މިހާރު ޕެންޝަން ލިބޭ 23،000 މީހުން އެބަ ތިބިކަމަށާއި، މަހެއްގެ މައްޗަށް ޕެންޝަންގެ ގޮތުގައި 100 މިލިއަން ރުފިޔާ ހޭދަކުރާ ކަމަށް ޕެންޝަން އޮފީހުގެ ޗީފް އެގްޒެކެޓިވް އޮފިސަރ ސުޖާތާ ހަލީމް ވިދާޅުވެއްޖެއެވެ.
ހޯމަ ދުވަހު މިނިވަން މުއައްސަސާތަކުގެ ކޮމިޓީގެ ބައްދަލުވުމުގައި އެ އޮފީހުގެ ފަރާތުން ބައިވެރިވެވަޑައިގަންނަވާފައި ވަނީ ޗީފް އެގްޒެކެޓިވް އޮފިސަރ ސުޖާތާ ހަލީމް އާއި ޗީފް ފައިނޭންޝަލް އޮފިސަރ، ހައްވާ ފަޖުވާ އާއި އައިމިނަތު އިރްތިޔާޝާ، ޑިރެކްޓަރ އިންވެސްޓްމެންޓް އެންޑް ރިސަރޗް އަދި އަބްދުﷲ ފިކުރީ، ޑިރެކްޓަރ ލީގަލް އެފެއަރޒްއެވެ.
އެ ކޮމިޓީގައި ވާހަކަދައްކަވަމުން ޝުޖާތާ ވިދާޅުވީ އެހެނިހެން ޕެންޝަންގެ ގޮތުގައި މިހާތަނަށް 33 މިލިއަން ރުފިޔާ ދޫކޮށްފައިވާ ކަމަށެވެ. ޝުޖާތާ ވިދާޅުވީ ޕެންޝަން އަކީ އިޖުތިމާއީ ރައްކާތެރިކަމުގެ އެއް ތަނބު ކަމަށެވެ. އަދި އިޖުތިމާއީ ރައްކާތެރިކަން ކަށަވަރުކުރުމަށް އިޖުތިމާއީ ރައްކާތެރިކަމާއި ގުޅުން ހުރި އެހެނިހެން ތަނބުތައް ވަރުގަދަ ވާން ޖެހޭ ކަމަށް އޭނާ ވިދާޅުވިއެވެ. ޕެންޝަން ނިޒާމް މިހާރު ވަނީ ވަރަށް ބޮޑަށް ހަރުދަނާވެފައި ކަމަށް ފާހަގަކުރައްވާ އޭނާ ވަނީ ޕެންޝަން ނިޒާމް އެގޮތަށް އޮތުމުގެ ސަބަބުން އެ ނިޒާމްގެ ތެރެއިން ވަރަށް ގިނަ ކަންކަން ކުރުމަށް ޕެންޝަން އޮފީހަށް ހުށަހެޅުންތައް ލިބެމުންދާ ކަމަށް ވިދާޅުވެފައެވެ.
ހަމައެހެންމެ އެ ނިޒާމް އެކުލަވާލީ އުމުރުން ދުވަސްވާ އިރު ދިރިއުޅުމުގެ ފެންވަރު ދަށް ނުވާނެ ވަރުގެ ނިޒާމެއް ބިނާކުރުމުގެ މަޤްސަދުގައި ކަމަށް ޝުޖާތާ ވަނީ ވިދާޅުވެފައެވެ. އެހެންކަމުން އެ ނިޒާމްގެ ތެރެއިން އިތުރު ކަންކަން ކުރަން އުޅުމަކީ ޕެންޝަންގެ ނިޒާމަށް ވަރަށް ބޮޑަށް ބުރު އަރާނެ ކަމެއް ކަމަށް އޭނާ ވަނީ ވިދާޅުވެފައެވެ. ޕެންޝަން ނިޒާމް އައުމާއި އެކު ޕްރޮވިޑެންޓް ފަންޑް އުވާލާފައިވާ ކަމަށްވެސް އޭނާ ވަނީ ފާހަގަކުރައްވާފައެވެ. ޕެންޝަން ނިޒާމަކީ މާލީ ގޮތުން ދެމެހެއްޓެނެވި ނިޒާމެއް ކަމަށާއި އުމުރުން ދުވަސްވީ މީހުންނަށް ހަމައެކަނި ދައުލަތުން ފައިސާ ފޯރުކޮށްދިނުމަކީ އެކަށީގެންވާ ގޮތެއް ނޫން ކަމަށް އޭނާ ވަނީ ވިދާޅުވެފައެވެ.
