މަޖިލީހުން ފެންނަނީ އިޚުލާސްތެެރިކަމެއް ނެތް ބަޔަކަށް ސުޕަރމެޖޯރިޓީ ލިބުނީމަ ވާނެ ގޮތް - ބިގޭ
3 އޯގަސްޓު 2024 | ހޮނިހިރު 20:37ބައެއް ސިޔާސީ ބޭފުޅުން 20 ވަނަ މަޖިލީހަކީ ވަނދު މަޖިލީހެއްގެ ގޮތުގައި ސިފަކުރަމުންދާ ކަމަށް އޭނާ ވިދާޅުވި
މުހައްމަދު ރަޝީދު ހުސައިން
މިހާރު މަޖިލީހުން ފެންނަނީ އިޚުލާސްތެރިކަމެއް ނެތް ބަޔަކަށް މަޖިލީހުގެ ސުޕަރ މެޖޯރިޓީ ލިބުމުން ވާނެ ގޮތް ކަމަށް މަޖިލީހުގެ އަލިފުށީ ދާއިރާގެ ކުރީގެ މެމްބަރު މުހައްމަދު ރަޝީދު ހުސައިން ވިދާޅުވެއްޖެއެވެ.
އޭނާ އެފަދައިން ވިދާޅުވީ ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަދައްކަވަމުންނެވެ.
ބާރުވެރިކަން އެއްކުރަން މަސައްކަތް ކުރުމަކީ ޑީއާރުޕީ، ޕީޕީއެމްގެ އަދި ޕީއެންސީގެ ފިކުރުގެ ވެރިކަމެއް އަންނަ އިރު ފެންނަ ކަމެއް ކަމަށް އޭނާ ވިދާޅުވިއެވެ. ނަމަވެސް އިސްލާހީ މަސައްކަތްތައް ފެށީއްސުރެ އެމްޑީޕީން ވަކާލާތު ކުރަނީ އެއާއި އިދިކޮޅަށް ކަމަށާއި އެމްޑީޕީން ވަކާލާތުކުރަނީ ބާރުތައް ދޫކޮށްލާފައި އޮތުމަށް ކަމަށް އޭނާ ވިދާޅުވިއެވެ. ފެނިގެންދަނީ މަޖިލީހުގެ މެޖޯރިޓީ ބޭނުންކޮށްގެން ސަރުކާރުން ބޭނުންވާހާ ގޮތަކަށް ކަންކަން ނިންމަމުންދާ މަންޒަރުކަމަށް އޭނާ ވިދާޅުވިއެވެ. މަޖިލީހުން ޒިންމާދާރު މަސައްކަތްތަކެއް ކުރާ މަންޒަރު ނުފެންނަ ކަމަށާއި އާއްމުން ކަންބޮޑުވަނީ އެ ސަބަބާއި ހުރެ ކަމަށް އޭނާ ވިދާޅުވިއެވެ. އެ ސަބަބާއި ހުރެ ބައެއް ސިޔާސީ ބޭފުޅުން 20 ވަނަ މަޖިލީހަކީ ވަނދު މަޖިލީހެއްގެ ގޮތުގައި ސިފަކުރަމުންދާ ކަމަށް އޭނާ ވިދާޅުވިއެވެ.
މި ސަރުކާރުން ބޭނުންވެގެން މަޖިލިސް މެދުވެރިކޮށް ކުރީގެ ގަވަރނަރ އަލީ ހާޝިމް ވަކި ކުރީވެސް ސިޔާސީ ގޮތުން ބޭނުންވާ ވަކި މަޤްސަދުތަކެއް ޙާސިލްކުރުމަށްކަމަށް އޭނާ ވަނީ ވިދާޅުވެފައެވެ. އެގޮތުން ހާޝިމް މަޤާމުން ވަކި ކުރީ ސަރުކާރުން ބޭނުންވާހާ ކަމަކަށް އާނ ބަސް ވިދާޅުވާނެ ބޭފުޅަކަށް ހާޝިމް ވެވަޑައި ނުގަންނަވާނެތީ ކަމަށް އޭނާ ވަނީ ވިދާޅުވެފައެވެ. މީގެ އިތުރުން ޚަރަދު ކުޑަކުރުމުގެ ވިސްނުމުގައި އެކަނި ލާމަރުކަޒީ ނިޒާމަށް ބަދަލު ގެނައުމާއި މެމްބަރުންގެ އަދަދު މަދުކުރަން މަސައްކަތް ކުރުމަކީ ބަލައިގަނެވޭ ކަމެއް ނޫން ކަަމަށް އޭނާ ވަނީ ވިދާޅުވެފައެވެ. ޤާނޫނު އަސާސީ އަށް ގެންނަ އިސްލާހުތައް ގެންނަންވާނީ ވަރަށް ފުޅާ ދާއިރާއެއްގައި މަޝްވަރާކޮށްގެން ކަމަށް އޭނާ ވިދާޅުވިއެވެ.
