ބިންވެރިޔާ ސްކީމްގެ ދަށުން ދޫކޮށްފައިވަނީ ގޯތިތަކެއް ނޫން: މިނިސްޓަރު ހައިދަރު
12 އޯގަސްޓު 2024 | ހޯމަ 08:40ހުޅުމާލެ- ފޭސް3އަކުން ގޯތި ލިބުނު މީހުންނަށް ގޯތި ދޫކުރެވޭނީ މިއަހަރުގެ ނޮވެންބަރު މަހު
ރައްޔިތުން މަޖިލީހުގެ ޖަލްސާގައި ހައުސިން މިނިސްޓަރު ޑރ.އަލީ ހައިދަރު ވާހަކަދައްކަވަނީ
ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި ބިންވެރިޔާ ސްކީމްގެ ދަށުން ދޫކޮށްފައިވަނީ ގޯތިތަކެއް ނޫން ކަމަށް ހައުސިން މިނިސްޓަރު ޑރ. އަލީ ހައިދަރު ވިދާޅުވެއްޖެއެވެ.
ހޯމަ ދުވަހު ރައްޔިތުންގެ މަޖިލީހުގެ ޖަލްސާގައި މެންބަރަކު ކުރި ސުވާލަކަށް ޖަވާބު ދެއްވަމުން މިނިސްޓަރު ހައިދަރު ވިދާޅުވީ ކުރީ ސަރުކާރުގައި ބިންވެރިޔާ ސްކީމުގެ ދަށުން ދޫކޮށްފައިވާ ގޯތިތަކަކީ ގޯއްޗެއް ނޫން ކަމަށެވެ. ކަނޑުންދީފައި ހުންނަ އެއްޗަކަށް ގޯތި ނުކިޔާނެ ކަމަށެވެ. ނަމަވެސް މިސަރުކާރުން ގޯތިތައް ދޫކުރާނީ ބިން ހިއްކައިގެން ބިމުން ކަމަށް މިނިސްޓަރު ހައިދަރު ވިދާޅުވިއެވެ.
ހުޅުމާލެ-ފޭސް 3 އަކުން ދޫކުރާ ގޯތިތަކަށް އިޝާރާތް ކުރައްވައި މިނިސްޓަރު ހައިދަރު ވިދާޅުވީ ހުޅުމާލެ- ފޭސް3 ގެ ފަޅުން ގޯތި ލިބުނު 699 މީހުންނަށް ގޯތި ދޫކުރާނެ ކަމަށާއި، ގޯތި ހަވާލުކުރުމުގެ އަމަލީ މަސައްކަތް ފެށޭނެ ކަމަށް ލަފާ ކުރެވެނީ މިއަހަރުގެ ނޮވެންބަރު މަހުގެ ތެރޭގައި ކަމަށެވެ.
މީގެ އިތުރުން މިނިސްޓަރު ހައިދަރު ވިދާޅުވީ ގިރާވަރުން 5187 މީހުންނަށް ގޯތި ދީފައިވަނީ ފަޅުތެރިން ކަމަށެވެ. ބިން ހިއްކުމުގެ މަސައްކަތްތައް ކުރިއަށްދާއިރު، ގޯތި ދޫކުރެވޭނީ އެމަސައްކަތް ނިމުމުން ކަމަށް މިނިސްޓަރު ހައިދަރު ވިދާޅުވިއެވެ.
ކުރީ ސަރުކާރުގައި ބިންވެރިޔާ ސްކީމްގެ ދަށުން ދޫކޮށްފައިވަނީ ގޯތިތަކެއް ނޫން ކަމަށް މިނިސްޓަރު ހައިދަރު ވިދާޅުވިއިރު، ކުރީ ސަރުކާރުން ބަދަލުވެގެން ދިޔައިރު ގޯތި ދޫކުރި ހުރިހާ ސަރަހައްދެއް ވަނީ ހިއްކުމުގެ އަމަލީ މަސައްކަތް ފަށާފައެވެ. ބޮޑު ބައެއް ނިމިފައިވަނިކޮށް، މިސަރުކާރުން ވަނީ އެމަޝްރޫއުތަކުގެ އަމަލީ މަސައްކަތް ހުއްޓުވައި، ބޯހިޔާވަހިކަމަށް ފުށިދިއްގަރުފަޅުގެ މަޝްރޫއު ފަށާފައެވެ. މި މަޝްރޫއުގެ މަސައްކަތް "ރަސްމާލެ" ނަމުގައި ހިއްކަން ފަށާފައިވަނީ 18 ޑިސެންބަރު 2023 ގައެވެ. ނަމަވެސް އެމަޝްރޫއު ވެސް ކުރިއަށް ނުގެންދެވި ވަނީ ހުއްޓިފައެވެ. ގިނަ ބައެއްގެ ފާޑުކިޔުން އަމާޒުވުމާ ގުޅިގެން ގުޅީފަޅު، ގިރާވަރުފަޅު އަދި ހުޅުމާލެ ފޭސް-3 ހިއްކުމުގެ މަސައްކަތް ވަނީ ފަށާފައެވެ.
