އިއްޔެ ވިދާޅުވީ ގާސިމް އުޅުއްވަނީ އަމިއްލަ އެދުމުގަ ކަމަށް! މިއަދު ޤާސިމްގެ އަރިހަށް ވަޑައިގަތީ ރަތް ދޫލައިގަ!
އަބްދުއްރަހީމް ވަނީ ޤާސިމަށް ކުރިން ވަރަށް ބޮޑަށް ފާޑު ވިދާޅުވެފައެވެ.
އަބްދުއްރަހީމް މާމިގިއްޔަށް ވަޑައިގަތުމުން ހޫނު މަރުހަބާއެއް
މާ ދުރެއް ނޫނެވެ. 2023 ވަނަ އަހަރުގެ ޖޫން މަހުގެ 1 ވަނަ ދުވަހެވެ.
އެ ދުވަހު މިހާރު މަޖިލީހުގެ ރައީސްކަމުގައި ހުންނެވި އަބްދުއްރަހީމް ވިދާޅުވީ ޖުމްހޫރީ ޕާޓީގެ ލީޑަރު ގާސިމް އިބްރާހިމް އުޅުއްވަނީ އަމިއްލަ އެދުމުގައި ކަމަށެވެ. އޭރު އިދިކޮޅު ޕީއެންސީގެ ރައީސް އަބްދުއްރަހީމް އަބްދުﷲ (އަދުރޭ)ގެ ބަހުގެ ހޫނު ހަމަލާތަކެއް ގާސިމަށް އަމާޒުކުރެއްވީ އެއްވެސް ސުމާރެއް ނެތިއެވެ. ކަން ދިމާ ކުރި ގޮތުން އެ ދުވަސްކޮޅު ދިވެހި ކަނޑު ވިއްކާލުމާއި ދެކޮޅަށް އޭރުގެ އިދިކޮޅު ފަރާތްތަކުން ހުކުރު ދުވަހު ބާއްވާ އެއްވުމުގައި ބައިވެރި ނުވާން ޖުމްހޫރީ ޕާޓީގެ މެމްބަރުންނަށް ގާސިމް ގޮވާލެއްވިއެވެ.
އެ ދުވަހު އަދުރޭ ވިދާޅުވީ ލީޑަރުންނަކީ ދިމާވާ ކަންކަމާ ކެރިގެން ކުރިމަތިލާން ކެރޭ ބައެއް ކަމަށެވެ. އަދި ގައުމުގެ ހައްގުގައި ނިކުންނަވާ ލީޑަރުން ފަހަތަށް ޖެހިވަޑައިނުގަންނަވާނެ ކަމަށެވެ. އިދިކޮޅުން ބާއްވާ އެއްވުމުގައި ގައުމުގެ ހައްގުގައި ހުރިހާ ރައްޔިތުން ބައިވެރިވާންޖެހޭ ކަމަށް ވެސް އެ ދުވަހު ވިދާޅުވިއެވެ. އެ ކަން ނުވާނަމަ އަމިއްލަ ވިޔަފާރިއައިގެން ކުރިއަށް ވަޑައިގަންނަވާ، "އަނެއްކާވެސް ހަތަރު ފަޅާއި ފަސް ފަޅު ރަށް ހޯއްދެވޭތޯ ބައްލަވާށޭ." އެ ދުވަހު ޤާސިމާއި ދިމާލަށް ވިދާޅުވި ހަނދާން މަނިކުފާނު މިއަދު ނުހުރެދާނެއެވެ.
އެކަމަކު މިއަދުތޯއެވެ؟ ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ޖުމްހޫރީ ޕާޓީ (ޖޭޕީ)ގެ ލީޑަރު މާމިގިލި ދާއިރާގެ މެމްބަރ ގާސިމް އިބްރާހިމާއި ބައްދަލު ކުރެއްވުމަށް އދ. މާމިގިއްޔަ ވަޑައިގަތުމުން ރަތްދޫލައިގެ މަރުހަބާ ދަންނަވާ އެ ތިއްބެވީ ގަދަކޮށް އެކުގައި ކަމަށް ރައްޔިތުންނަށް ދައްކައިގެންނެވެ. ގާސިމްގެ ދައުވަތަކަށް އަބްދުއްރަހީމް މާމިގިއްޔަށް ވަޑައިގެންނެވީ ގާސިމްގެ ކުންފުނި ވިލާގެ ފްލައިމީގެ މަތިންދާބޯއްގައެވެ. މިއަދު އެއީ އަމިއްލަ އެދުން ބޮޑު ބޭފުޅެއް ކަމަކަށް އަބްދުއްރަހީމް ޤަބޫލެއް ނުކުރައްވައެވެ. ކުރިން ބުނި ވާހަކަ ކެންސަލްއެވެ. މިއަދު ފަޅު ހޯދަން އުޅޭ ވާހަކަ އާއި ފަޅުރަތްތައް ހޯދަން ޤާސިމް އުޅޭ ވާހަކަ ވެސް ކެންސަލްއެވެ. މި ހުންނަނީ ސިޔާސީ މައިދާނުގަ މިހާރު ފެނި ބާވެފައި ހުންނަ ކަންކަމެވެ. އެހެންވީމަ އެ ދުވަހު ޤާސިމް އާއި މެދު މަނިކުފާނު ދެއްކެވީ އަމިއްލަ އެދުމުގައި ދެއްކެވި ވާހަކަތަކެއް ނޫންބާ އޭ މިއަދު ސުވާލު އުފެދެއެވެ.
