ކުރިއަށް އޮތް ގަރުނުގައި އައްޑޫގެ ތަރައްޤީ ބިނާވާނީ ރައީސް ސާލިހް އެޅުއްވި ބިންގަލުގެ މަތީގައި: މޭޔަރ ނިޒާރު

ކުރިއަށް އޮތް ގަރުނުގައި އައްޑޫ ސިޓީގެ ތަރައްގީ ބިނާވާނީ ރައީސް އިބްރާހިމް މުޙައްމަދު ޞާލިޙްގެ އަޅުއްވައިދެއްވި ތަރައްގީގެ ބިންގަލުގެ މައްޗަށް ކަމަށް އައްޑޫ ސިޓީގެ މޭޔަރ އަލީ ނިޒާރު ވިދާޅުވެއްޖެ.

މޭޔަރ ނިޒާރު އެކްސް ގައި އާދިއްތަ ދުވަހު ކުރެއްވި ޕޯސްޓެއްގައި، ރައީސް ސާލިހްގެ ސަރުކާރުން އައްޑޫ ސިޓީގެ އިންފްރާސްޓްރަކްޗަރ އަޕްގްރޭޑް ކުރުމަށް ކުރައްވާފައިވާ މަސައްކަތްތައް ވަނީ ފާހަގަ ކުރައްވާފައެވެ. މީގެ ތެރޭގައި މަގުތަކާއި، ފެންހިންދާ ނިޒާމާއި، ހިއްކި ބިންތަކާއި ރަށްތަކާއި، ވައިގެ ބަނދަރުގެ ބޮޑު މަޝްރޫޢުގެ އިތުރުން ހަންކެޑަ މަޝްރޫޢާއި ހަންކެޑަ ބްރިޖް މަޝްރޫއު ހިމެނޭކަން ނިޒާރު ފާހަގަ ކުރެއްވިއެވެ.

މި މަޝްރޫޢުތަކުގެ ސަބަބުން އައްޑޫ ސިޓީގެ ތާރީޚާއި ޖިއޮގްރަފީއަށް ހެޔޮ ބޮޑެތި ބަދަލުތަކެއް އަންނާނެކަމަށް ދެކެވަޑައިގަންނަވާ ކަމަށް ނިޒާރު ވިދާޅުވިއެވެ.

އިންޑިއާ ސަރުކާރުގެ އެހީތެރިކަމާއެކު ކުރިއަށްދާ މި މަސައްކަތްތަކަކީ އައްޑޫގެ މުސްތަޤުބަލަށް ވަރަށް މުހިންމު މަސައްކަތްތަކެއް ކަމުގައި ނިޒާރު ވަނީ ފާހަގަ ކުރައްވާފައެވެ.

މޭޔަރ ނިޒާރު އެކްސްގައި މިހެން ވިދާޅުވީ، ރައީސް ސާލިހްގެ ސަރުކާރުން އިންޑިއާގެ އެހީގައި ކުރިއަށް ގެންދިޔަ މުހިންމު މަޝްރޫއުތަކެއްގެ ނިމުން ފާހަގަ ކުރުމުގެ ރަސްމިއްޔާތު އާދިއްތަ ދުވަހު އައްޑޫ ސިޓީގައި ބާއްވާފައިވަނިކޮށްނެވެ.

އިންޑިއާ ސަރުކާރުގެ އެހީގައި ކުރިއަށް ގެންގޮސް ނިމުން ފާހަގަ ކުރި މަޝްރޫއުތަކަކީ އައްޑޫގެ ބިންހިއްކުމާ ގޮނޑުދޮށް ޙިމާޔަތްކުރުމުގެ މަޝްރޫޢު އާއި ހިތަދޫ އާއި މަރަދޫ ގުޅުވާލުމަށް ހަންކެޑެ ވަށައިގެން ހެދި 4 ލޭނުގެ ޑީޓުއަރ ލިންކް ރޯޑް މަޝްރޫއެވެ.

މި ދެ މަޝްރޫޢަށްވެސް ފަންޑުކޮށްފައިވަނީ އިންޑިއާގެ އެގްޒިމް ބޭންކުގެ ލައިން އޮފް ކްރެޑިޓްގެ ދަށުންނެވެ.