ރިޓަޔަމަންޓް ޕެންޝަން ސްކީމް އެއް އެބަ އޮވޭ ގާތްގަނޑަކަށް 122،000 މީހުންގެ. އެބަ ޖަމާވަމުންދޭ މަހަކު 143 މިލިއަން ރުފިޔާ ކޮންޓްރިބިއުޝަންގެ ގޮތުގައި. އަސާސީ ޕެންޝަންގެ ގޮތުގައި 20000 މީހުން އެންމެފަހުގެ ސްޓެޓްސް އަށް ބަލާއިރު. މިހާރު ނަމްބަރސް ދައްކާ ގޮތުން 23000 މީހުން ފަހުން. 90% އުމުރުން ދުވަސްވީ މީހުން ކަވަރވޭ އެބަ. ގެދޮރުގަތުމަށް ފައިސާ ކޮލެޓްރައިޒްކުރުމަކީ އެލޯ ކުރާ ކަމެއް. ތަންތަން ގަންނަން ބޭނުންވާ ބޭފުޅުންނަށް ސޭވިންސްގެ ގޮތުގައި ހުންނަ 20% ނުހުރޭ ބޭންކުން ދޫކުރަން ބަލާއިރު. ދެން މީގެ އިތުރުން ހައްޖަށް މީހުން ދާން އެބަ ދޫކުރަން ޕެންޝަން ފަންޑުން ފައިސާ. އޭގެ މިނިމަމް ވަކި ވަރެއް އެބަ ޖެހޭ ޕެންޝަން ފަންޑުގައި ހުންނަން.ޕެންޝަން އޮފީހުގެ ޗީފް އެގްޒެކެޓިވް އޮފިސަރ ސުޖާތާ ހަލީމް
މީގެ އިތުރުން އިންވެސްޓްމެންޓްގެ ފުރުސަތުތައް ކުޑަކުރުމަކީ ވެސް ދިމާވާ ގޮންޖެހުމެއް ކަމަށާއި ޑޮލަރު ލިބުމުގައި ވެސް ދަތިތައް ހުރި ކަމަށް އޭނާ ވަނީ ވިދާޅުވެފައެވެ. ޝުޖާތާ ވަނީ ޕެންޝަން އަށް ޖަމާކުރާ ފައިސާ އިންވެސްޓް ކުރާ ގޮތަށް ވެސް އަލިއަޅުވަލައްވާފައެވެ. އެގޮތުން ޕެންޝަން ފަންޑުން މިހާތަނަށް އެންމެ ބޮޑަށް އިންވެސްޓްކޮށްފައިވަނީ ޓްރެޒަރީ ބިލަށް ކަމަށް އޭނާ ވަނީ ވިދާޅުވެފައެވެ. މިދިޔަ އަހަރުން ފެށިގެން ސްޓޮކް އެކްސްޗޭންޖްގައި ވެސް އިންވެސްޓް ކުރަމުންދާ ކަމަށާއި އެވްރެޖްކޮށް 5%ގައި ފައިދާ ހިފެހެއްޓޭ ކަމަށް ޝުޖާތާ ވިދާޅުވިއެވެ. މީގެ އިތުރުން އަމިއްލަ ވިޔަފާރިތަކާއި ކުދި ވިޔަފާރިތަކުން އެ ނިޒާމަށް އެއްބާރުލުން ދިނުމަކީ އެންމެ ފުރިހަމަ ކަމެއް ލިބޭނެ ކަމެއް ކަމަށް ޝުޖާތާ ވިދާޅުވިއެވެ. ޝުޖާތާ ވަނީ ރާއްޖޭގައި އުމުރުން ދުވަސްވީ މީހުންގެ އާބާދީ އިތުރުވަމުންދާ ގޮތަށް ބަލައިގެން ކަންކަން ފަރުމާކުރަން ޖެހޭ ކަމަށް ވިދާޅުވެފައެވެ. ޝުޖާތާ ވަނީ އުމުރުން ދުވަސްވީ މީހުންނަށް ދައުލަތުގެ ބަޖެޓުން އިތުރު މަންފާތައް ދެމުންދާ އިރު އެކަން ވެގެންދާނީ ކުރިމަގުގައި ބަޖެޓަށް އޮތް ގޮންޖެހުމަކަށް ކަމަށް ފާހަގަކުރައްވާފައެވެ.
2005ން ފެށިގެން ޕެންޝަން ނިޒާމްގެ ރިފޯމްގެ މަސައްކަތް ވަނީ ފަށާފައެވެ. ޕެންޝަން ނިޒާމެއް ޤާއިމް ކުރީ 2010 ވަނަ އަހަރުއެވެ. އެ މަސައްކަތް ފެށީ ވަރލްޑް ބޭންކްގެ އެހީތެރިކަމާއި އެކުގައެވެ.
