ޗެލްސީ ސްޕޮންސަރ ކުރާނެ ބަޔަކުނުވި

އިނގިރޭސި ޕްރެމިއާ ލީގުގެ މަޝްހޫރު ކުލަބު ޗެލްސީ ސްޕޮންސާކުރާނެ ބަޔަކުނުވެ އައު ސީޒަން ފަށަން ޖެހިއްޖެ އެވެ.

މިއީ ވިދިވިދިގެން ޗެލްސީއަށް މެއިން ސްޕޮންސަރެއް ނެތި ސީޒަން ފަށަން ޖެހުނު ދެ ވަނަ ސީޒަނެވެ. އަންނަ ހަފުުތާގައި އައު ސީޒަން ފަށާއިރު ފާއިތުވެދިޔަ ސީޒަނުގައި ވެސް ޗެލްސީ އަށް ޖެހުނީ ސްޕޮންސަރަކު ނެތި ސީޒަން ފަށާށެވެ. ނަމަވެސް ފަހުން އެ ޓީމު ސްޕޮންސާކުރީ އެމެރިކާގެ އިންފިނައިޓް އެތްލީޓް ކުންފުނިންނެވެ. އެކަމަކު އެ ކުންފުނިން ވެސް ތިބީ ޗެލްސީއާއެކު ހެދި އެއް އަހަރުގެ އެއްބަސްވުން އައު ކުރާ ގޮތަކަށްނޫނެވެ.

ޕްރެމިއާ ލީގުގެ ގަވައިދު ބުނާ ގޮތުން ކޮންމެ ޓީމަކަށް ޖާޒީގެ މޭމަތީގައި ޖެހޭނީ މައި އެއް ސްޕޮންސާ އެވެ. މިހެންވެ ސީޒަނެއްގައި ސްޕޮންސާ ބަދަލުކުރެވޭނީ އެންމެ މެޗަކަށެވެ. މިހެންވެ ގިނަ ކުލަބުތަކުން ސީޒަނުގެ ކޮންމެވެސް އެއް މެޗެއްގައި ޖާޒީގެ މޭމަތީގައި ޖަހަނީ އިޖްތިމާއީ ކަންކަމަށް ހިތްވަރުދިނުމުގެ ގޮތުން ދޭ ހާއްސަ މެސެޖެކެވެ.

ރަޝިއާގެ މަހުޖަނު ރޯމަން އަބްރޮމޮވިޗް 2004 ވަނަ އަހަރުން ފެށިގެން ހިންގިއިރު ދުނިޔޭގެ އެންމެ މުއްސަދި އެއްް ކުލަބުގެ ގޮތުގައި ފާހަގަކުރެވުނު ޗެލްސީ އޭނާގެ އަތުން އަތުލި ފަހުން ފެންނަނީ ވަރަށް ގިނަ ކަންކަމުގައި ވަރަށް އާދާއިގެ ގޮތަކަށެވެ. ރަޝިއާގެ ރައީސް ލަޑީމިއާ ޕުޓިންއާ ގާތްގުޅުމެއް އޮންނަ އަބްރޮމޮވިޗަށް ޗެލްސީ ދޫކޮށްލަން ޖެހުނީ ރަޝިއާ - ޔުކްރޭން ހަނގުރާމައިގެ ސަބަބުން އޭނާ އަށް އިނގިރޭސިވިލާތުގައި ވިޔަފާރިިކުރަން ދަތިކޮށްލުމުންނެވެ.

ޗެލްސީ އަށް ސްޕޮންސަރެއް ނުހޯދުމުން އެކުލަބުގެ ސަޕޯޓަރުން ދަނީ ކުލަބުގެ މާކެޓިން ޑިޕާޓްމަންޓްގެ މަސައްކަތާމެދު ސުވާލު އުފައްދަމުންނެވެ. އަދި މިހާރު ކުލަބު ހިންގުމުގައި އެންމެ އިސްކޮށް ހަރަކާތްތެރިވާ ޓޮޑް ބޮއެލީ އަށް ވެސް ވަނީ ފާޑުކިއުން އަމާޒުވެފަ އެވެ.