ޚަރަދު ކުޑަ ކުރަނީ ރައްޔިތުންނަށް ނޭނގޭ ގޮތަށް ކަމަށް ސަރުކާރުން ބުނަނީ ރައްޔިތުންނަށް އޭގެ އަސަރު ނުކުރާތީކީ ނޫން، އެކަން ސިއްރުން ކުރާތީ - ޔާމީން

ޚަރަދު ކުޑަ ކުރަނީ ރައްޔިތުންނަށް ނޭނގޭ ގޮތަށް ކަމަށް ސަރުކާރުން ބުނަނީ އެކަން ސިއްރުން ކުރާތީ ކަމަށާއި ޚަރަދު ބޮޑުވާ ކަމުގެ އިހުސާސް ރައްޔިތުންނަށް މިހާރުވެސް ކުރެވޭ ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.

ބުރާސްފަތި ދުވަހުގެ ރޭ ބޭއްވި ޕީޕަލްސް ނޭޝަނަލް ފްރަންޓް (ޕީއެންއެފް)ގެ ޖަލްސާގައި ވަނީ ތަކެތީގެ އަގަށް މި ވެރިކަމުގައި އައިސްފައިވާ ބަދަލުތަކަށް އަލިއަޅުވާލައްވާފައެވެ. އެކަމާއި ގުޅޭ ޕްރެޒެންޓޭޝަނެއް އެ ޖަލްސާގައި ޕީއެންފް އިން ވަނީ ހުށަހަޅާދީފައެވެ.

އެ ޕްރެޒެންޓޭޝަން ކުރިއަށް ދިޔަ ވަގުތު އޭގައިވާ ބައެއް ހިސާބުތަކަށް އަލިއަޅުވާލައްވާ ކުރީގެ ރައީސް ޔާމީން ވަނީ މުދަލުގެ އަގު އުފުލިފައިވާތަކެތީގެ ތެރޭގައި އެންމެ އާދައިގެ އާންމު މީހާ އަށް އަސަރުކުރާނެ ކަންކަން ހިމެނޭ ކަމަށް ވިދާޅުވެފައެވެ. އެގޮތުން މެއި 2024 އާއި އަޅާ ކިޔާ ނަމަ މިހާރު ކަރަންޓާއި، ފަރުނީޗަރ، ކާބޯތަކެތި އަދި ސިއްހީ ޚިދުމަތްތަކުން 0.73% ވަނީ އަގު އުފުލިފައެވެ. އެހެންކަމަށް ވާއިރު ތަކެތީގެ އަގު އުފުލުމުގެ އަސަރު އާއްމު މީހާ އަށް ނުކުރާ ކަމަށް ސަރުކާރުން ބުނާނީ ކޮން ހަމައަކުންތޯ އެ މަނިކުފާނު ވަނީ ސުވާލު އުފައްދަވާފައެވެ. މިހާރު ކާޑުވެސް ގެނެވޭނެކަން އެނގެން ނެތްކަމަށް ފާހަގަކުރައްވާ ކުރީގެ ރައީސް ޔާމީން ވަނީ އެކަމާއި މެދު ކަންބޮޑުވުން ފާޅުކުރައްވާފައެވެ.

ކުރީގެ ރައީސް ޔާމީން ވަނީ ސަރުކާރުގެ އިދާރާތަކާއި މުއައްސަސާތަކުން ހޯދަން އެދޭ މައުލޫމާތު ނުދޭތީ އެކަމަށް ވެސް ފާޑު ވިދާޅުވެފައެވެ. އެގޮތުން ރައީސް ޑރ.މުހައްމަދު މުއިއްޒު ރައިޓް ޓު އިންފޮމޭޝަންގެ ދަށުން މައުލޫމާތު ހޯދަން އުނދަނގޫ ނުވާނެ ކަމަށް ވިދާޅުވި ނަމަވެސް ކަން ހިނގަނީ އެހެން ނޫން ކަމަށް އެ މަނިކުފާނު ވިދާޅުވިއެެވެ. އެގޮތުން އެޑިއުކޭޝަން މިނިސްޓްރީ އާއި ރައީސް އޮފީހުން ވެސް ރައިޓް ޓު އިންފޮމޭޝަންގެ ދަށުން ހޯދަން އެދޭ މައުލޫމާތު ނުދޭ ކަމަށާއި އެއީ ސިޔާސަތުތައް އެކުލަވާލަން އުނދަނގޫވާކަމެއް ކަމަށް މުއައްސަސާތަކާއި އިދާރާތަކުން ބުނަމުންދާ ކަމަށް އެމަނިކުފާނު ވިދާޅުވިއެވެ. ކުރީގެ ރައީސް ޔާމީން ވަނީ އެކަމަށް ވަރަށް ބޮޑަށް ފާޑު ވިދާޅުވެފައެވެ.