމުގައި ބަސްބުނުމަކީ ވަރަށް މުހިންމު ކަމެއް ކަމަށް ރައީސް ވިދާޅުވި
"ދިވެހި ޒުވާނުންގެ ޤައުމީ ލަފާދޭ ކޮމިޓީ" ރައީސް ޑރ.މުހައްމަދު މުއިއްޒު އާއި އެކު ނަގާފައިވާ ފޮޓޯ އެއް
ޒުވާނުންގެ މަޖިލީސް އެކުލަވާލުމުން ޤާނޫނު އަސާސީ އާއި ޤައުމުގެ ކުރިއެރުވުމަށް ޒުވާނުން ހަގީގަތުގައި ބޭނުންވާ ކަންކަން އިމެއް ނެތި އެމަނިކުފާނަށް ހުށަހެޅިގެންދާނެ ކަަމަށް އުންމީދުކުރައްވާ ކަމަށް ރައީސް ޑރ.މުހައްމަދު މުއިއްޒު ވިދާޅުވެއްޖެއެވެ.
އެ މަނިކުފާނު އެފަދައިން ވިދާޅުވީ ދިވެހި ޒުވާނުންގެ ޤައުމީ ލަފާދޭ ކޮމިޓީގެ ފުރަތަމަ ބައްދަލުވުމުގައި ވާހަކަދައްކަވަމުންނެވެ.
މި ބައްދަލުވުން ކުރިއަށްދިޔައީ މިއަދު މެންދުރުފަހު ރައީސުލްޖުމްހޫރިއްޔާގެ އޮފީހުގައެވެ.
ދައުލަތުގެ ކަންކަން ނިންމުމުގައި ޒުވާނުންގެ "ދިވެހި ޒުވާނުންގެ ޤައުމީ ލަފާދޭ ކޮމިޓީ"ގެ ޚިޔާލުތައް ފުރިހަމައަށް އިމެއް ނެތި ހުށަހެޅޭނެ ކަމަށް ރައީސް ވިދާޅުވިއެވެ. އަދި ރައީސް އެދިވަޑައިގެން ކަމެއް ކުރުމުގެ ބަދަލުގައި ޒުވާނުންގެ ލަފާދޭ ކޮމިޓީ އަށް ފެންނަ ގޮތަކަށް ލަފާ ދިނުމުގެ ފުރުސަތު ހުޅުވާލާނެ ކަމަށް އެ މަނިކުފާނު ވިދާޅުވިއެވެ. ޒުވާނުންގެ ލަފާދޭ މަޖިލީހެއް އެކުލަވާލުމަކީ ވަކި ވިސްނުމެއް ނުވަތަ ވަކި މީހެއްގެ ލަފަޔާއި ނުލާ އެކި ދާއިރާތަކުން ޒުވާނުންނަށް ބޭނުންވާ ކަންކަން ޒުވާނުން މެދުވެރިކޮށް ހުށަހެޅުމުގެ ފުރުސަތު ލިބިގެންދާނެ ކަމެއް ކަމަށް އެ މަނިކުފާނު ވިދާޅުވިއެވެ. މި ކައުންސިލް މެދުވެރިކޮށް ޤާނޫނު އަސާސީ ބައްޓަންކުރުމަށާއި، ޤައުމުގެ މުސްތަޤްބަލާއި ގުޅުން ހުރި ކަންކަމުގައި ލަފާ ފޯރުކޮށްދިނުމަށް ރައީސް ވަނީ އެ ކައުންސިލްގެ ފަރާތުން އެދިވަޑައިގަންނަވާފައެވެ.
ރައީސް ވަނީ ޤައުމުގެ އާބާދީގެ އެންމެ ބޮޑު އިންސައްތައެއް ހިއްސާކުރާ ބަޔަކީ ޒުވާނުން ކަމަށާއި ޒުވާނުންގެ ފަރާތުން ޤައުމެއް އަދި ސަރުކާރެއް ހިންގުމުގައި އަދި ދަޢުލަތުގެ އެހެން ހުރިހާ ކަމެއްވެސް ބައްޓަންކުރުމުގައި ބަސްބުނުމަކީ ވަރަށް މުހިންމު ކަމެއް ކަމަށް ވިދާޅުވެފައެވެ. އަދި މިފަދަ މަސައްކަތެއް ފެށިގެން ދިއުމުން ޒުވާނުންގެ ފަރާތުން އެ ޒުވާނުންގެ ވިސްނުން ހިއްސާކޮށް، ކަންކަމުގައި ފެންނަގޮތް ހިއްސާކުރެވޭނެ ކަމަށް ރައީސް ވިދާޅުވިއެވެ.
މި ބައްދަލުކުރެއްވުމުގައި އެ ކޮމިޓީގެ ފަރާތުން ވަނީ މިފަދަ ފުރުޞަތެއް ފަހިކޮށްދެއްވައި، ކަންކަމުގައި ޒުވާނުންގެ ޚިޔާލު ހޯއްދެވުމަށް މިފަދަ ފުރުޞަތެއް ފަހިކޮށްދެއްވީތީ ރައީސުލްޖުމްހޫރިއްޔާއަށް ޝުކުރުއަދާކުރައްވާފައެވެ. އަދި ރައީސުލްޖުމްހޫރިއްޔާގެ އިރުޝާދާއި އެއްގޮތަށް ކޮމިޓީގެ ފަރާތުން ރާއްޖޭގެ އެކި ކަންކޮޅުތަކުގައި ދިރިއުޅެމުންދާ ޒުވާނުންގެ ކަންބޮޑުވުންތަކާއި އިޙުސާސްތައް އަޑު އިއްވައިދިނުމަށް ރާވާފައިވާގޮތް ކޮމިޓީގެ ފަރާތުން އެމަނިކުފާނާއި ހިއްސާކުރެއްވިއެވެ.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު "ދިވެހި ޒުވާނުންގެ ޤައުމީ ލަފާދޭ ކޮމިޓީ" އިފްތިތާހުކޮށްދެއްވީ ހޯމަ ދުވަހުއެވެ. މި ކޮމިޓީ އިފުތިތާހުކޮށްދެއްވީ މިކަމަށްޓަކައި ރައީސުލްޖުމްހޫރިއްޔާގެ އޮފީހުގައި ކުރިއަށްދިޔަ ރަސްމިއްޔާތެއްގައެވެ.
"ޕްރެޒިޑެންޝަލް ޔޫތު އެޑްވައިޒަރސް" ބޯޑު އެކުލަވާލަލައްވާފައިވަނީ 18 ޖަނަވަރީ 2024 ގަ ކަމަށް ވާއިރު މި ބޯޑުގައި ތިއްބަވާނީ 15 މެންބަރުންނެވެ. މި ބޯޑަކީ ރައިސުލްޖުމްހޫރިއްޔާއަށް ލަފާދިނުމަށް އެކުލަވާލާ ބޯޑަކަށްވުމާއި އެކު މި ބޯޑުގެ ސެކްރެޓޭރިއޭޓް ބަލަހައްޓާނީ ޔޫތު މިނިސްޓްރީއިންނެވެ. މި ރަސްމިއްޔާތުގައި ރައީސުލްޖުމްހޫރިއްޔާ ވަނީ ދިވެހި ޒުވާނުންގެ ޤައުމީ ލަފާދޭ ކޮމިޓީގެ މެންބަރުންނަށް ބެޖު ހަވާލުކޮށްދެއްވާފައެވެ.
