މޯލްޑިވްސް ޑިވެލޮޕްމެންޓް ބޭންކުގެ ސީއޯ ކަމަށް ދެ ބޭފުޅެއްގެ ނަން ވަނީ ލިބިފައި - ސައީދު

މޯލްޑިވްސް ޑިވެލޮޕްމެންޓް ބޭންކުގެ ސީއީއޯގެ މަޤާމަށް ދެ ބޭފުޅެއްގެ ނަން ލިބިފައިވާ ކަމަށް އިކޮޮނޮމިކް މިނިސްޓަރ މުހައްމަދު ސައީދު ވިދާޅުވެއްޖެއެވެ.

މޯލްޑިވްސް ޑިވެލޮޕްމެންޓް ބޭންކަކީ ރައީސުލްޖުމްހޫރިއްޔާއަށް ލިބިވަޑައިގަންނަވާ ބާރުގެ ދަށުން ރައީސް ޑރ.މުހައްމަދު މުއިއްޒު މިދިޔަ މެއި މަހުގެ 16 ވަނަ ދުވަހު އުފައްދަވާފައިވާ ބޭންކެކެވެ.

މޯލްޑިވްސް އެކައުންޓެންޓް ފޯރަމްގައި ވާހަކަދައްކަވަމުން އެ މަނިކުފާނު ވިދާޅުވީ ކުރިއަށް އޮތް މަދު ހަފްތާތަކެއްގެ ތެރޭގައި އެ ބޭންކް ވުޖޫދު ކުރެވޭނެ ކަމަށެވެ. އަދި ބޭންކު އުފައްދަން ބޭނުންވާ ކުންފުނި ރެޖިސްޓަރކޮށްފައިވާ ކަމަށް މިނިސްޓަރ ވިދާޅުވިއެވެ. ޑިވެލޮޕްމެންޓް ބޭންކުގެ ގަވަނިންގް ބޯޑު އެކުލަވާލުމުގައި ސަރަހައްދީ ގޮތުން ފާހަގަކޮށްލެވޭ މީހުން ހިމަނުއްވާނެ ކަމަށް އެމަނިކުފާނު ވިދާޅުވިއެވެ. އެ ބޭފުޅުންނަކީ މާލީ ދާއިރާގެ ތަޖުރިބާ ހުރި ބޭފުޅުން ކަމަށް ވަޒީރު ވިދާޅުވިއެވެ. އެ ބޭންކަށް ވަރަށް އަވަހަސް ލައިސަންސް ލިބޭނެ ކަމަށާއި ސީއޯކަމަށް ދެ ބޭފުޅެއްގެ ނަން ލިބިފައިވާ ކަމަށް ސައީދު ވިދާޅުވިއެވެ. އެ ދެ ނަން ލިބިފައި ވަނީ ބޭރުގެ ރެކްރޫޓް އެޖެންސީ އެއް މެދުވެރިކޮށް ކަމަށް ވެސް ސައީދު ވިދާޅުވިއެވެ. އެހެންނަމަވެސް އެކަމުގެ އިތުރު ތަފްސީލް ހާމައެއްނުކުރައްވައެވެ.

ސަރުކާރުން ބުނެފައި ވަނީ އެ ބެންކުގެ ސަބަބަބުން ސަރުކާރުގެ ސިޔާސަތުތަކާއި އެއްގޮތަށް ދެމެހެއްޓެނެވި އިގްޔިސާދީ ތަރައްޤީ އަށް ބޭނުންވާ ފައިސާ ލިބޭނެ ކަމަށެވެ. އަދި އިޖުތިމާޢީ ތަރައްޤީއަށް އިންވެސްޓުކުރުމަށާއި އުމްރާނީ ތަރައްޤީ އަށް ބޭނުންވާ ފައިސާ އިންވެސްޓްކުރުމަށް އެކަމުގެ ސަބަބުން މަގުފަހިވެގެންދާނެ ކަމަށް ސަރުކާރުން ބުނެއެވެ. ހަމައެހެންމެ މި ބޭންކް ޤާއިމް ކުރެވުމުން، ސިންޑިކޭޝަން ފައިނޭންސް މެދުވެރިކޮށް ޕީއެސްއައިޕީ މަޝްރޫޢުތަކަށް ފައިސާ ފޯރުކޮށްދިނުމަށް ހުރި ހުރަސްތައް ކުޑަކުރެވޭނެ ކަމަށް ސަރުކާރުން ބުނެއެވެ. އަދި ރާއްޖޭގެ ބޭންކިންގ ނިޒާމުގައި ބޭރު ފައިސާ ބެހެއްޓުމުގެ ޝައުޤުވެރިކަން އިތުރު ކުރުމަށް މި ބޭންކުން މަގުފަހިވާނެ ކަމަށް ސަރުކާރުން ވަނީ ބުނެފައެވެ.