މިސަރުކާރު ހަވާލުވިއިރު އާރްޑީސީގެ ދަރަނި 837 މިލިއަންގައި، މިހާތަނަށް 152 މިލިއަން ރުފިޔާ ވާނީ ދައްކާފައި: އެމްޑީ ޒުހައިރު
5 އޯގަސްޓު 2024 | ހޯމަ 11:27މަޝްރޫއުތަކަށް ކުންފުނިން ކުރާ ހަރަދާ ބަލާއިރު، ލިބެން އޮތީ ކުޑަ އަދަދެއް
ހޯމަ ދުވަހު ކުރިއަށް ގެންދިޔަ އެސްއޯއީ ކޮމެޓީގައި އާރްޑީސީގެ މެނޭޖިން ޑިރެކްޓަރު އަލީ ޒުހައިރު ވާހަކަދައްކަވަނީ
މިސަރުކާރު ހަވާލުވިއިރު، ރޯޑް ޑިވަލޮޕްމެންޓް ކޯޕަރޭޝަން (އާރްޑީސީ)ގެ ދަރަނި 837 މިލިއަނަށް އަރާފައިވާ ކަމަށާއި، މިހާތަނަށް 152 މިލިއަން ރުފިޔާ ދައްކާފައިވާ ކަމަށް އެ ކުންފުނީގެ މެނޭޖިންގ ޑިރެކްޓަރު އަލީ ޒުހައިރު ވިދާޅުވެއްޖެއެވެ.
ހޯމަ ދުވަހު ކުރިއަށް ގެންދިޔަ އެސްއޯއީ ކޮމެޓީގައި ޒުހައިރު ވިދާޅުވީ ކުންފުނީގެ ދަރަނި ވަރަށް ބޮޑު ކަމަށާއި، މީހުންނަށް ދައްކަންޖެހޭ 837 މިލިއަން ރުފިޔާގެ ދަރަނި އެބައޮތް ކަމަށެވެ. އޭގެ ތެރެއިން މިހާތަނަށް 152 މިލިއަން ރުފިޔާ ދައްކާފައިވާ ކަމަށާއި، މިހާރު ދަރަނި 685 މިލިއަން ރުފިޔާއަށް ދަށް ކުރެވިފައިވާ ކަމަށް ޒުހައިރު ވިދާޅުވިއެވެ.
އަތޮޅުތެރޭގައި ރަށްރަށުގައި ހިންގާ މަޝްރޫއުތަކަށް އިޝާރާތް ކުރައްވައި ޒުހައިރު ވިދާޅުވީ އެ މަޝްރޫއުތަކަށް ކުންފުނިން ކުރާ ހަރަދާ ބަލާއިރު، ލިބެން އޮތީ ކުޑަ އަދަދެއް ކަމަށެވެ. އެހެންކަމުން އެމަޝްރޫއުތަކާއެކު ކުންފުނި ހިންގަންޖެހޭނީ ގެއްލުމުގައި ކަމަށް އޭނާ ވިދާޅުވިއެވެ.
ގދ.ގައްދޫގައި ހިންގާ މަޝްރޫއުތަކާ ގުޅޭގޮތުން ޒުހައިރު ވިދާޅުވީ އެ މަޝްރޫއުތަކަށް 35 މިލިއަން ރުފިޔާ ހޭދަކުރަންޖެހޭއިރު، ކުންފުންޏަށް ލިބެން އޮތީ 17 މިލިއަން ރުފިޔާ ކަމަށެވެ.
ޒުހައިރު ވިދާޅުވީ އާރްޑީސީގެ ދަރަނި މެނޭޖްކުރުމަށް އިތުރު މަސައްކަތްތައް ކުރާނެ ކަމަށާއި، ސަރުކާރާއެކު މަޝްވަރާތައް ކުރާނެ ކަމަށެވެ. އެގޮތުން ކުންފުންޏަށް އިތުރަށް ފައިސާ ވާންނާނެ ގޮތްތައް ބަލައި، މަސައްކަތްތައް ކުރިއަށް ގެންދާނެ ކަމަށް އޭނާ ވިދާޅުވިއެވެ.
