ބަންގްލަދޭޝް ސަރުކާރު އިސްތިއުފާ ދިނުމަށް ގޮވާލާ ކުރަމުންދިޔަ މުޒާހަރާތައް ނުރައްކާވެފައިވަނިކޮށް ބޮޑު ވަޒީރު ޝޭޚް ހަސީނާ ކުށްލި ގޮތަކަށް އިސްތިއުފާ ދެއްވާ ފިއްލަވައިގެން ވަޑައިގަތުމާ ގުޅިގެން އެ ގައުމުގެ އަސްކަރިއްޔާ އިން ބަންގްލަދޭޝްގެ ވަގުތީ ސަރުކާރެއް އިއުލާން ކޮށްފިއެވެ.
ހަސީނާ އިސްތިއުފާ ދެއްވުމާ ގުޅިގެން ބަންގްލަދޭޝްގެ އަސްކަރިއްޔާގެ ވެރިޔާ ވަޤާރުއްޒަމާން ގައުމާ މުޚާތަބް ކުރައްވާ ޓީވީ މެދުވެރިކޮށް ހޯމަ ދުވަހު ދެއްވި ބަޔާނެއްގައި ވިދާޅުވީ ގައުމު ދެން ހިންގަމުން ގެންދާނީ ވަގުތީ ސަރުކާރަކުން ކަމަށެވެ.
އޭނާ ވަނީ ގައުމުގައި ހަމަޖެހުން ގާއިމް ކުރުމަށް ރައްޔިތުންނަށް ގޮވާލައްލައްވާފައެވެ.
ހަސީނާ ގައުމު ދޫކުރައްވާ ހޯމަ ދުވަހު ފިއްލެވީ އަސްކަރީ ހެލިކޮޕްޓަރެއްގައެވެ.
ހަސީނާ އިސްތިއުފާ ދެއްވި އިރު، އެތައް ހަފްތާ ތަކެއް ވަންދެން ކުރިއަށް ދިޔަ މުޒާހަރާ ތަކުގައި 300ށް ވުރެ ގިނަ މީހުން ވަނީ މަރުވެފައެވެ. ހަމަ ނުޖެހުން އެންމެ މައްޗަށް ދިޔަ އާދިއްތަ ދުވަހު އެކަނި ވެސް ގާތްގަނޑަކަށް 100 މީހުން މަރުވެފައިވާ ކަމަށް މީޑިއާ ރިޕޯޓްތައް ބުނެއެވެ.
ހޯމަ ދުވަހު ޑާކާގެ މަގުތައް ބެލެހެއްޓުމަށް ސިފައިން ނުކުމެފައިވީނަމަވެސް މުޒާހަރާ ކުރާ މީހުން ވަނީ ދައުލަތުގެ ތަންތަނަށް ވަދެ އެތަންތަން ހިސާރު ކޮށްފައެވެ.
ގިނަ އަދަދެއްގެ ބަޔަކު ބޮޑު ވަޒީރުގެ ރަސްމީ ގެކޮޅަށް ވަދެފައިވާ އިރު ޕާލިމެންޓް އިމާރާތުގެ ތެރެއަށް ވެސް ގިނަ އަދަދެއްގެ ބަޔަކު ވަނީ ވަދެފައެވެ.
ޕާކިސްތާނާ އެކު 1971 ވަނަ އަހަރު ކުރި ބަންގްލަދޭޝް ގެ މިނިވަންކަމުގެ ހަނގުރާމަ އަށް ފަހު 1970 ގެ އަދި 1980 ގެ އަހަރު ތަކުގައި އަސްކަރީ ވެރިކަމެއް ބަންގްލަދޭޝް ގައި ކޮށްފައި ވުމާއެކު މި ދަނޑިވަޅުގައި އަނެއްކާވެސް އަސްކަރިއްޔާ އިން ގައުމު ހިންގުމާ ހަވާލުވެދާނެ ކަމުގެ ކަންބޮޑުވުން އުފެދިފައި ވަނިކޮށް އަސްކަރިއްޔާގެ ވެރިޔާ ވަޤާރުއްޒަމާން ވިދާޅުވީ ރައްޔިތުން އަސްކަރިއްޔާ އަށް އިތުބާރު ކުރުމަށާއި ގައުމަށް ހަމަ ޖެހުން ގެނެސްދެއްވާނެ ކަމަށެވެ.
އަސްކަރިއްޔާގެ ވެރިޔާ ވަނީ، މުޒާހަރާ ތަކުގައި މަރުވި މީހުންގެ އާއިލާތަކަށް އިންސާފު ހޯދައިދެއްވާނެ ކަމަށާއި، ޖަރިމާތައް ހިންގި ފަރާތްތައް އިންސާފުގެ ކުރިމައްޗަށް ގެންނާނެ ކަމަށް ވިދާޅުވެފައެވެ.
އޭނާ ވަނީ ވަގުތީ ސަރުކާރު އެކުލަވާލުމަށް ހުރިހާ ސިޔާސީ ޕާޓީތަކަށް މަޝްވަރާ އަށް ދައުވަތު ދެއްވާފައިވާ ކަމަށް ވިދާޅުވެފައެވެ.
ޖަލުގައި ބަންދުކޮށްފައި ހުންނެވި ބަންގްލަދޭޝްގެ ކުރީގެ ބޮޑު ވަޒީރު ޚަލިދާ ޒިޔާ މިނިވަން ކުރުމަށް ބަންގްލަދޭޝްގެ ރައީސް އަންގަވައިފި ކަމަށް މީޑިއާ ރިޕޯޓްތައް ބުނެއެވެ.
