ޚާއްސަ އެހީއަށް ބޭނުންވާ ކުދިންގެ ތެރަޕީއަށް ސަރުކާރުން ދޭ ރުފިޔާ މަހުން މަހަށް ނުދީ ދަނީ ހިފަހައްޓަމުން: މެންބަރު ޒިޔާދު

ޚާއްސަ އެހީއަށް ބޭނުންވާ ކުދިންގެ ތެރަޕީއަށް ސަރުކާރުން ދޭ ފައިސާ މަހުން މަހަށް ނުދީ ހިފަހައްޓަމުންދާ ކަމަށް ވައިކަރަދޫ ދާއިރާގެ މެންބަރު ހުސެއިން ޒިޔާދު ވިދާޅުވެއްޖެއެވެ.

ބުދަ ދުވަހު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ޕީޖީ ގުރޫޕުން ބޭއްވި ނޫސްވެރިންގެ ބައްދަލުވުމުގައި މެންބަރު ޒިޔާދު ވިދާޅުވީ ޚާއްސަ އެހީއަށް ބޭނުންވާ ކުދިންގެ ތެރެޕީއަށް ފައިސާ ދޭން ކުރީ ސަރުކާރުން ނިންމާފައިވާ ކަމަށާއި، އެ މަސައްކަތް ކުރަމުންދިޔައީ އާސަންދަ އަދި އެންސްޕާ މެދުވެރިކޮށް ކަމަށެވެ.

Advertisement

ނަމަވެސް ރައީސް ޑރ.މުހައްމަދު މުއިއްޒު ވެރިކަމަށް ވަޑައިގަންނަވާ ހަރަދު ކުޑަކުރުމުގެ ސިޔާސަތުގެ ދަށުން އެކުދިންގެ ތެރަޕީއަށް ދޭންޖެހޭ ފައިސާ ވެސް މަހުން މަހަށް ނުދޭ ކަމަށް މެންބަރު ޒިޔާދު ވިދާޅުވިއެވެ. އަދި ވިދާޅުވީ މިއީ ބަލައިގަނެވޭނެ ކަމެއް ނޫން ކަމަށާއި، ވަރަށް ބޮޑު ކަންބޮޑުވުމެއް ކަމަށެވެ.

ޚާއްސަ އެހީއަށް ބޭނުންވާ ކުދިންގެ ބެލެނިވެރިންނަކީ ފައިސާ ހޯދަން މަގުމައްޗަށް ނުކުންނާނެ ބައެއް ނޫންކަން ފާހަގަކުރައްވައި މެންބަރު ޒިޔާދު ވިދާޅުވީ ޖޫން، ޖުލައިގެ ތެރަޕީގެ ރުފިޔާ ދީފައިވަނީ ޖުލައި 31 ގައި ކަމަށެވެ. އެހެންކަމުން އެކުދިންގެ ތެރަޕީ ސެޝަންތައް ނުނެގި ލަސްވެފައިވާ ކަމަށާއި، ނަމަވެސް މިއީ އެކުދިންނާ ބެލެނިވެރިންނަށް ދެވޭ ވަރަށް ބޮޑު ދެރައެއް ކަމަށް އޭނާ ވިދާޅުވިއެވެ.

މެންބަރު ޒިޔާދު ވިދާޅުވީ ސަރުކާރު ހަރަދު ކުޑަ ކުރަން ބޭނުންވާނަމަ އެކަން ކުރެވޭނެ އެހެން ދިމަދިމާވެސް އެބަހުރި ކަމަށެވެ. ސިޔާސީ މަގާމުތައް އިންތިހާއަށް ގިނައިރު، އެކަމުގެ ސަބަބުން ރައްޔިތުންނަށް ލިބޭ ފައިދާއެއް ނެތް ކަމަށާއި، ގައުމު ހިންގާނެ ކަމަށް ސަރުކާރުން ބުނި ނަމަވެސް އެމަންޒަރު ނުފެންނަ ކަމަށް މެމްބަރު ޒިޔާދު ވިދާޅުވިއެވެ.