ޗައިނާގެ ފެތުންތެރިން މަނާ ބޭހަށް ފޮޒިޓިވްވި ނަމަވެސް އެކަމަށް ފިޔަވަޅު އަޅާފައިނުވާތީވެ އިންޓަނޭޝަނަލް އެންޑި ޑޯޕިން އެޖެންސީ (ވާޑާ) އަށް އެމެރިކާއިން ދެމުން އަންނަ އެހީ ހުއްޓާލަން ނިންމައިފި އެވެ.
މި މައްސަލަ ފެންމަތިކުރީ މިހާރު ފްރާންސްގެ ޕެރިހުގައި ކުރިއަށްދާ އޮލިމްޕިކްސްގެ އެންޓި ޑޯޕިން ބައްދަލުވުމުގަ އެވެ.
ޖަޕާނުގައި 2021 ވަނަ އަހަރު ބޭއްވި އޮލިމްޕިކްސްފައި ބައިވެރިވި 23 ފެތުންތެރިން މަނާ ބޭހަށް ޕޮޒިޓިވްވި އެވެ. އެކަމަކު މި ފެތުންތެރިންގެ އެއްވެސް މައްސަލައެއް ނެތްކަމަށް ނިންމީ ފަހުން ޗައިނާގެ އެންޓި ޑޯޕިން އެޖެންސީން ކުރި ޓެސްޓްތަކަށް ފަހު އެވެ. މިއާއެކު ވާޑާއިން ބުނެފައިވަނީ ޗައިނާގެ ޓެސްޓްތަކުގެ ނަތީޖާއާމެދު ޗެލެންޖްކުރާނެ ފެންވަރެއް ނުވަތަ ހެއްކެއް އެމީހުންގެ އަތުގައި ނެތް ކަމަށެވެ. އެމެރިކާ ރުޅި އައީ މި ހިސާބުންނެވެ.
އެމެރިކާއިން ބުނީ ދުނިޔޭގެ ހުރިހާ ގައުމަކުން އެއްބަސްވެފައިވާ ގަވައިދުތަކަށް އެންމެންވެސް ބޯލަނބަންޖެހޭނެ ކަމަށާއި އެއް ކަމެއްގައި އެކި ގޮތްގޮތަށް އަމަލުކުރުން ބަލައި ނުގަންނާނެ ކަމަށެވެ. އަދި ވާޑާ އަކީ ދުނިޔޭގެ ޑޯޕިން ކަންކަމުގައި ބަސްކިޔަން އޮތް ހަމައެކަނި ޖަމާއަތް ކަމަށްވާއިރު ތަފާތު ކުރުމަކީ ވަރަށް ބޮޑު ގޯހެއް ކަމަށެވެ.
މިކަމާ ގުޅިގެން ވާޑާއިން ބުނީ އެމެރިކާގެ ހިތްހަމަނުޖެހުން އޮތުމުން ޗައިނާ އެތްލީޓުންގެ މައްސަލަ މުރާޖައާކުރަން ކޮމިޓީއަށް ފޮނުވާނެ ކަމަށެވެ.
އެމެރިކާ އަކީ ވާޑާ އަށް އެންމެ ބޮޑު މާލީ އެހީތެރިކަން ދޭ ގައުމެވެ. މިހެންވެ އެމެރިކާގެ އެހީ ހުއްޓާލާނެ ކަމަށް ބުނުމުން އިންޓަނޭޝަނަލް އޮލިމްޕިކް ކޮމިޓީން ވަނީ މިކަމުގެ ތެރެއަށް ވަދެފަ އެވެ. އެ ޖަމާއަތުން ބުނީ ވާހަކަ ދައްކައިގެން ކަންކަން ހައްލު ކުރުމަށް އެދޭ ކަމަށާއި މެދުވެރިއެއްގެ ރޯލު ކުޅެދޭން ވެސް ތައްޔާރު ކަމަށެވެ.
